1 Samuel 7
7
1Kiya de meyah ka seediq Qiryat Yearim ma, spheal daha pspkteetu ka kulu pnsdhegan Utux Tmninun. Sphean daha psteme sapah Abinadab ma, psnakun daha ka Elajar laqi na mpqlahang kulu pnsdhegan Utux Tmninun. 2Peeyah pniqan daha Qiryat Yearim hiya ka kulu pnsdhegan we, wada bsiyaq bale ka ali ma hmrinas 20 knkawas di. Kana Israel we naqah kuxul lmingis quri Utux Tmninun ka dheya.
Qmlahang Israel ka Samuel
3Rmengo kana seediq Israel ka Samuel: “Nasi namu peeyah kana lhebun namu mqquri Utux Tmninun de, asi ka sqada namu ka utuutux icil qlhangan ma Astoret. Psramal lhebun namu mquri Utux Tmninun ma, wano heya ka qpahi. Kiya de mdoi baga yamu mplatac baga seediq Peliset ka heya.” 4Kiya de seediq Israel we, sqada daha ka Baal ma Astoret. Wano ba Utux Tmninun ka thmkuwan daha.
5Rmengo ka Samuel: “Psseli mosa Micpah hiya ka kana seediq Israel. Klaun mu dmurun Utux Tmninun quri dheya.” 6Kiya de mosa msseli Micpah hiya ka dheya. Mosa bubul qsiya ma, sheruy daha berah Utux Tmninun. Ali ciida, ptgaya ini ekan ka dheya. Rmengo: “Wada miyan qnuuqu noda Utux Tmninun.” Kiya de ma psgao dseediq Israel meniq Micpah hiya ka Samuel. 7Seediq Peliset we, mbahang gaga msseli Micpah ka seediq Israel de, meyah kmremux Israel ka dqbsuran mdudul Peliset. Mbahang ka dseediq Israel de, miicu seediq Peliset ka dheya. 8Rmengo Samuel ka seediq Israel: “Tai so uxe su mpsange dmurun Utux Tmninun, Utux Baro miyan quri yami. So maha dmoi baga menan peeyah baga Peliset ka Utux Tmninun.” 9Kiya de Samuel we, mangal 1 wawa miric, snapuh na psqama kana bbege na Utux Tmninun. Ririh seediq Israel dmurun Utux Tmninun. Cmiyuk heya ka Utux Tmninun. 10Gisu mege snapuh ciida ka Samuel, meyah mccebu Israel ka seediq Peliset. Ali ciida, Utux Tmninun we, peeyah bruwa ma paru riyung ka hrenang na. Kiya ka wada trehak ma, ini baka berah seediq Israel ka seediq Peliset. 11Mlatac peeyah Micpah ka seediq Israel, mhero dseediq Peliset ma phuqil dheya betaq toma Bet Kor.
12Samuel we, mangal 1 btunux phyegun na cenga Micpah ma Sen hiya. Eben Haejer kesun na tmngayan ka btunux kiya ma, rmengo: “Betaq saya, ida gaga dmayo ita ka Utux Tmninun.” 13So kiya de, wada ini baka ka seediq Peliset, betaq ini eyah kmremux ayus qlhangan Israel ka dheya. Pkelu muudus ciida ka Samuel we, cmebu seediq Peliset ka baga Utux Tmninun. 14Lualang gneeluk na pneeyah Israel ka dseediq Peliset we, peeyah Eqron betaq Gat wada pbrnahun Israel kana da. Israel we wada na pbrnahun mangal kana ka lualang pnaayus dxeral peeyah baga seediq Peliset. Peeyah ali ciida we, mmsbleyaq msterung ka Israel ma dseediq Amori.
15Kana kndesan Samuel we mooda psgao Israel. 16Knkingal knkawas ida moda mkkesa qmita Beytel, Gilgal ma, Micpah ka heya. Mooda psgao dseediq Israel gaga meniq dxeral hini. 17Bobo na de, mosa Ramah. Ado gaga hiya ka sapah na. Psgao seediq Israel meniq hiya ka Samuel. Kiya uri we smalu 1 spuhan Utux Tmninun meeniq hiya.
Currently Selected:
1 Samuel 7: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
