2 Nooda 14
14
Ini Baka Asa Qbsuran Paru ka Seediq Kusu
1Msuupu mtaqi pusu rudan na ka Abiyah de, reesun daha alang Dawid. Asa laqi na ka lmutuc heya mqbsuran paru. 10 knkawas mmsbleyaq bale ka qlhangan Asa. 2Mndungus doriq Utux Tmninun, Utux Baro na ka noda malu ma msderux Asa. 3Heya ge, wada na gremun ka spuhan ma spuhan gaga biciq dgiyaq, stmaqun na ka tikung ma, sgliqun na hmurah ka Aserah. 4Posa kari seediq Yehudah migin Utux Tmninun, Utux Baro daha ma, muyu gaya na ma gaya pndakar na. 5Dungal we wada na sqada kana ka spuhan ma spuhan psqama pskenux gaga lualang Yehudah. So nii qnlhangan na ka qlhangan Yehudah we mmsbleyaq bale. 6Smnalu mkere alang meeniq Yehudah ka heya. Knkawas qnlhangan na ciida we, mbleyaq ma uka ka mccebu. Ado mege smbleyaq heya ka Utux Tmninun. 7Rmengo seediq Yehudah ka heya: “Mpsalu ta lualang nii, slmeo ta pnharac qnalang alang, sapah mgbaro ma rhengun niqan rrhugan. Nita ka dxeral, ado migin ta Utux Tmninun, Utux Baro ta ka ita. Migin ta heya, kiya ka mege mmbleyaq ssiyo ta ka heya.” Kiya de smalu lualang ka dheya ma, msleelu bale ka noda daha. 8Supi Asa pneeyah Yehudah ma dmoi qqeerung we 30 mang heyi. Pneeyah Binyamin dmoi qqeerung biciq we 28 mang heyi ka mdoi budi. Mnpahung ba supi kana ka dheya nii.
9Jerax seediq Kusu we dmudul 1'00 mang heyi supi, 3'00 mang ka rulu mccebu meyah Maresah mccebu seediq Israel. 10Mosa smterung mccebu ka Asa, psramal mccebu ayu Cepatah dxeral Maresah hiya. 11Asa we mlawa dmurun Utux Tmninun, Utux Baro na: “Utux Tmninun! Cenga mbeyax ma ini kbeyax we, wano isu ka mdayo na. Utux Tmninun, Utux Baro miyan! Braho su dyagi miyan, ado isu ka stmaun miyan, kmpooda miyan ngayan su mphetur supi hbaro nii. Utux Tmninun! Utux Baro miyan ka isu, so uxe mpkbeyax sunan ka dheya.” 12Kiya de cmebu seediq Kusu ka Utux Tmninun, kiya ka wada ini baka berah Asa ma seediq Yehudah ka seediq Kusu. Kiya de qduriq ka seediq Kusu da. 13Asa we dsupi smnegul heya we mosa smdurak dheya betaq Gerar. Hbaro ba wada daha phqilun ka seediq Kusu, betaq ini dehuk mccebu ka dheya. Ado wada ini baka berah Utux Tmninun ma supi na ka dheya. Wada glekun mangal seediq Yehudah ka egu bale qyqeya. 14Dungal we mosa mccebu lualang ssiyo Gerar dungal ka dheya. Dseediq lualang hiya we miicu bale Utux Tmninun. Wada moda gmeeluk kana lualang ka seediq Yehudah. Ado egu bale ka qyqeya hiya. 15Dungal we hrahun daha ka tibu tnbugan, glekun daha mangal ka egu bale miric ma dapa bukung. Kiya de mbrinah mosa Yerusalem ka dheya.
Currently Selected:
2 Nooda 14: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
