1 Samuel 30
30
Mccebu Dseediq Amaleq
1Tg3 ali, betaq Ciqlag ka Dawid ma dseediq na. Tena wada glekun seediq Amaleq ka Negeb ma Ciqlag. Dheya we wada daha sgliqun ka Ciqlag ma psqmaun daha puniq. 2Glekun daha madis kana ka dmqedil ma dseediq toma alang hiya. Ani 1 ini daha phqili ma desun daha kana. Kiya de mquri berah mosa dungal. 3Dehuk alang kiya ka Dawid ma dseediq na. Qtai! Wada psqmaun ka alang ma, dmqedil ma dlqlaqi daha we wada daha desun. 4Kiya de asi tgdiras lmingis betaq uka beyax daha lmingis ka Dawid ma dseediq smnegul heya. 5Wada desun ka 2 mqedil Dawid. Kiya ka Axinoam seediq Yijreel ma Abigayil nmqedil Nabal meeniq Karmel uri. 6Mtbeyax bale ka Dawid. Ado lqlaqi daha sqnaqah daha kuxul ka dseediq de, mkdmoi btunux phuqil Dawid ka dheya. Dawid we smtama Utux Tmninun, Utux Baro na plekuh heya.
7Rmengo Ebyatar msapuh laqi Aximelek ka Dawid: “Adis hini ka ipudi!” Ebyatar ge, saadis na heya ka ipudi. 8Smiling Utux Tmninun ka Dawid: “Mpsdurak ku dseediq nii we, ya mu sklaun na?” Rmengo heya ka Utux Tmninun: “Sai smdurak. Ssklaun su ma, ddooyun su baga mbrinah ka dheya.” 9Kiya de mlatac ka Dawid. Heya ma dseediq 6'00 heyi smnegul heya we betaq yayung Besor. Duma ini tduwa mosa na we, htiyan daha hiya. 10Dawid we, maadis 4'00 heyi mosa smdurak ka dheya. Niqan 2'00 heyi mowic, kiya ka ini ntaril yayung Besor meeniq hiya.
11Smdiyal 1 seediq Micrayim meeniq dxeral nrao ka 4'00 heyi. Kiya de desun daha berah Dawid, pqdalun daha pang ma, pmahun daha qsiya. 12Dungal we sbege daha 1 pang nunuh ma 2 puyuy pang lipas. Mnekan ka heya de, mbeyax ka heya di. Ado 3 ali 3 rabi ini imah ma ini ekan ka heya. 13Smiling heya ka Dawid: “Seediq su diima ka isu? Pneeyah su inu?” Rmengo ka heya: “Driso ku Micrayim ka yaku ma pnttnqliyan ku seediq Amaleq. Ado mnnarux ku pneeyah scnkaxa, kiya de htiyan ku qmada tnpusu sapah mu. 14Gmneluk miyan tgtruma Keretiy ma dxeral Yehudah ma, tgtruma dxeral Kaleb. Dungal we pnsqama miyan Ciqlag.” 15Rmengo heya ka Dawid: “Mpsruwa su dmudul yami mosa dseediq hiya ho?” Rmengo ka heya: “Pquri kenan psdehu Utux Baro ka isu. Iya ku phqili ma, iya ku bqani baga tnpusu sapah mu. Kiya de mdudul ku yamu mosa dseediq hiya.”
16Seediq kiya we dmudul Dawid. Qtai! Gisu mkrehak mqaras mimah ma kmeeki ka dheya. Ado egu riyung ka gnlekan daha pneeyah seediq Peliset ma dxeral Yehudah. 17Dawid we phuqil dheya peeyah smesung betaq rabi so kusun. Wano ba 4'00 dmbbeyax wada qduriq paapa dapa bukung we, uka ani 1 ka wada qduriq. 18Gnlekan qyqeya dseediq Amaleq we, wada kbrihun gmeeluk kana Dawid. Kiya we betaq dmoi baga 2 mqedil na uri. 19Kana gnlekan seediq Amaleq, ani paru ma biciq, lqlaqi, qyqeya ma kana gnlekan daha we, wada kbrihun maangal Dawid kana. 20Tnbkean dapa ma miric gnlekan Dawid. Rmengo ka duma seediq dmudul tnbugan meeniq berah: “Qyqeya gneeluk Dawid ka nii.”
21Dehuk dseediq mnuuwic ini snegul 2'00 heyi gaga yayung Besor ka Dawid. Meyah smterung Dawid ma dseediq smnegul heya ka dheya. Mquri dheya smbeyax dheya ka Dawid. 22Txtaxa dseediq smnegul Dawid, kiya ka dseediq naqah ma uka dungus we, rmengo: “Ini theyaq ita mosa ka dheya de, iya bqani dheya ka qyqeya gnlekan ta. Wano ba mqedil ma lqlaqi daha ka pbrnahun ta dheya. Uqu nak kiya ka desun daha.” 23Rmengo ka Dawid: “Mtswai mu! Bnege na Utux Tmninun ita we iya kchaya moda. Ado qmnlahang ita ka heya ma, sbege na baga ta ka dseediq mneyah kmremux ita uri. 24Ima ka maha mpqbahang so yamu nii? Pnaasu ngngalun mnosa mccebu we so nii ma, pnaasu ngngalun qmnlahang qyqeya we so nii duri. Asi pntnai maasu kana.” 25Peeyah ali ciida, Dawid we so nii ka gaya bneku na Israel betaq saya.
26Dehuk Ciqlag ka Dawid de, biqan na qyqeya nangal peeyah gnlekan na ka rdrudan Yehudah dadal na ma rmengo: “Qtai! Gnlekan mu pneeyah pais Utux Tmninun hiya ka nii. Lnabu bbege mu sunan.” 27Bniqan na we pneeyah Beytel, Ramot Negeb, Yatir, 28Aroer, Sipmot, Estemoa, 29Rakal, Yeraxmeel, Qeyniy, 30Xormah, Borasan, Atak ma, 31Xebron. Dungal we so ka kana alang ndaan Dawid ma dseediq na.
Currently Selected:
1 Samuel 30: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
