1 Samuel 3
3
Mtqita Samuel ka Utux Tmninun
1Samuel laqi kiya we qmeepah berah Utux Tmninun. Eriy ciida, uka hari ka kari Utux Tmninun ma so pnqita tuutux uri. 2Ciida, mntaqi nniqan na nanak ka Eriy. Prading msurung ka doriq na ma, ini qita. 3Ini kpahung ka camo Utux Baro na, Samuel we gaga mtaqi sapah Utux Tmninun. Gaga meniq hiya ka kulu pnsdhegan Utux Baro. 4Mlawa Samuel ka Utux Tmninun. Cmiyuk ka Samuel: “Nii ku hini!” 5Tmalang mosa Eriy hiya ka heya ma rmengo: “Mnlawa su kenan ho? Nii ku hini.” Rmengo ka Eriy: “Ini ku plawa sunan, osa mtaqi.” Kiya de mosa mtaqi da. 6Mlawa Samuel dungal ka Utux Tmninun. Mtutuy ka Samuel ma, mosa Eriy hiya ma rmengo: “Mnlawa su kenan ho? Nii ku hini.” Rmengo ka Eriy: “Ini ku plawa sunan, osa mtaqi.” 7Ciida, ini kela Utux Tmninun ka Samuel han, kari Utux Tmninun we ini mpquri heya ptuura na. 8Mn3 mlawa Samuel ka Utux Tmninun. Mtutuy ka Samuel, mosa Eriy hiya ma rmengo: “Mnlawa su kenan ho? Nii ku hini.” Eriy we, hani mkela gisu mlawa laqi nii ka Utux Tmninun. 9Rmengo Samuel ka Eriy: “Osa mtaqi. Nasi mlawa sunan dungal we, asi rengo: ‘Utux Tmninun! Braho su rengo kenan, gisu mbahang ka tnqliyan su!’” Kiya de mosa mtaqi tnqiyan na dungal ka Samuel.
10Meyah mheyu ma rmengo mntena plaale ka Utux Tmninun: “Samuel! Samuel!” Cmiyuk ka Samuel: “Braho su rengo, gisu mbahang ka tnqliyan su!” 11Rmengo Samuel ka Utux Tmninun: “Qtai! Mooda ku 1 oda ckceka Israel. Kana mnbahang we maha mbahang kana birac daha. 12Kana rnengo mu kari quri tnsapah Eriy we, dehuk ka ali de, maha bale ba mooda heyi Eriy peeyah pnrdingan betaq bukuy. 13Rmnengo ku heya, ida ku mpkdira tnsapah na betaq ani knuwan. Ado mnkela ba mnoda naqah ma tmsiiyax Utux Baro ka laqi na we, ini na hteri ka dheya. 14Maanu so kiya de, mpsdehu ku quri Eriy: ‘Qnquwan noda tnsapah Eriy we, kiya ka snapuh tnbugan ma snapuh bnege. Dungal we ini tduwa psberih pririh ka kiya.’”
15Mtaqi betaq lmedax karac ka Samuel. Kiya de mosa rmaguh sapah Utux Tmninun ka heya. Miicu riyung ka Samuel ma, ini na rngagi Eriy ka qnita na so tuutux nii. 16Mlawa Samuel ka Eriy: “Laqi mu Samuel!” Rmengo ka Samuel: “Nii ku hini!” 17Rmengo ka Eriy: “Rmnengo manu sunan ka heya we, iya ku hiya liingi. Nasi su sgleing ani 1 kari ka kari rnengo na de, tai so pcqiun su na pkdira ka Utux Baro.” 18Kiya de Samuel we srengo na Eriy ka kana kari ma, ini na liingi. Rmengo ka Eriy: “Utux Tmninun ka heya, tai so mpuyu nanak ntaan na malu mooda qmeepah.”
19Mdakil ka Samuel. Utux Tmninun we mtheyaq heya ma kana rnengo na we, uka ka ini na dai. 20Kana seediq Israel, peeyah Dan betaq Beerseba we mkela kana, Utux Tmninun we pnheyu Samuel ma mpgeela kari. 21Tqita meeniq Siylo hiya dungal ka Utux Tmninun. Ado Utux Tmninun we, spooda na kari na ptuura heya nanak quri Samuel meniq Siylo hiya.
Currently Selected:
1 Samuel 3: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
