1 Samuel 29
29
Laxan Seediq Peliset ka Dawid
1Msseli Apeq ka kana supi seediq Peliset. Seediq Israel we pkobu ssiyo pusu qsiya Yijreel hiya. 2Dqbsuran supi Peliset we maadis pnspuwan supi, duma we 1'00 heyi, duma we 10'00 heyi mquri berah. Dawid ma dseediq na we, mtheyaq Akis smnegul bukuy kiya. 3Rmengo ka dqbsuran supi Peliset: “Meyah hmuwa hini ka seediq Hiburu nii ho?” Rmengo dqbsuran supi seediq Peliset nii ka Akis: “Uxe Dawid tnqliyan Soro qbsuran paru Israel ka nii peni? Bsiyaq hari nniqan na yami hini ka heya. Pneyah tnheyaq menan betaq ali saya we, ini ku ba qita ka ndaan na mqnuuqu.” 4Sqama seang daha quri Akis ka dqbsuran supi Peliset ma rmengo heya: “Pbrnahi ka seediq nii! Pbrnahi posa alang snkgulan su ka heya ma, iya pspui ita mosa mccebu ka heya. So uxe mpciyuk ma pais ta pkelu mccebu ciida. Ppkmalu na kuxul pusu tnsapah na we, manu peni? Uxe tunux ta ka sbege na peni? 5Niqan seediq kmneeki ma mnuuyas:
‘Soro we phuqil 10'00 heyi,
Dawid we phuqil 1 mang heyi.’
Uxe Dawid nii da peni?”
6Mlawa Dawid ka Akis ma rngagan na: “Mpsdehu ku Utux Tmninun muudus ani knuwan. Seediq msderux su ka isu. Smnegul su kenan mnosa ani inu meeniq supi we, qrasun misu bale. Pneeyah su tnheyaq menan betaq ali saya we, ini ku ba qita ka ndaan su mqnuuqu. Kiya de ini skuxul sunan ka dqbsuran supi. 7Saya, psbleyaq mosa sapah su ma, iya ooda so naqah meeniq doriq seediq Peliset.” 8Rmengo Akis ka Dawid: “Hmnuwa ku ka yaku? Peeyah ku meniq berah su betaq ali saya we, so maanu ka qnquwan mu wada su slayan ma, kiya ka betaq su ini sruwa posa pccebu pais pusu tnsapah mu ma qbsuran paru mu peni?” 9Rmengo Dawid ka Akis: “Mkela ku ka yaku. Isu we malu su ba seediq meniq ckceka doriq mu, mntena su so snkgulan Utux Baro. Kiya de rmnengo ka dqbsuran supi Peliset: ‘Iya pspui posa mccebu menan ka heya.’ 10Saya, isu ma dseediq smnegul sunan, kiya ka dtnqliyan pusu tnsapah su we, grebu hari mttui ma, mbrinah mosa dxeral snkgulan mu sunan. Iya pniiqi lhebun su ka kari smeeliq lhebun su. Ado malu su ba meniq berah mu ka isu.” 11Kiya de Dawid ma dseediq na we mtutuy mgrebu bale ma, mbrinah mosa dxeral seediq Peliset. Kiya de steetu mosa Yijreel ka supi Peliset uri.
Currently Selected:
1 Samuel 29: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
