2 Qbsuran Paru 1
1
Eliyah ma Axajyah Qbsuran Paru
1Bobo wada mhuqil ka Axab, tbrinah Israel ka qlhangan Moab. 2Meniq Samareia ka Axajyah qbsuran paru Israel we mtuting peeyah qnalang sapah baro, kiya de mnarux ka heya da. Smkagul seediq mosa rmengo dheya: “Mpgmanu ka mnarux mu we, osa Baal Jebub smiling utux Eqron.” 3Kiya de, snkgulan Utux Tmninun we, rmengo Eliyah seediq Tisbiy: “Tutui, sai smterung rmengo ka snkgulan qbsuran paru Samareia: ‘Mosa namu psiling Baal Jebub utux Eqron ka yamu we, uka Utux Baro ka Israel di peni?’ 4Kiya de rmengo so nii ka Utux Tmninun: ‘Ida su uxe mptutui peeyah qlapo tnqiyan su, ado mphuqil su ka isu!’” Kiya de mosa ka Eliyah.
5Mbrinah mosa qbsuran paru hiya ka snkgulan ma, rmengo heya ka qbsuran paru: “Ma namu mpbrinah meyah?” 6Cmiyuk ka dheya: “Meyah smterung rmengo menan ka 1 seediq: ‘Osa, mbrinah qbsuran paru smnkagul yamu, sai rmengo ka heya: Rmengo so nii ka Utux Tmninun, mosa namu psiling Baal Jebub utux Eqron ka yamu we, uka Utux Baro ka Israel peni? Kiya de uxe su mptutui peeyah qlapo tnqiyan su ma, mphuqil su ka isu.’” 7Rmengo dheya ka qbsuran paru: “Mgmaanu seediq mneyah smterung yamu ma, rmnengo kari yamu so nii ho?” 8Rmengo qbsuran paru ka dheya: “Seediq kiya we, mlukus ubal ma hmabik qraqil hwinuk na.” Rmengo ka qbsuran paru: “Eliyah seediq Tisbiy kiya.”
9Kiya de smkagul 50 heyi ma qbsuran mdudul 50 heyi mosa hiya ka qbsuran paru. Dehuk Eliyah hiya de, qtai! Gaga tleung bungu dgiyaq hiya ka Eliyah. Rmengo heya ka qbsuran mdudul 50 heyi: “Seediq Utux! Eyah toma, mesa ka qbsuran paru!” 10Cmiyuk qbsuran mdudul 50 heyi ka Eliyah: “Nasi ku seediq Utux ka yaku we, tai so mpeeyah baro ka puniq, mpsqama isu ma 50 seediq su!” Kiya de meyah peeyah baro ka puniq ma, wada psqmaun ka qbsuran mdudul 50 heyi ma 50 heyi seediq na.
11Dungal we smkagul qbsuran mdudul 50 heyi ma, madis 50 heyi mosa Eliyah hiya dungal. Rmengo heya ka qbsuran mdudul 50 heyi: “Seediq Utux! Eyah toma nhari, mesa ka qbsuran paru!” 12Cmiyuk qbsuran mdudul 50 heyi ka Eliyah: “Nasi ku seediq Utux ka yaku we, tai so mpeeyah baro ka puniq, mpsqama isu ma 50 heyi seediq su!” Kiya de meyah peeyah baro ka puniq Utux Baro ma, wada psqmaun ka qbsuran mdudul 50 heyi ma 50 heyi seediq na.
13Dungal mn3 smkagul qbsuran mdudul 50 heyi ma, madis 50 seediq. Mosa Eliyah hiya ka tg3 qbsuran dmudul 50 heyi de, asi tmbqelic berah Eliyah, lmingis dmurun heya: “Seediq Utux! Tai su so spruun bale ka knuudus mu ma, knuudus 50 tnqliyan su nii! 14Qtai! Wada psqmaun puniq peeyah baro ka 2 qpuruh pn50 heyi seediq ma 2 qbsuran mdudul daha tgberah. Saya, so su ngalun spruun bale ka knuudus mu meniq doriq su!” 15Rmengo Eliyah ka snkgulan Utux Tmninun: “Osa theyaq dheya, iya kiicu heya!” Kiya de mtutuy ka Eliyah ma, mtheyaq heya mosa qbsuran paru hiya. 16Rmengo qbsuran paru ka heya: “Rmnengo so nii ka Utux Tmninun: ‘Smkagul su seediq mosa psiling Baal Jebub utux Eqron we, ya uka Utux Baro ka Israel slingun namu ho? Manu so kiya de ida su uxe mptutui peeyah qlapo tnqiyan su, ado mphuqil su ka isu!’”
Yoram ka Lmutuc Mnhuqil ka Axajyah
17Wada mhuqil ka Axajyah, ida so nkari Utux Tmninun rnengo na Eliyah. Tg2 knkawas qlhangan na Yehudah ka Yehoram qbsuran paru laqi Yehosapat cida ge, Yoram mtswai Axajyah ka lmutuc mqbsuran paru. Ado uka laqi ka Axajyah. 18Duma noda Axajyah we, uxe gaga spatis ‘Patis ndaan Dqbsuran Paru Israel’ hiya peni?
Currently Selected:
2 Qbsuran Paru 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
