1 Samuel 9
9
Sterung Samuel ka Soro
1Niqan 1 seediq Binyamin, Qis ka ngayan na. Lqlaqi laqi Apix seediq Binyamin, lqlaqi laqi Bekorat, lqlaqi laqi Ceror ma, laqi Abiel. Heya we mkrkere ba heyi. 2Niqan 1 laqi rseno na ma, Soro kesun ka ngayan na. Mkkere ma mseediq ba. Uka ani ima mgkala heya ckceka seediq Israel. Hmrinas ahing na pntnaun ani ima ka knbragan na.
3Wada mgeedang ka duma dapa roba Qis tama Soro. Kiya de rmengo Soro laqi na: “Tutui, desi 1 tnqliyan osa migin dapa roba.” 4Soro we mkkesa hmrinas ddgiyaq Eprayim ma hmrinas dxeral Salisah we, ini daha slai. Mkkesa hmrinas Saalim ka dheya we, uka hiya ka dapa roba. Dungal we hmrinas dxeral Binyamin we, ini daha slai.
5Dehuk dxeral Cup de, rmengo tnqliyan snegul heya ka Soro: “Asi ta osa sapah di, Maha uxe pslhebun dapa roba ka tama mu ma, ita ka slhbenun na di.” 6Rmengo heya ka tnqliyan na: “Qtai! Niqan 1 seediq Utux Baro spruun seediq ka alang hini. Mpbale kana ka rnengo na. Sae ta hiya ma, nhuwa tmgesa elu ddaun ta ka heya.” 7Rmengo tnqliyan na ka Soro: “Qtai! Nasi ta mosa hiya, maanu ka bbege ta? Ppuqun ckceka lubuy ta qhdeun mekan kana di. Uka ka lnabu ta bbege seediq Utux Baro. Ye ta niqan mmaanu nana?” 8Cmiyuk dungal Soro ka tnqliyan: “Qtai! Nii baga mu ka 1 tnugspatan skere ging. Malu sbege ta seediq Utux Baro ma, so maha tmgesa elu ddaun ta ka heya.” 9Cuuxal, nasi meyah dmurun mesa Utux Baro ka Israel we, so nii ka rrengo daha: “Aguh! Nita mpgeela qmita hiya!” Ado mpgeela kari ka saya we, mpgeela qmita kesun daha cuuxal. 10Rmengo tnqliyan na ka Soro: “Malu ka kiya! Kiya de nita.” Kiya de mosa mquri alang gaga niqan seediq Utux Baro ka dheya.
11Steetu mcherus oosa alang ka dheya we, smterung dweewa mmeyah bubul qsiya. Kiya de rmengo dheya: “Gaga hini ka mpgeela qmita ho?” 12Cmiyuk ka dheya: “Niqan, qtai, gaga meniq berah namu saya. Ado mbege snapuh dgiyaq biciq hiya ali saya ka seediq. 13Mremux namu alang de, tgberah ini osa dgiyaq biciq mekan snapuh ciida ka heya han we, mpsterung namu heya. Ado ini dehuk ka heya we, uxe meekan ka seediq, asi ka mtara heya moda smbleyaq snapuh. Kiya ka tduwa mekan ka dseediq pnlawa. Osa baro saya! Ado mpsterung namu heya saya.” 14Kiya de steetu mosa alang kiya ka dheya ma, mpteme alang ciida, qtai! Gisu mquri dheya ka Samuel ma, mmaha steetu spuhan dgiyaq biciq ka heya.
15Ali berah mmeyah ka Soro ciida we, tena pgkela Samuel ka Utux Tmninun: 16“Ali kusun nnii we, mpskagul ku 1 seediq pneyah dxeral Binyamin meyah isu hini. Hrigi abura ka heya ma ngali qbsuran paru nuIsrael seediq mu. Mpdoi baga seediq mu peeyah baga seediq Peliset ka heya. Ado dehuk kenan ka diras seediq mu ma mpsbrinah ku dheya ka yaku.” 17Qmita Soro ka Samuel de, rmengo heya ka Utux Tmninun: “Qtai! Seediq nii ka rnengo mu sunan. Heya ka mpqlahang seediq mu.” 18Meniq rhengun alang mkkesa mosa berah Samuel ka Soro ma, rmengo: “Braho su tgsai miyan, gaga inu ka sapah mpgeela qmita?” 19Cmiyuk Soro ka Samuel: “Yaku ka mpgeela qmita. Eniq berah mu, geela mosa spuhan dgiyaq biciq hiya. Ado mptheyaq namu tleung kenan ali saya. Mgrebu kusun we mphaduc ku isu ma, rrengo mu sunan ka kana ooda ckceka lhebun su. 20Quri so duma dapa roba su wada mgedang cnkaxa we, iya pslhebun. Gaga slayan ka kiya di. Gaga pgsaun tmara kana seediq Israel we ima peni? Uxe gisu tmara isu ma kana tnsapah tama su peni?” 21Cmiyuk rmengo ka Soro: “Uxe ku tgbiciq bale seediq Binyamin ckceka pnswayan rudan Israel peni? Tnsapah mu we, uxe tgbiciq bale ckceka pnswayan rudan uri peni? Ma su dehuk rmengo so nii kari kenan ho?”
22Samuel we desun na sapah paru ka Soro ma tnqliyan na. Ptluungun na tgbaro tluungan ckceka seediq pnlawa. Yaa ba 30 heyi ka seediq pnlawa. 23Rmengo mphpure ka Samuel: “Heyi snapuh bnege mu sunan we, seku mesa ku. Saya de, adis hini.” 24Kiya de mangal heyi bteriq ma duma ssiyo heyi bteriq ka pnhpure ma, psaun na berah Soro. Rmengo ka Samuel: “Qtai! Rnangi mu we gisu mu psaun berah su di. Uqi! Ado pnsramal sunan meeniq ali nii kiya. So su maha rmengo, yaku ka pnlawa seediq nii.”
Ali ciida, mtheyaq tleung Samuel ka Soro.
Hrigan Abura Samuel Ngalan Qbsuran Paru ka Soro
25Peeyah spuhan dgiyaq biciq hmeruc mosa mremux alang ka dheya de, mpprengo bobo dnamux hiya ka Samuel ma Soro. 26Mgrebu ba so kusun mtutuy ka dheya. Samuel we mlawa Soro gaga dnamux: “Tutuy! Klaun mu hmaduc sunan.” Mtutuy ka Soro ma mtheyaq Samuel mosa nganguc ka dheya. 27Hmeruc dehuk muxi alang de, rmengo Soro ka Samuel: “Rngagi pgeela posa ka tnqliyan su. Bobo wada ka tnqliyan su de, eniq tikuh hini ka isu. Rngagun misu nkari Utux Baro.”
Currently Selected:
1 Samuel 9: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
