1 Samuel 6
6
Pbrinah Kulu Pnsdhegan
17 idas nniqan na dxeral Peliset hiya ka kulu pnsdhegan Utux Tmninun. 2Mlawa dmsapuh ma dmpsbunul ka seediq Peliset ma rmengo: “Huwa ta kesun ka kulu pnsdhegan Utux Tmninun nii? Tgsai miyan huwa ta kesun pbrinah nniqan na ka kulu pnsdhegan nii?” 3Rmengo ka dheya: “Pbrnahun namu hmaduc kulu pnsdhegan Utux Baro nuIsrael ciida we, iya bale ini adis maanu ka baga namu. Asi namu ka madis lnabu namu dnahur qnquwan noda. Kiya de pkmalu namu di. Kiya uri ma maha namu klaun hmuwa ma ini qduriq peeyah yamu ka baga na.” 4Rmengo ka seediq Peliset: “Manu ka bbege ta lnabu dnahur qnquwan noda di ho?” Rmengo ka dheya: “Pdai kneegu qbsuran mdudul Peliset, bege 5 so baso snmalu king ma 5 so qolic snmalu king. Ado qbsuran paru namu we mntena so nii sntrengan daha uri. 5Slmei ka hnyegan baso namu ma, hnyegan qolic mpseelaq dxeral. Kiya uri ma pqrii mege Utux Baro nuIsrael ka knledax, kiya de so maha slokah hari ka baga na meeniq yamu, utux namu ma, dxeral namu. 6Ma mkere ka lhebun namu, mntena so seediq Micrayim ma Paroh ka knkere lhebun namu ho? Wada sgcuqi bale pqraqil dheya ka Utux Baro ma, seediq Micrayim we wada daha plaxan ka seediq Israel. Kiya de wada mlatac ka dheya da peni? 7Saya yamu we, smlei 1 bgurah rulu, adis 2 bubu dapa uxe pnaapa ani maanu ma gaga pnuhun nunuh nana, psai kudo rulu ma, pqdriqi peeyah bubu dapa pqrii sapah ka wawa dapa. 8Posa rulu baro ka kulu pnsdhegan Utux Tmninun. Psai kulu psaun toma hiya qyqeya king ddahur qnquwan noda. Posa ssiyo kulu pnsdhegan ma, psai ka kulu ma posa ka rulu da. 9Qtai bale ka yamu, nasi msderux hmrinas ayus dxeral Israel betaq Bet Semes de, paru pnqraqil nii we, bale ba bnege na heyi ta ka Utux Tmninun. Nasi uxe di, maha ta klaun uxe baga na ka cmebu kenan ma, mndungus ida so ooda ta nanak ka nii.”
10Muyu so nii mooda ka seediq Peliset. Mangal 2 bubu dapa ma psai daha kudo rulu ma, shetur daha sapah truma ka wawa dapa na. 11Psaun daha rulu baro ka kulu pnsdhegan Utux Tmninun ma kulu gaga psaan qolic snmalu king ma hnyegan baso snmalu king. 12Msderux mkkesa elu paru ka dapa. Mkkesa ma moda mlawa meniq elu mquri Bet Semes. Ini bale kridil. Smnegul bukuy ka dmqbsuran mpdudul Peliset betaq ayus dxeral Bet Semes. 13Ciida, gisu qmburung mugi brenux hiya ka seediq Bet Semes. Qtaan daha ka kulu pnsdhegan de, mqaras riyung smterung ka dheya. 14Dehuk qnpahan Yehosua seediq Bet Semes hiya ka rulu de, msange hiya da. Gaga hiya we, niqan 1 paru ba btunux. Ceexun daha ka rulu ma, psqmai daha smapuh mege Utux Tmninun ka 2 bubu dapa. 15Sladu dseediq Lewiy ka kulu pnsdhegan Utux Tmninun ma, kulu gaga psaan qyqeya king ma, psaun daha bobo btunux. Ali ciida mege snapuh psqmaan ka seediq Bet Semes. Dungal we mege duma snapuh Utux Tmninun ka dheya. 16Qmnita so nii ka 5 qbsuran mdudul Peliset de, mpbrinah Eqron ali ciida.
17Spuhan daha qnquwan noda seediq Peliset bbege daha Utux Tmninun ka hnyegan baso king we so nii: 1 ka nuAsdod, 1 ka Ajah, 1 ka nuAsqelon, 1 ka Gat ma, 1 ka nuEqron. 18Bnege daha qolic snmalu king we mndungus alang dqbsuran mpdudul seediq Peliset. Kiya ka paru lualang mbeyax ma lualang ma, paru btunux. Paru btunux nii we, kiya ka pniqun daha kulu pnsdhegan Utux Tmninun. Betaq saya, ida gaga meniq qnpahan Yehosua seediq Bet Semes hiya na.
Meniq Qiryat Yearim ka Kulu Pnsdhegan
19Phuqil seediq Bet Semes ka Utux Tmninun. Ado qmita kulu pnsdhegan na ka dheya. Wada 70 heyi ka wada phqilun. Ado gisu phuqil paru riyung dheya ka Utux Tmninun de, naqah kuxul lmingis ka seediq da. 20Rmengo ka seediq Bet Semes: “Ima ka tduwa mheyu berah Utux Tmninun, kiya ka Utux Baro mrtaso nii ho? Mpeeyah ita hini ka kulu pnsdhegan nii de hadun ta so inu ho?” 21Kiya de smkagul seediq mosa seediq Qiryat Yearim ka dheya, rmengo: “Seediq Peliset we pbrinah daha ka kulu pnsdhegan Utux Tmninun. Yahi smterung mangal ka kulu pnsdhegan. Posa yamu hiya!”
Currently Selected:
1 Samuel 6: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
