2 Qbsuran Paru 2
2
Wada Ngalun Karac Baro ka Eliyah
1Dehuk ka ali Utux Tmninun ngngalun karac baro ka Eliyah desun bgihur mpgeriq, Eliyah ma Elisa we mquri Gilgal mkkesa ka dheya. 2Rmengo Elisa ka Eliyah: “Smkagul kenan mquri Beytel ka Utux Tmninun. Isu we tduwa su meniq hini.” Rmengo ka Elisa: “Mpooda ku Utux Tmninun muudus ani betaq knuwan ma, knuudus su smdehu, uxe ku ba mpalix sunan.” Kiya de msuupu mosa Beytel ka dheya. 3Meyah ka tnugsaan dmpgeela kari meeniq Beytel hiya, mosa Elisa hiya ma, rmengo heya: “Desun Utux Tmninun ali saya ka mptgesa su ma, mplatac sunan we ya su klaun ho?” Rmengo ka heya: “Klaun mu. Kiya de iya rengo ka yamu.”
4Rmengo Elisa ka Eliyah: “Smkagul kenan mquri Beytel ka Utux Tmninun. Isu we tduwa su meeniq hini.” Rmengo ka Elisa: “Mpooda ku Utux Tmninun muudus ani betaq knuwan ma, knuudus su smdehu, uxe ku ba mpalix sunan.” Kiya de dehuk Yerixo ka dheya. 5Meyah smdaling Elisa ka tnugsaan dmpgeela kari meeniq Yerixo ma, rmengo heya: “Desun Utux Tmninun ali saya ka mptgesa su ma, mplatac sunan we klaun su ho?” Rmengo ka heya: “Klaun mu. Kiya de iya rengo ka yamu.”
6Rmengo Elisa ka Eliyah: “Smkagul kenan mquri yayung Yarden ka Utux Tmninun. Isu we tduwa su meniq hini.” Rmengo ka Elisa: “Mpooda ku Utux Tmninun muudus ani betaq knuwan ma, knuudus su smdehu, uxe ku ba mpaalix sunan.” Kiya de msuupu mosa ka dheya. 7Niqan 50 heyi tnugsaan dmpgeela kari theyaq dheya mosa. Stheya mheyu sipo daha ka dheya. Dheya we mosa mheyu ssiyo yayung Yarden. 8Eliyah ge, mangal lukus na mgbaro, ppuun na tnkemu ma ssebuc na qsiya de mtg2 ka qsiya da. Hiya ma Elisa we mkkesa mdengu dxeral mntaril sipo yayung.
9Bobo mntaril de, smiling Elisa ka Eliyah: “Berah ngngalun ku we, so maanu ka qqeepah mu, tduwa su mesa.” Rmengo ka Elisa: “Tai so Bgihur dmnudul sunan we, prruli dmudul kenan.” 10Rmengo ka Eliyah: “Rriqu cyukan ka pnesa su kiya. Kiya de ngngalun ku ciida ka yaku, nasi su qmita kenan we, maangal su. Nasi uxe so kiya de uxe su maangal.”
Eliyah Desun Bgihur Qmpgeriq Mgkala Baro
11Mkkesa mpprengo ka dheya ciida, qtai! Asi lux meyah cenga daha ka dapa dmay puniq ma mapa rulu puniq. Kiya de paapa bgihur mpgeriq ka Eliyah ma wada desun karac baro. 12Qmita ka Elisa de, asi plawa: “Tama mu! Tama mu! Rulu mccebu ma suupu paapa dapa dmay Israel!” Betaq ini qita heya ka Elisa de, dkaun na smgaliq ka lukus na nanak. 13Mosa mangal lukus mgbaro mntuting peeyah heyi Eliyah ma mpbrinah mosa mheyu ssiyo yayung Yarden. 14Ngali na ka lukus mgbaro mntuting peeyah Eliyah ma ssebuc na qsiya de rmengo: “Utux Tmninun, Utux Baro nuIriya we gaga inu ho?” Bobo snbetan na ka qsiya de, mtg2 traguh ka qsiya ma mkkesa mntaril sipo yayung ka Elisa.
15Pneyah Yerixo ka 50 heyi tnugesa dmpgeela kari ge, qmita heya ma asi rengo: “Gaga theyaq heyi Elisa ka bgihur Eliyah da.” Meyah smterung heya ma tgtemaq thmuku heya ka dheya. 16Rmengo heya: “Qtai! Tnqliyan hini we niqan 50 heyi mbeyax, sai pgiing mtgesa su ka dheya. Nhuwa gaga desun baro Bgihur Utux Tmninun ka heya de, gaga na ptingun ckceka ayu.” Rmengo ka Elisa: “Iya skguli ka seediq namu.” 17Ida ini psetuq rmengo ka dheya, kiya ka betaq msiqa ka heya ma, rmengo: “Skguli ka seediq namu wah!” Kiya de smkagul 50 heyi, mosa migin mk3 ali ma, ini daha slai ka heya. 18Ida meniq Yerixo ka Elisa ma, meyah brinah heya ka dheya ma, rmengo dheya ka heya: “Uxe ku rmnengo yamu, iya osa peni?”
Qneepah Pnskraya Noda Elisa
19Rmengo Elisa ka dseediq Yerixo: “Qtai! Malu bale ka dxeral alang nii, mntena sa qntaan tnpusu sapah mu. Kiya de we, naqah bale ka qsiya ma, ini heru ani maanu ka dxeral.” 20Rmengo ka Elisa: “Osa mangal bgurah rusuq ma psai timu.” Kiya de yahan daha mege heya. 21Mosa pusu qsiya ka Elisa ma rusan na timu ma rmengo: “Rmengo so nii ka Utux Tmninun: ‘Wada mu pkrtsagun ka qsiya nii da. Mpeeyah hiya, mpkuuka ka mhuqil ma kpretan peeyah hini da.’” 22Kiya de wada malu betaq ali saya ka qsiya da. Mntena so kari rnengo Elisa.
23Peeyah hiya mosa Beytel ka Elisa. Steetu ka heya ciida, peeyah alang meyah nganguc ka lqlaqi ma, smngayan rmengo heya: “Ciyas tunux, osa! Ciyas tunux, osa!” 24Mspgeriq tunux na ma, rmiqo dheya. Dungal we spoda na ngayan Utux Tmninun cmiyus dheya. Kiya de 2 bubu sume we pneyah nrao, wada hmgeliq phuqil 42 heyi lqlaqi mneeniq hiya. 25Mosa dgiyaq Karmel ka Elisa ma, peeyah hiya mosa Samareia dungal.
Currently Selected:
2 Qbsuran Paru 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
