1 Samuel 4
4
1Mkgarang kana Israel ka kari Samuel.
Glekun Maangal ka Kulu Pnsdhegan
Mosa mccebu seediq Peliset ka seediq Israel ma pkobu Eben Haejer. Seediq Peliset we pkobu Apeq. 2Psramal mheyu mccebu quri seediq Israel ka seediq Peliset. Mccebu ciida ka dheya we, ini baka berah seediq Peliset ka seediq Israel. Seediq Peliset we wada phuqil 40'00 heyi daha ciida. 3Mpbrinah kobu daha ciida, rmengo ka rdrudan Israel: “Hmuwa Utux Tmninun we spooda tana ini baka berah seediq Peliset ali saya ho? Kdago ta peeyah Siylo betaq ita hini ka kulu pnsdhegan Utux Tmninun. Meeniq ckceka ta de, maha dmoi baga ita peeyah qapal baga pais ta ka heya.” 4Kiya de smkagul seediq mosa Siylo hiya, desun daha peeyah hiya ka kulu pnsdhegan Utux Tmninun Mdoi Kana Supi gaga tleung bobo kirubing. Mtheyaq smnegul meyah kulu pnsdhegan Utux Baro ka Xopniy ma Pinexas 2 laqi Eriy.
5Dehuk ckceka kobu ka kulu pnsdhegan Utux Tmninun de, tddiras mqaras kana ka Israel ma, ani dxeral mlgelu kana. 6Mbahang diras qaras hrenang ka seediq Peliset de, rmengo: “Hmuwa nii paru tddiras mqaras ka ckceka kobu seediq Hiburu ho?” Klaun daha gisu dehuk ckceka kobu daha ka kulu pnsdhegan Utux Tmninun. 7Kiya de miicu ka seediq Peliset ma rmengo: “Gaga meyah ckceka kobu daha ka duutux da.” Rmengo dungal: “Smtali ta bale! Nuuka betaq saya ka noda so nii. 8Smtali ta bale! Ima ka tduwa dmoi baga ita pqduriq peeyah baga utux paru beyax nii ho? Smnebuc Micrayim lmlamu pngqraqil na dheya meniq tadus brenux hiya we, kiya ka utux nii. 9Seediq Peliset! Tkkere ta ma, krseno ta bale. So ta uxe mtnqliyan seediq Hiburu ka ita, mntena tnqliyan ta ka dheya. Krseno bale ka yamu ma mpccebu ta dheya.” 10Kiya de mosa mccebu ka seediq Peliset. Ini baka ka seediq Israel ma qduriq mquri sapah daha nanak ka dheya. Hbaro bale ka wada phqilun. Wada mtakur ka supi Israel we 3 mang. 11Wada daha gleekun maangal ka kulu pnsdhegan Utux Baro ma, wada daha phqilun uri ka Xopniy ma Pinexas 2 laqi Eriy.
Hnqilan Eriy
12Niqan 1 seediq Binyamin qnduriq peeyah pnccbuwan hiya. Msgaliq ka lukus na ma, reesun na qbulic ka tunux na meyah Siylo ali ciida. 13Dehuk ciida de, qtai! Gisu tleung ssiyo elu ma smkawe ka Eriy ma, csslhebun quri kulu pnsdhegan Utux Baro. Mosa mremux alang ma pgkela rmengo ka seediq kiya. Kiya de mdiras mlawa kana ka seediq alang. 14Mbahang hrenang diras ka Eriy de, rmengo: “Maanu ka hrenang ddiras nii ho?” Meeyah nhari rmengo Eriy ka seediq kiya. 1598 knkawas na ciida ka Eriy. Asi mpahung doriq na ma ini dehuk qmita. 16Rmengo Eriy ka seediq kiya: “Pneyah ku pnccbuwan hiya ka yaku. Hani ku qnduriq pneeyah mccebu hiya saya.” Rmengo ka Eriy: “Laqi mu, gaga hmuwa di?” 17Rmengo ka mprengo nii: “Wada qduriq peeyah berah seediq Peliset ka seediq Israel. Ckceka seediq we hbaro riyung wada phqilun! Xopniy ma Pinexas 2 laqi su we wada mhuqil uri da. Ani kulu pnsdhegan Utux Baro we wada glekun mangal uri!” 18Betaq ba rmengo kulu pnsdhegan Utux Baro ka seediq nii de mspaux bukuy peeyah tnluungan na ssiyo rhengun alang hiya ka Eriy. Asi kgerung ka nduyung na ma mhuqil. Ado rudan bale ka heya ma knchedil ba ka heyi na. 40 knkawas ma psgao na Israel ka heya.
Hnqilan Mqedil Pinexas Mqrinuc
19Smdaling ptingun na laqi ka mqedil Pinexas ina Eriy ma mbahang wada gleekun mangal ka kulu pnsdhegan Utux Baro ma, wada mhuqil kana ka baki ma rseno stkemu hnlidan knarux kmtuting na laqi. 20Smdaling mhuqil ciida, meyah rmengo heya ka mqedil mnheyu ssiyo na: “Iya kiicu! Mntuting su laqi rseno di.” Ini squwaq ka heya ma, ini na psai lhebun ka kari. 21Ikabod kesun na tmngayan ka laqi ma rmengo: “Wada qduriq peeyah Israel ka knledax di! Ado wada glekun mangal ka kulu pnsdhegan Utux Baro ma, wada mhuqil kana ka baki na rseno na di.” 22Rmengo dungal: “Wada qduriq peeyah Israel ka knledax di! Ado wada gleekun mangal ka kulu pnsdhegan Utux Baro di.”
Currently Selected:
1 Samuel 4: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
