2 Nooda 13
13
Mccebu ka Abiyah dhaka Yarabeam
(1 Qbs 15:1-8)
1Tg18 knkawas qbsranun na Israel ka Yarabeam we, mqbsuran paru Yehudah ka Abiyah. 23 knkawas qbsranun na Yerusalem hiya. Mikayahu ka ngayan bubu na ma weewa Uriel seediq Gibeah. Ini psetuq mccebu ka Abiyah ma Yarabeam. 3Niqan texal, dmnudul 40 mang supi gneegan na mccebu ma mpahung supi ka Abiyah. Yarabeam we dmnudul 80 mang supi gneegan na mpahung supi uri mosa smterung mccebu Abiyah. 4Mheyu dgiyaq Cemarayim, kiya ka ckceka dgiyaq Eprayim ka Abiyah ma rmengo: “Yarabeam ma kana seediq Israel, qbahang kenan! 5Utux Tmninun, Utux Baro nuIsrael we, pnoda na gaya pnsdhegan bege na Dawid ma lqlaqi laqi na betaq ani knuwan ka qhlangan Israel we, ini namu klai peni? 6Kiya de, Yarabeam laqi Nebat tnqliyan Selomoh laqi Dawid we, tbrinah tnpusu sapah na. 7Niqan ka seediq mprigo mosa smnegul heya ma, mkere ba lnglungan na mosa mccebu Rexabam laqi Selomoh. Laqi ba knkawas na ciida ka Rexabam ma, uka hari beyax lhebun na mosa hmetur dheya.
8Saya ka yamu we, rmengo namu mccebu qlhangan Utux Tmninun gaga qlhangun lqlaqi laqi Dawid. Hbaro ka seediq namu ma, niqan namu wawa dapa snmalu king Yarabeam, kiya ka gaga namu ngalun utux yamu hiya. 9Uxe namu lqlaqi ltlutuc wada lmiwaq lqlaqi ltlutuc Aharon msapuh Utux Tmninun ma seediq Lewiy ka yamu peni? Mpuyu namu seediq icil pheyu namu msapuh nanak ho? Ani ima nasi psaanak heya ma, madis 1 dapa balas ma 7 baus miric rudu ka ani ima seediq de, tduwa ma msapuh utux uka dungus ka heya da. 10Quri so yami we, Utux Tmninun ka Utux Baro miyan. Uxe miyan mqada heya ka yami. Niqan miyan msapuh Utux Tmninun ka yami, ida lqlaqi mslutuc Aharon kana ma, ida miyan niqan seediq Lewiy mqeepah hiya uri. 11Dheya we mege snapuh psqama klaali quri Utux Tmninun, psqama malu sknexan, dungal we mege pang bobo psaan snmalu king bale. Pcmagan daha gbiyan klaali ka camo. Ado muyu miyan kari pnosa Utux Tmninun, Utux Baro miyan. Kiya de we qmada namu heya ka yamu. 12Qtai! Utux Baro ka dmudul yami, dungal we msapuh na ka mpiiyuk iyuk ma, mpquri yamu miyuk hrenang. Seediq Israel! Iya pccebu Utux Tmninun, Utux Baro npusu rudan namu. Ado uxe namu mpkbeyax.”
13Ciida ka Yarabeam we pniqan na pqburang bukuy seediq Yehudah ka supi. So kiya de, gaga berah seediq Yehudah ka seediq Israel ma, gaga bukuy seediq Yehudah ka supi pqburang. 14Mquri bukuy qmita ka seediq Yehudah, qtai! Gaga mccebu ka berah ma bukuy uri. Kiya de mlawa Utux Tmninun ma, miyuk iyuk urung ka dmsapuh. 15Kiya de mdiras mlawa ka seediq Yehudah. Mdiras ciida ka seediq Yehudah de, cmebu Yarabeam ma seediq Israel ka Utux Baro, kiya de ini baka ma qduriq peeyah berah Abiyah ma seediq Yehudah ka dheya. 16Qduriq peeyah seediq Yehudah ka seediq Israel. Utux Baro we sbege na baga seediq Yehudah ka dheya. 17Abiyah ma supi na we wada daha ini baka ka seediq Israel. Wada phqilun ka supi seediq Israel we 50 mang. 18Ciida, wada ini baka ka seediq Israel, mbeyax ka seediq Yehudah. Ado sntama Utux Tmninun, Utux Baro npusu rudan daha ka dheya. 19Bhragun Abiyah ka Yarabeam ma ngalun na ka duma alang na, kiya ka Beytel ma lualang ssiyo na, Yesanah ma lualang ssiyo na, Eprayin ma lualang ssiyo na. 20Muudus ciida ka Abiyah we, ida ini kbeyax ka Yarabeam. Cmebu heya ka Utux Tmninun de, mhuqil ka heya. 21Abiyah we mrana ba beyax na. Mangal 14 mqedil na ma, tnlaqi 22 laqi na rseno, 16 laqi na mqedil ka heya. 22Duma ndaan ma pnkari Abiyah we gaga spatis Patis prngagan Ido mpgeela kari hiya kana.
Currently Selected:
2 Nooda 13: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
