2 Nooda 10
10
Tnbrnahan Pnswayan Rudan Tgdaya
(1 Qbs 12:1-20)
1Mosa Sekem ka Rexabam. Ado kana dseediq Israel we gaga msseli Sekem ngngalun daha mqbsuran paru ka heya. 2Qduriq peeyah Selomoh qbsuran paru ma mosa Micrayim ka Yarabeam laqi Nebat. Mbahang kari nii de, peeyah Micrayim meyah ka heya. 3Smkagul seediq mosa mlawa heya ka seediq Israel. Kiya de Yarabeam we msuupu seediq Israel mosa mpprengo Rexabam rmengo heya ka dheya: 4“Tama su we wada knchedil ba kudo pnaapa na menan. Saya braho su pkslokah ka mqraqil qpahan ma knchdilan kudo pnaapa bnege tama su, kiya ka mqeepah miyan sunan.” 5Rmengo dheya ka Rexabam: “Mk3 ali de eyah dungal!” Kiya de wada ka dheya da.
6Muudus ciida ka Selomoh tama Rexabam han ge, niqan ka rdrudan mheyu berah na, Rexabam qbsuran paru we smiling dheya ma rmengo: “Yamu ge, peeyah ka lnglungan namu, klaun mu cmiyuk ka dseediq nii.” 7Rmengo heya ka dheya: “Nasi su gmalu seediq nii ma pqqaras su dheya, cyukun su malu kari de, ida maha mtnqliyan qbsuran paru betaq ani knuwan ka dheya.” 8Kiya de qbsuran paru we ini na ngali ka kari ddrudan mpqlahang nii ma, krinah mosa migin dmbbeyax mnsuupu mdakil heya ma, mnheyu berah na ka ngalan na pusu slingan. 9Smiling dheya ka Rexabam: “So nii kari daha ka dseediq nii: ‘Pchedil bale kudo napa menan ka tama su, braho su kslokah hari.’ Peyah ka lnglungan namu, klaun mu madis cmiyuk dheya.” 10Dmbbeyax mnsuupu mdakil heya we rmengo heya: “Rmengo qbsuran paru ka seediq nii: ‘Tama su we wada mchedil ba kudo pnaapa na menan. Braho su pslokah hari.’ Qbsuran paru keso nii cmiyuk ka Dheya: ‘Wawa tluding mu we mgkala qnthuran hwinuk tama mu! 11Wada mchedil kudo pnaapa na yamu ka tama mu. Yaku saya de mpgkala kudo knchedil ka ppaapa mu yamu! Tama mu we saangal namu na ssebuc wada smebuc yamu. Yaku we mdoi ku dosan!’”
12Yarabeam ma seediq we muyu kari rnengo qbsuran paru “Mk3 ali de eyah dungal”, kiya de mk3 ali de meyah Rexabam hiya ka dheya. 13Qbsuran paru ge, mseang bale cmiyuk dheya. Rexabam we ini qbahang nkari ddrudan. 14Kari pneeyah mbbeyax ka ngalun na ma, rmengo dheya: “Tama mu we wada mchedil ba kudo ka pnaapa na yamu, yaku de krinah kudo mchedil ka ppaapa mu yamu! Heya we saangal namu na ssebuc smnebuc yamu, yaku we mdoi ku dosan!” 15Qbsuran paru ge, ini aangal pnesa seediq nii, ado pnoda lnglungan Utux Tmninun ka nii. Kiya ka pblayun na pooda ka nkari Axiyahu mpgeela kari seediq Siylon quri Yarabeam laqi Nebat.
16Dseediq Israel ge, qmita ini angal pnesa daha ka qbsuran paru de asi diras rmengo qbsuran paru:
“Meniq miyan ckceka Dawid we maanu ka pnugluban na?
Meniq miyan laqi Yisay we uka pusu dnoi miyan!
Ddseediq Israel! Nita mbrinah kobu ta nanak!
Dawid! Saya, qlahang nanak sapah su!”
Kiya de dseediq Israel we mbrinah mosa kobu daha nanak ka dheya. 17Quri so dseediq Israel gaga meeniq lualang Yehudah we, ida Rexabam ka qbsuran paru daha. 18Rexabam qbsuran paru we smkagul Hadoram mpqlahang mqeepah. Kiya de kana seediq Israel we wada daha buun btunux phuqil ka heya. Kiya de asi nugaaguh paapa rulu mccebu qduriq Yerusalem ka Rexabam qbsuran paru. 19So kiya de, tbrinah sapah Dawid betaq saya ka Israel.
Currently Selected:
2 Nooda 10: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
