2 Qbsuran Paru 11
11
Gmeeluk Mqbsuran Paru ka Atalyah
(2 No 22:10-23:15)
1Atalyah bubu Axajyahu we mkela wada phqilun ka Axajyah laqi na de, mosa phuqil kana lqlaqi mslutuc tnsapah qbsuran paru. 2Kiya de Yehoseba mtswai Axajyahu ka laqi mqedil Yehoram qbsuran paru we, gruusi na maadis ka Yoas laqi Axajyah peeyah ckceka dlaqi qbsuran paru pphqilun. Kiya de pspuun na ririh bubu mptquli heya liingun na tqiyan. So sgleing daha Atalyah ma ini phqili ka heya. 3Qmlahang dxeral nii ka Atalyah ciida, 6 knkawas tgleing truma sapah thmkuwan Utux Tmninun hiya ka Yoas ma ririh bubu na.
4Tg7 knkawas, Yehoyada we smkagul seediq mlawa seediq Kari, supi mpqlahang ma, dqbsuran mdudul 1'00 heyi supi, desun na sapah thmkuwan Utux Tmninun psdehu dheya, so maha psdehu truma sapah thmkuwan ka dheya. Dungal we pqtaan na dheya ka laqi qbsuran paru. 5Mdakar rmengo dheya: “Asi namu ka mooda so nii: 1 tnugtruwan namu we, meepah namu qpahun msapuh ali sngayan, 1 tnugtruwan namu mpqlahang sapah qbsuran paru. 6Kiya we 1 tnugtruwan we meeniq rhengun Sur, 1 tnugtruwan we mpqlahang rhengun bukuy nganguc supi mpqlahang hiya. So nii psryuxi qmlahang sapah qbsuran paru ka yamu. 7Ini qlahang ali sngayan ka 2 pnspuwan we, eeniq sapah thmkuwan Utux Tmninun qmlahang qbsuran paru. 8Doi qyqeya mccebu ka txtaxa namu ma pgdhegi qmlahang ka mtqiri qbsuran paru. Kana mnhemuc meyah tumal yamu we, asi phqili. Mlatac ma mremux ciida ka qbsuran paru we, theyaq heya klaali ka yamu.”
9Kiya de muyu kana kari dnurun Yehoyada msapuh ka qbsuran mdudul 1'00 heyi supi. Madis supi na, ani ali sngayan qmlahang ma, ini qlahang ciida we, ida mosa Yehoyada msapuh hiya. 10Msapuh we biqan na smbrangan ma qeerung berah Dawid qbsuran paru gaga skuun sapah thmkuwan Utux Tmninun hiya ka dqbsuran mdudul 1'00 heyi supi. 11Dsupi mpqlahang we, tddoi qyqeya mccebu ma pgsaun daha ka spuhan ma sapah thmkuwan, peeyah daya ma betaq toma tmlibu pgdehu qmlahang mheyu ssiyo qbsuran paru. 12Dmudul Yoas meyah nganguc ka Yehoyada ma, pkbunuh na bunuh qbsuran, biqan na patis gaya ma, hrigan daha abura ngalan daha qbsuran paru. Mqaras tmapaq baga kana ka seediq: “Tai so mpkuudus ani betaq knuwan ka qbsuran paru!”
13Mbahang diras supi mpqlahang ma seediq ka Atalyah de, mosa mremux sapah thmkuwan Utux Tmninun ma seediq hiya. 14Qmita ka heya, qtai! Gisu muyu gaga mheyu ssiyo eruc ka qbsuran paru, kiya ma mheyu ssiyo na ka qbsuran mdudul 1'00 heyi supi ma miyuk iyuk. Kiya uri we tqqaras miyuk iyuk kana ka seediq. Kiya de smgaliq lukus na ka Atalyah ma, mdiras mlawa: “Tbrinah! Tbrinah!” 15Posa kari dqbsuran mdudul 1'00 supi, rmengo dheya ka Yehoyada: “Aangal peeyah pntbkegan posa nganguc ka mqedil gaga. Galiq ka kana seediq smnegul kmdakar heya.” Ado rmengo ka msapuh: “Iya phqili truma sapah thmkuwan Utux Tmninun ka heya.” 16Kiya de qrapun daha ka mqedil. Mremux rhengun Dapa mquri sapah qbsuran paru ka heya de, phqilun daha hiya ka heya.
Bnrahan Yehoyada
(2 No 23:16-21)
17Yehoyada ge, psdhugun na Utux Tmninun ka qbsuran paru ma dseediq, kiya de msdehu mpseediq nuUtux Tmninun ka dheya ma, ppsdhegun na ka qbsuran paru ma seediq uri. 18Kiya de mosa sapah thmkuwan Matan ka seediq ma, hrahun daha ka sapah thmkuwan Baal, pstmaqi daha ka spuhan ma tikung. Dungal we phqilun daha berah spuhan hiya ka dmsapuh Baal. Yehoyada msapuh paru we smkagul mpqlahang mosa qmlahang sapah thmkuwan Utux Tmninun. 19Dungal we dmudul dqbsuran mdudul 1'00 supi, seediq Kari, supi mpqlahang ma, dseediq qlhangan we, desun na peeyah sapah thmkuwan Utux Tmninun ka qbsuran paru. Desun supi mpqlahang mremux sapah qbsuran paru ma, tleung tluungan qbsuran paru. 20Mqaras kana ka seediq qlhangan, kiya de mtbale kana ka alang. Wada daha phqilun hlmadac meeniq sapah qbsuran paru hiya ka Atalyah.
217 knkawas na mqbsuran paru ka Yoas.
Currently Selected:
2 Qbsuran Paru 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
