1 Nooda 29
29
Snadu Bnege Ssmalu Sapah Thmkuwan
1Rmengo kana seediq ka Dawid: “Laqi mu Selomoh we gneegan Utux Baro, kiya ka kiya laqi nana ma paru ba qpahun ka oda nii. Ado uxe ririh seediq ka sapah thmkuwan nii, ssmalu ta nii we ririh Utux Baro Tmninun Thmkuwan. 2Wada hiya kana beyax mu psramal king ssmalu qyqeya king, ging ssmalu qyqeya ging, limuk ssmalu qyqeya limuk, xiluy ssmalu qyqeya xiluy, qhuni ssmalu qyqeya qhuni, dungal we niqan btunux mtanah ma, btunux qrari, btunux mkrako ma btunux mgqwilung. 3Bobo na nii, ado smkuxul ku ba sapah thmkuwan Utux Baro, kiya ka psramal ku kana qyqeya dooyun, dungal we king ma ging sneku mu nanak we, wada mu sbege sapah thmkuwan Utux Baro mu. 4Kiya ka 30'00 tarantu king pneeyah Opir, 70'00 tarantu ging bale ngalan pdeping qnabil sapah thmkuwan. 5King we ssmalu qyqeya king, ging ssmalu qyqeya ging, dungal we kana qneepah pneeyah baga dseediq mkela meepah. Saya, ima ka maha tqqaras mege Utux Tmninun ho?”
6Kiya de mqaras ba mege kana ka pnswayan pusu rudan knkingal sapah, qbsuran knkingal pnswayan pusu rdrudan Israel, qbsuran mdudul 10'00 heyi ma 1'00 heyi, seediq qmlahang qqpahun qbsuran paru. 7Bnege daha ssmalu sapah thmkuwan Utux Baro we 50'00 tarantu ma 1 mang 80'00 talik king, 1 mang tarantu ging, 1 mang 80'00 tarantu limuk ma, 10 mang tarantu xiluy. 8Kana btunux qrari we wada skuun repun sapah thmkuwan Utux Tmninun. Yexiel seediq Gerson ka mpqlahang na. 9Ado tqqaras ba mege Utux Tmninun ka kana seediq nii de, mqaras kana ka seediq ma, mqaras bale ka Dawid uri.
Tmdahu Utux Tmninun ka Dawid
10Tmdahu Utux Tmninun berah kana seediq ka Dawid. Rmengo ka Dawid: “Utux Tmninun, Utux Baro nuIsrael pusu tama nami, tndhuun muuyas ani betaq knuwan ka isu! 11Utux Tmninun! Knparu, beyax, knledax, mbeyax mccebu, so knpruwan we nisu kana. Kana gaga karac baro ma bobo dxeral we nisu kana. Utux Tmninun! Nisu ka qlhangan, Isu we qbsuran paru ma qbsuran kana ani maanu. 12Pneyah sunan kana ka qnbleyaq ma pusu dnoi. Qmlahang su kana ani maanu ka isu. Sdoi su baga su ka paru beyax ma, mpeeyah baga su pkbeyax ma pkrana seediq. 13Utux Baro nami! Saya, mqaras miyan sunan ma, tmdahu miyan ngayan knledax su!
14Maanu ka yaku ma, maanu ka seediq mu, betaq so nii mqaras bale mege qnaras? Ado kana ani maanu we pneeyah sunan kana, wada miyan sbege sunan ka nangal miyan pneeyah baga su. 15Seediq miyan mkkesa elu, tnooda meniq berah su, mntena so rudan miyan cbeyo. Mntena saso ka ali eeniq miyan bobo dxeral ma uka ani maanu bbrihan na. 16Utux Tmninun, Utux Baro mu! Psramal miyan egu qyqeya, kiya ka ssmalu miyan sapah thmkuwan ririh ngayan su. Kana nii we pneeyah baga su, nnisu kana ka nii. 17Utux Baro mu! Klaun mu, mkela su qmita lhebun seediq, qrasun su ka msderux. Gisu mu spooda lhebun msderux mege kana qnaras nii. Saya, mqaras ku bale qmita tqqaras meyah mege sunan ka seediq su. 18Utux Tmninun, Utux Baro pusu nrudan miyan Abraham, Yijxaq, Israel! Braho misu, pniqi klaali so lnglungan nii ka lhebun seediq su, pskere lhebun daha mquri sunan. 19Braho misu bale, Selomoh laqi mu we, biqi drumuc kana lhebun na mpthei kari pnosa su, gaya ddaun, kari pndakar ma, mooda bale kana oda nii, spooda na pnsramal mu ssmalu na sapah thmkuwan.”
20Rmengo kana seediq ka Dawid: “Tndhui muuyas ka Utux Tmninun, Utux Baro namu!” Kiya de tndahu Utux Tmninun, Utux Baro pusu nrdrudan daha ma, thmuku Utux Tmninun mqbsuran paru ka dheya. 21So kusun, smapuh Utux Tmninun, mege snapuh ptbale ma snapuh psqama, 10'00 dapa balas, 10'00 baus miric rudu, 10'00 wawa miric ka dheya ma, mege snapuh sino dungal. Ririh seediq Israel we egu snapuh ka bnege daha uri. 22Ali ciida, dheya we mqaras bale mekan ma mimah berah Utux Tmninun.
Seediq we phyegun daha mqbsuran paru dungal ka Selomoh laqi Dawid, hrigan na abura tunux mqbsuran paru nuUtux Tmninun, dungal we hrigan na abura msapuh ka Cadoq uri. 23Kiya de rmirih tama na Dawid tleung tluungan bnege Utux Tmninun, mqbsuran paru ka Selomoh. Selomoh we msleelu bale ka noda na, mbahang heya kana ka Israel. 24Thei Selomoh qbsuran paru ka kana qbsuran mdudul, supi mpahung ma, lqlaqi Dawid. 25Utux Tmninun we pspruun na paru meniq berah seediq Israel ka Selomoh ma, knpruwan qbsuran paru bnege na heya we, mgkala ani ima qbsuran paru Israel.
Malu Qneepah Dawid
26Mqbsuran paru kana Israel ka Dawid laqi Yisay. 2740 knkawas kana ka qnbsranan paru kana Israel. 7 knkawas ka mqbsuran paru Xebron ma, 33 knkawas ka mqbsuran paru ka Yerusalem. 28Rudan bale ma mttuku ka knkawas na mhuqil ciida ma, wada mangal knledax ma qnbleyaq. Selomoh laqi na ka rmirih heya mqbsuran paru. 29Kndesan qneepah Dawid mqbsuran paru we, qtai! Gaga spatis patis ndaan Samuel seediq utux, patis Natan mpgeela kari ma, patis Gad seediq utux hiya. 30Gaga hiya kana ka ndaan na ma qnlhangan, malu noda na, ndaan na Israel ma, kana ndaan na dqlhangan bobo dxeral.
Currently Selected:
1 Nooda 29: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
