1 Samuel 10
10
1Mangal rusuq abura ka Samuel ma, hrigan na tunux Soro. Tmunguh heya ma rmengo: “Uxe su mqbsuran paru pusu dnoi ma hrigan su na abura Utux Tmninun ka isu peni? 2Bobo su mlatac peeyah hini, meeniq su Celcax dxeral Binyamin smdaling habung Rajie we, mpsterung su 2 seediq. Mprengo sunan ka dheya: ‘Gaga slayan ka dapa roba gaga su gimun di. Qtai! Uxe mpslhebun dapa roba ka tama su ma, isu ka gaga na slhbenun. Rmengo: Huwa mu kesun ka laqi mu di?’ 3Pquri berah mkkesa peeyah hiya, betaq su qhuni raus Tabor hiya de, mpsterung su 3 seediq mpsteetu mosa thmuku Utux Baro Beytel: 1 we madis 3 wawa miric, 1 we madis 3 pang ma, 1 we madis 1 lubuy sino. 4Mpthmuku sunan ka dheya ma, mbege 2 pang sunan. Kiya de angal peeyah baga daha. 5Bobo na nii, osa dgiyaq Utux Baro, niqan supi Peliset ka hiya. Mremux su alang ciida we, mpsterung su 1 qpuruh mpgeela kari hmeruc peeyah spuhan dgiyaq biciq. Plaale na we tmubu tlbuan, phrenang tatuk hmuril, mnderang, phrenang tmubu heyu. Dheya we pgeela rmengo kari kana daha. 6Bgihur Utux Tmninun we maha paru ba nngalan lhebun sunan. Kiya de maha su mntena dheya mprengo su pgeela kari ma, kmpriyux su bgurah seediq. 7Pnskraya nii we meyah heyi su. Kiya de naaguh mosa meepah qpahun su. Ado gaga theyaq sunan ka Utux Baro. 8Mplaale su kenan mosa Gilgal. Qtai! Maha ku mege snapuh psqmaan ma snapuh ptbale isu hiya. Asi su ka tmara 7 ali, tara ku hiya meeyah ku tmgesa ddaun su.”
Rmengo Kari Mpgeela ka Soro
9Mswaye peeyah Samuel ka Soro. Kiya de sbgrahan Utux Baro ka heya ma, sbege na 1 bgurah lhebun. Wada truura ba moda kana ali ciida. 10Meyah betaq dgiyaq kiya ka dheya. Qtai! Gisu nii ka 1 qpuruh dmpgeela kari smterung Soro. Bgihur Utux Baro we paru ba mtheyaq heya. Kiya de rmengo kari mpgeela ckceka mpgeela kari ka heya. 11Dseediq mkela ma qmnita Soro we, qtai! Gisu mtheyaq mpgeela kari rmengo kari mpgeela ka heya. Mpprengo ka dseediq: “Smnterung maanu ka laqi Qis? Gaga ckceka mpgeela kari ka Soro uri peni?” 12Rmengo ka 1 seediq tndxeral hiya: “Ima ka tama na dseediq nii?” Kiya de niqan ka kari pnangal daha hiya: “Gaga ckceka mpgeela kari ka Soro peni?” 13Mhedu rmengo kari mpgeela ka Soro de, mosa spuhan dgiyaq biciq ka heya.
14Rmengo Soro ma tnqliyan na ka mtswai tama Soro: “Mnosa namu inu?” Rmengo ka heya: “Mnosa miyan migin dapa roba. Kiya we ini nami slai de, mosa nami Samuel hiya.” 15Rmengo ka mtswai tama Soro: “Tgsai ku hiya, maanu rnengo na yamu ka Samuel?” 16Rmengo mtswai tama na ka Soro: “Truura rmengo yami ka heya, wada slayan ka dapa roba.” Quri so oda mpqbsuran paru rnengo Samuel we, ini na rngagi mtswai tama na.
Blebil Qreti Mqbsuran Paru ka Soro
17Samuel we, pssliun na Utux Tmninun Micpah hiya ka seediq Israel. 18Rmengo seediq Israel ka heya: “So nii ka rnengo Utux Tmninun, Utux Baro nuIsrael: ‘Yaku ka dmnudul Israel mnlatac Micrayim ma, dmnoi ku baga namu plhelah baga seediq Micrayim ma, plhelah baga dqlhangan dseediq pnsqrinuc yamu.’ 19Ali saya, qmada namu Utux Baro dmnoi baga yamu plhelah kana mqraqil ma pntraqil. Betaq namu rmengo heya: ‘Braho su phyegi miyan 1 qbsuran paru mpqlahang menan.’ Saya, asi namu ka spooda pnswayan rudan ma tnsapah mheyu berah Utux Tmninun.”
20Kiya de Samuel we pyahun na berah meyah blebil qreti ka knkingal pnswayan rudan Israel ma, geegan blebil mangal we pnswayan seediq Binyamin. 21Bobo na de, pyahun na berah ka knkingal sapah pnswayan rudan Binyamin ma, geegan blebil mangal we, tnsapah sapah Matriy. Dungal we blebil betaq laqi Qis ka Soro. Migin heya ka seediq we ini daha slai ka heya. 22Smiling Utux Tmninun ka dheya: “Gisu meyah hini ka seediq kiya peni?” Rmengo ka Utux Tmninun: “Qtai! Gaga tgleing ckceka gtuwan qyqeya ka heya.” 23Tmalang mosa mangal Soro ka dheya. Mheyu ckceka seediq ka heya ma, spooda na ahing knparu kana ka seediq. 24Rmengo seediq ka Samuel: “Gisu namu qtaan ka seediq gnao Utux Tmninun di! Ckceka seediq we uka ka mtduwa so mntena heya.” Mddiras rmengo ka kana seediq: “Tai so mpkuudus ani betaq knuwan ka qbsuran paru!”
25Samuel ge, ndwaun na rmengo seediq ka bneku pndakar qbsuran paru ma, spatis na patis uri. Kiya de psaun na berah Utux Tmninun. Bobo na de, pbrnahun na ka dseediq ma mquri sapah daha nanak ka dheya. 26Soro we mquri Gibeah sapah na nanak ka heya. Niqan ka mkkere heyi gisu dhekan plgelu lnglungan Utux Baro ka seediq smnegul Soro. 27Kiya de, rmengo ka duma uka bale stmaan: “Mpdehuk dmoi baga ita ka seediq nii peni?” Kiya de ini daha psai doriq ma ini daha biqi lnabu. Kiya we mgmelux ka Soro.
Currently Selected:
1 Samuel 10: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
