2 Nooda 12
12
Micrayim we Kmremux Cmebu Yehudah
(1 Qbs 14:25-31)
1Rexabam we psdhegun na ka qlhangan na. Kiya de qmada gaya Utux Tmninun mbeyax ciida ka heya ma, smnegul heya ka kana seediq Israel. 2Tg5 knkawas mqbsranun ka Rexabam de, meyah baro cmebu Yerusalem ka Siysaq qbsuran paru Micrayim, ado tbrinah Utux Tmninun ka dheya. 3Sisak we madis 12'00 rulu mccebu, 6 mang ka supi paapa dapa dmay, dungal we smnegul dheya pneeyah Micrayim ka dsupi seediq Lubi, Sukiy ma, Kusu. Hbaro riyung ini qlingi smepu ka dheya. 4Wada daha ngalun ka lualang Yehudah ma betaq Yerusalem da. 5Ciida, ado Siysaq meyah msseli Yerusalem ka qbsuran mdudul Yehudah, meyah qmita Rexabam ma dqbsuran mdudul Yehudah ka Semayah mpgeela kari, rmengo dheya: “Rmnengo so nii ka Utux Tmninun: ‘Qmada namu kenan ka yamu, kiya de mqada ku yamu uri ma, bege maku baga Sisak ka yamu.’” 6Kiya de qnsbiciq rmengo ka dqbsuran mdudul Israel mqbsuran paru: “Msderux noda na ka Utux Tmninun.” 7Utux Tmninun ge, qtaan na qnsbiciq bale ka dheya de, rngagan na ka Semayah dungal: “Ado qnsbiciq ka dheya, kiya ka uxe ku mphuqil dheya. Mpdoi ku baga daha han ma, uxe ku pooda baga Siysaq psgcuqi mseang Yerusalem han. 8Kiya de maha pntqliyan Sisak ka dheya. So daha maha klaun pnsnakan qmeepah kenan ma qmeepah seediq pqlahang bobo dxeral.”
9Kiya de, meyah mccebu Yerusalem ka Siysaq qbsuran paru Micrayim ma, wada na glekun madis kana ka qyqeya sapah thmkuwan Utux Tmninun ma, sapah qbsuran paru, dungal we wada na glekun mangal ka qqeerung heyi snmalu king Selomoh. 10Rexabam we prihan na dqqeerung heyi snmalu limuk ka snmalu king nii ma, sbege na mpqlahang rhengun paru sapah qbsuran paru. 11Mosa sapah thmkuwan Utux Tmninun klaali ka qbsuran paru we, dmoi qqeerung heyi nii ka mpqlahang rhengun. Bobo na de, psaun daha truma sapah qlhangan dungal. 12Psbiciq lhebun na qbsuran paru ciida, uka seang na ka Utux Tmninun, ini na pqhdei pkuuka ka heya. Wada malu hari ka ckceka Yehudah uri da.
Malu Noda Rexabam
13Mqbsuran paru Yerusalem ka Rexabam we prnaan na ka beyax na. 41 knkawas na ciida mqbsuran paru meniq Yerusalem, kiya ka alang gnao Utux Tmninun pneeyah na ckceka pnswayan rudan Israel, betaq 17 knkawas mqbsuran paru. Bubu Rexabam we Naamah seediq Amon. 14Rexabam we qmeepah oda naqah, ado uka lnglungan na migin Utux Tmninun ka heya.
15Ndaan Rexabam peeyah prading betaq qnhdean we uxe gaga spatis ‘Patis Ndaan’ Semayah mpgeela Kari ma ndaan Ido peni? Mccebu klaali ka Rexabam ma Yarabeam. 16Msuupu mtaqi pusu rudan na ka Rexabam ma, reesun daha alang Dawid. Abiyah laqi na ka lmutuc heya mqbsuran paru.
Currently Selected:
2 Nooda 12: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
