1 Samuel 8
8
Mesa Pheyu Qbsuran Paru ka Dseediq Israel
1Rudan ka Samuel, kiya de phyegun daha mpsgao Israel ka lqlaqi na. 2Yoel kesun ka tgqbsuran laqi ma, Abiyah kesun ka swai. Dheya we ma psgao meniq Beerseba hiya. 3Laqi na we ini puyu elu na ma, wano pila lnglungun daha. Mangal lnabu daha ma ini dehuk psgeegan.
4Kiya de psseli Ramah kana ka rdrudan Israel ma, meyah Samuel hiya. 5Rmengo heya: “Qtai! Rudan su da. Laqi su we, ini oda elu su. Saya, braho su phyegi miyan 1 qbsuran paru mpqlahang menan, mntena so qlhangan.” 6Ini qqaras rmengo phyegi miyan 1 qbsuran paru mpqlahang menan ka Samuel. Kiya de dmurun Utux Tmninun ka heya. 7Rmengo Samuel ka Utux Tmninun: “Snoli so kana kari rnengo seediq sunan. Ado uxe isu qmada sunan ka dheya, yaku ka sqada daha. Ini sruwa yaku ka mpqbsuran paru dheya. 8Speeyah ku daha dmnudul ku platac dheya peeyah Micrayim betaq saya, ida qmada kenan ka dheya ma, mosa thmuku utux icil. Mntena so noda daha cuuxal. Saya we gisu so nii moda sunan dungal. 9Saya, asi qbahang kari daha. Kiya we sdhegi ba rmengo ka dheya. Rngagi ka dheya bobo na qbsuran paru we maha huwa mesa qmlahang dheya.”
10Samuel ge, srengo na dseediq nii mesa pheyu qbsuran paru ka kana rnengo Utux Tmninun. 11Rmengo ka heya: “Qbsuran paru mpqlahang yamu we, maha so nii ooda na. Heya we, mpskagul laqi namu mpgeriq rulu, dmudul dapa dmay ma, mtalang berah rulu mccebu na. 12Heya we mpheyu 10'00 mdudul ma 50 mdudul na. Mosa tmabul qnpahan na, qmburung pnhmaan na. Mpsalu qyqeya mccebu na ma qyqeya xiluy bobo rulu mccebu na. 13Heya we mplawa lqlaqi mqedil namu, mpsmalu geluq skenux, phpure uqun ma, muduh pang na. 14Maangal malu ba qnpahan, qnpahan lipas ma, qnpahan curung namu. Sbege na dqbsuran mdayo heya. 15Uqun namu ma kana gnheyi pneeyah qnpahan lipas we, asi ka mangal tgkingal tnugmxalan bbege na dqbsuran mdayo heya ma tnqliyan na. 16Ngalun na ka tnqliyan namu ma, mkkere rsriso ma dapa roba namu mqeepah heya. 17Rahul miric namu we, asi ka mangal tgkingal tnugmxalan ka heya. Yamu we maha namu mtnqliyan na uri. 18Ali ciida, ririh qbsuran paru gneegan namu, mprengac namu dmurun Utux Tmninun ciida. Kiya de uxe mciyuk yamu ka Utux Tmninun ali ciida.”
19Kiya de ida ini qbahang kari Samuel ka seediq ma rmengo: “Uxe! Ida miyan asi ka niqan 1 qbsuran paru mpqlahang menan. 20So maha mntena kana qlhangan niqan qbsuran paru mpqlahang, dmudul ma moda mccebu menan.” 21Mbahang kana kari daha nii ka Samuel de, srengo na Utux Tmninun. 22Rmengo Samuel ka Utux Tmninun: “Pntnai so kari daha phyegi 1 qbsuran paru daha.” Rmengo seediq Israel ka Samuel: “Osa, brinah alang txtaxa namu nanak!”
Currently Selected:
1 Samuel 8: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
