1 Qbsuran Paru 22
22
Pdakar Rmengo Axab ka Mikayhu
(2 No 18:2-27)
13 knkawas ini pccebu ka Aram ma Israel. 2Betaq tg3 knkawas de mosa qmita qbsuran paru Israel ka Yehosapat qbsuran paru Yehudah. 3Rmengo dqbsuran mdayo na ka qbsuran paru Israel: “Ini namu klai Ramot Gilad we nnita kiya peni? Ya ta uxe mooda mpbrinah gmeeluk peeyah baga qbsuran paru Aram ho?” 4Rmengo Yehosapat ka Axab: “Mpsuupu su kenan mosa mccebu Ramot Gilad ho?” Rmengo qbsuran paru Israel ka Yehosapat: “Iya ta psaanak isu ma yaku, supi mu ma supi su, dapa dmay mu ma dapa dmay su.”
5Rmengo qbsuran paru Israel ka Yehosapat: “Braho su plaale smiling kari Utux Tmninun han.” 6Kiya de qbsuran paru Israel we, mlawa mpgeela kari 4'00 heyi ma, smiling dheya: “Mtduwa ku mosa mccebu Ramot Gilad ho? Uxe uri we ini ku tduwa mosa ho?” Cmiyuk ka dheya we “Tduwa su mosa, ado Bukung we, bbege na baga su ka alang kiya.” 7Rmengo ka Yehosapat: “Uxe niqan dungal ka mpgeela kari Utux Tmninun hini peni? Kklaun ta mosa smiling heya ho?” 8Rmengo Yehosapat ka Axab: “Niqan 1 seediq nana, kiya ka Mikayhu laqi Yinla. Tduwa ta spoda heya smiling Utux Tmninun. Kiya de riqu mu ba ka heya. Ado kari pgeela rnengo na kenan we, uka bale ka malu, tnugao ba kari naqah.” Rmengo Yehosapat ka qbsuran paru Israel: “Qbsuran paru iya so kiya rmengo.” 9Kiya de qbsuran paru Israel ge mlawa kingal mpdayo na ma, rmengo: “Osa nhari ka isu, sai mlawa ka Mikayhu laqi Yinla.” 10Mlukus lukus qbsuran paru ma tleung tluungan qbsuran paru sbetan mugi nganguc rhengun alang Samareia hiya ka qbsuran paru Israel ma Yehosapat qbsuran paru Yehudah. Kana dmpgeela kari we rmengo kari pgeela meniq berah daha. 11Cidqiyah laqi Kenaanah we smalu ruurung xiluy ma rmengo: “Rmengo so nii ka Utux Tmninun: ‘Mdoi su ruurung xiluy nii murung seediq Aram betaq wada qhdeun phuqil.’” 12Ida rmengo kari mpgeela so nii ka kana mpgeela kari: “Osa mccebu Ramot Gilad, mosa namu mbeyax. Ado Utux Tmninun we bege na baga qbsuran paru ka alang kiya.”
13Snkgulan mosa mlawa Mikayhu we rmengo heya: “Qtai! Kana dmpgeela kari ge, ida mntena rmengo malu kari quri qbsuran paru ka dheya. Isu duri we rengo kari mntena dheya ma, rengo malu kari uri!” 14Rmengo ka Mikayhu: “Mpsdehu ku quri Utux Tmninun muudus ani knuwan, manu ka rmengo na kenan ka Utux Tmninun de, ida kiya ka rrengo mu.” 15Meyah qbsuran paru hiya ka Mikayhu ma, smiling heya ka qbsuran paru: “Mikayhu, mtduwa miyan mosa mccebu Ramot Gilad ho? Uxe uri we ini nami tduwa mosa ho?” Rmengo qbsuran paru ka Mikayhu: “Tduwa su mosa mccebu, ida su mosa mbeyax. Utux Tmninun we, sbege na baga qbsuran paru ka alang nii.” 16Rmengo heya ka qbsuran paru: “Maha ku mnpiya psdehu sunan, kiya ka kmpooda su ngayan Utux Tmninun mprengo su bale ba kari kenan ho?” 17Rmengo ka Mikayhu: “Qmnita ku mntena rahul miric gaga mkrehak bobo dgiyaq ka seediq Israel ma, mntena rahul miric uka mtabu ka dheya. Rmengo ka Utux Tmninun: ‘Dseediq nii we uka tnpusu sapah daha ma, psbleyaq posa sapah daha nanak ka dheya.’” 18Rmengo Yehosapat ka qbsuran paru Israel: “Uxe ku rmnengo sunan, rmengo kari pgeela ka seediq nii ge, ini ba rengo malu kari, wano ba kari naqah peni?” 19Rmengo ka Mikayhu: “Kiya de asi su ka mbahang kari Utux Tmninun! Qmnita ku Utux Tmninun gaga tleung tluungan na ma, gaga mheyu ssiyo na ka supi karac baro. 20Rmengo ka Utux Tmninun: ‘Ima namu ka maha pkmraki Axab Israel ma phqilun ta Ramot ga Gilad hiya ho?’ Rmengo so nii duma ma, rmengo so kiya ka duma. 21Bobo na meyah ka 1 Bgihur, meyah mheyu berah Utux Tmninun ma, rmengo: ‘Yaku ka maha tmraki heya.’ 22Smiling heya ka Utux Tmninun: ‘Huwa su kesun tmraki?’ Rmengo ka heya: ‘Maha ku nganguc, maha ku so bgihur mberiq meeniq quwaq dmpgeela kari na.’ Rmengo ka Utux Tmninun: ‘So kiya de, osa tmraki heya, dhekun su moda. Osa, puyu so kiya moda!’ 23Saya, qtai! Utux Tmninun we psaun na ckceka kana quwaq dmpgeela kari nii ka bgihur mberiq. Dungal we tena rmnengo mptraqil sunan ka Utux Tmninun.”
24Kiya de Cidqiyahu laqi Kenaanah we mosa berah Mikayhu ma tpaqan na dqeras ma smiling: “Pneeyah inu mnlatac peeyah kenan mosa rmengo sunan ka Bgihur Utux Tmninun ho?” 25Rmengo ka Mikayhu: “Qtai! Mosa su tgleing bukuy ba cenga truma sapah ciida, asi su qita.” 26Rmengo ka qbsuran paru Israel: “Desi ka Mikayhu ma, sai mege qbsuran alang Amon ma Yoas laqi qbsuran paru hiya. 27Rengo so nii ka yamu: ‘Rmnengo so nii ka qbsuran paru: Psai sapah kuung ka seediq nii, pkdira hiya ma, iya pktengi pqdial ma piimah betaq ku mbleyaq mbrinah.’” 28Rmengo ka Mikayhu: “Nasi su mnduwa dungal meyah we, uxe pnoda na kenan rmengo ka kari Utux Tmninun.” Rmengo dungal ka heya: “Kana seediq! Qbahang kana ka yamu!”
Hnqilan Axab
(2 No 18:28-34)
29Qbsuran paru Israel ma Yehosapat qbsuran paru Yehudah we msuupu mosa Ramot Gilad. 30Rmengo Yehosapat ka qbsuran paru Israel: “Maha ku priyux lukus mccebu, ani su nak plukus lukus qbsuran paru ka isu.” Kiya de priyux lukus mosa mccebu ka qbsuran paru Israel. 31Qbsuran paru Aram we, posa kari 32 dqbsuran supi mdudul rulu mccebu: “Iya osa mccebu qbsuran supi ma supi daha ka yamu, wano ba qbsuran paru Israel ka sai mccebu.” 32Kiya de qmita Yehosapat ka dmpdudul rulu mccebu de rmengo: “Ida heya ka qbsuran paru Israel!” Kiya de mosa mquri heya ma mccebu heya ka dheya. Betaq mdiras mlawa ka Yehosapat. 33Qmita ma uxe qbsuran paru Israel ka heya de, mbrinah ini osa smdurak heya. 34Niqan 1 seediq nii mgcebu budi, ini na klai, asi nii cmebu cenga lukus qeerung berah qbsuran paru Israel ka budi. Kiya de rmengo gaga mgeriq rulu: “Nii ku mangal luqah da! Pbrinah ka rulu! Desi ku qduriq peeyah pncbuwan hini!” 35Ali ciida, krrinah bale mccebu ka dheya. Niqan ka seediq gisu lmekoh qbsuran paru mheyu bobo rulu mccebu smterung seediq Aram. Betaq keeman de, mhuqil ka qbsuran paru. Cnriyu peeyah luqah na ka dara we qluli rulu truma. 36Wada priyax ribaq dgiyaq ka hido ciida, niqan ka kari pnosa mkgarang quri qbrangan supi Israel: “Kana namu we osa mbrinah alang txtaxa namu ma, osa dxeral namu nanak!”
37Mhuqil ka qbsuran paru de, desun daha Samareia heya ma, saan daha smeku Samareia hiya. 38Heya we smino rulu na ssiyo langu Samareia ka dheya. Meyah cmehak dara qbsuran paru ka huling ma, trima hiya ka dmqedil kbrexun. Mntena so kari rnengo Utux Tmninun. 39Duma noda Axab, kana noda na ma, sapah snmalu na waqic dapa bukung ma, snmalu na kana lualang we, uxe gaga spatis ‘Patis ndaan Dqbsuran Paru Israel’ hiya peni? 40Msuupu mtaqi pusu rdrudan na ka Axab. Axajyah laqi na ka lmutuc heya mqbsuran paru.
Yehosapat Qbsuran Paru Yehudah
(2 No 20:31-21:1)
41Tg4 knkawas qlhangan na Israel ka Axab qbsuran paru we mqbsuran paru Yehudah ka Yehosapat laqi Asa. 4235 knkawas na ka Yehosapat we mqbsuran paru ma, 25 knkawas qbsranun na Yerusalem hiya. Ajubah ka ngayan bubu na ma weewa Silxiy. 43Yehosapat we muyu elu ndaan Asa tama na ma, ini kmmhemuc ka noda na ma, mndungus Utux Tmninun ka noda na. Kiya de we, ida ini na lixi ka thmkuwan dgiyaq biciq ma, ida mege snapuh ma psqama skenux hiya. 44Mmsbale daha qbsuran paru Israel ka Yehosapat.
45Duma noda Yehosapat, kana malu noda na ma ndaan na mccebu we, uxe gaga spatis ‘Patis ndaan Dqbsuran Paru Yehudah’ hiya peni? 46Yehosapat we wada na sqada ka rseno kkbrexun meniq sapah thmkuwan rnangi knxalan Asa tama na.
47Ciida, uka qbsuran paru ka dxeral Edom we niqan ka mpqlahang hiya. 48Yehosapat we smalu asu Tarsis ma, mpquri Opir maangal king. Kiya de ida ini osa ka dheya na, ado gaga naqah Ecyon Geber hiya ka asu daha. 49Ciida, rmengo Yehosapat ka Axajyah laqi Axab: “Psuupu paapa asu seediq su ka seediq mu!” Ini sruwa ka Yehosapat. 50Msuupu mtaqi pusu rdrudan na ka Yehosapat. Spuun daha rmeus alang Dawid pusu rdrudan na. Yehoram laqi na ka lmutuc heya mqbsuran paru.
Axajyah Qbsuran Paru Israel
51Tg17 knkawas qlhangan na Yehudah ka Yehosapat qbsuran paru we mqbsuran paru Israel Samareia hiya ka Axajyah laqi Axab ma, 2 knkawas qbsranun na Israel. 52Ini pndungus Utux Tmninun ka noda na. Dungal we moda elu Yarabeam laqi Nebat, mege qnquwan noda Israel. 53Qmeepah Baal, thmuku heya ma, pstutui seang Utux Tmninun, Utux Baro nuIsrael ka heya. Mntena so ndaan kana tama na.
Currently Selected:
1 Qbsuran Paru 22: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
