1 Samuel 5
5
Meeniq Seediq Peliset ka Kulu Pnsdhegan
1Seediq Peliset we gneeluk mangal kulu pnsdhegan Utux Baro peeyah Eben Haejer desun daha betaq Asdod. 2Seediq Peliset we gneeluk kulu pnsdhegan Utux Baro, desun daha sapah thmkuwan Dagon ma, pniqun daha ssiyo Dagon. 3So kusun de, mtutuy mgrebu ba ka seediq Asdod. Qtai! Gisu mtakur berah kulu pnsdhegan Utux Tmninun ka Dagon. Dqeras na we tgtemaq dxeral. Kiya de pstoyun daha ka Dagon ma phyegun daha nniqan na. 4So kusun dungal, mtutuy mgrebu ba ka dheya. Qtai! Gisu mtakur berah kulu pnsdhegan Utux Tmninun ma, tgtemaq dxeral ka dqeras na. Kiya uri we tunux ma daha baga Dagon we, mgerung bobo eruc rhengun. Wano ba msngari heyi Dagon. 5Kiya de msapuh Dagon ma kana mnremux sapah thmkuwan Dagon hiya we, ini remux rhengun sapah thmkuwan Dagon dseediq Asdod betaq saya.
6Baga Utux Tmninun we scqiyan na pqraqil ka dseediq Asdod. Pkcugun na ma pniqan na baso ka dseediq Asdod ma mtqiri na hiya. 7Qmita so nii ka dseediq Asdod de rmengo: “Iya pniqi ita hini ka kulu pnsdhegan Utux Baro nuIsrael. Ado baga na we, gisu pqraqil bale ita ma Dagon utux ta.” 8Kiya de smkagul seediq ma, psseli dqbsuran mdudul Peliset ma rmengo dheya: “Huwa ta kesun ka kulu pnsdhegan Utux Baro nuIsrael ho?” Cmiyuk ka dheya: “Hrigo ta Gat ka kulu pnsdhegan Utux Baro nuIsrael.” Kiya de hrigun daha hiya ka kulu pnsdhegan Utux Baro nuIsrael. 9Bobo hrigun hiya de, baga Utux Tmninun we cmebu alang kiya. Kiya de miicu riyung ka dseediq alang kiya ma, pniqan na baso kana peeyah rudan betaq laqi. 10Kiya de hadun daha Eqron ka kulu pnsdhegan Utux Baro. Dehuk Eqron ka kulu pnsdhegan Utux Baro de, tddiras mlawa ka seediq Eqron: “Gisu daha hdilun ita hini ka kulu pnsdhegan Utux Baro nuIsrael we, meyah pphuqil yaku ma dseediq ta!” 11Kiya de smkagul seediq mosa mlawa dqbsuran mdudul Peliset ma rmengo: “Pbrnaho ta hmaduc nniqan na ka kulu pnsdhegan Utux Baro nuIsrael. Kiya de so uxe mphuqil yaku ma dseediq mu!” Ado paru ba cnebu na alang kiya ka baga Utux Baro, kiya de kniicu hhuqil we stenge kana alang hiya. 12Ini huqil na we, gisu prqilun baso. Betaq karac baro ka rengac kana alang.
Currently Selected:
1 Samuel 5: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
