1 Samuel 2
2
Dnurun Xanah
1Dmurun ka Xanah:
“Ririh Utux Tmninun, mqaras ka lhebun mu,
ririh Utux Tmninun wada pstutuy baro ka urung mu.
Mqquri pais mu rmaguh ka quwaq mu.
Ririh dnoi su baga gisu ku mqaras.
2Uka ani 1 ka mrtaso mntena Utux Tmninun,
wano ba isu de, uka da.
Uka ani 1 ka pusu btunux mntena Utux Baro.
3Iya psparu rmengo kari psrabang,
iya peeyah kari kmmhemuc quwaq uri.
Ado Utux Baro niqan knkela ka Utux Tmninun,
ndaan seediq we gisu na seengun heya.
4Mgerung ka bheniq mkkere seediq,
pshwinuk beyax ka seediq mntakur.
5Smtuku meepah migin uqun ka seediq mtengi,
ini kuure uri ka seediq mnuure.
Ini tnlaqi we tmlaqi 7 laqi.
Wano heya nanak ka egu laqi.
6Utux Tmninun we phuqil seediq ma, pkuudus seediq uri,
psaun na tuxan mnkuung ma, pqriun na baro ka seediq uri.
7Utux Tmninun we psqrinuc seediq ma, pbleyaq seediq uri.
Ptgseesu lhebun seediq ma, psparu seediq uri.
8Hiya ge, speeyah na ckceka bengux pstutui na baro ka qrinuc seediq,
speeyah na ckceka quti pstutui qrinuc seediq.
Ptlungan na ptheyaq seediq niqan ngayan,
lmutuc tluungan knledax.
Pusu dxeral we nuUtux Tmninun,
phyegun na bobo hiya ka kana bobo dxeral.
9Heya we, mpqlahang dapil seediq mrtaso na,
kiya we, seediq naqah we mpkuuka meeniq ckceka mnkuung kiya,
ado uxe sntama beyax mbeyax mccebu ka seediq.
10Mppgeluk Utux Tmninun ge, maha stmaqun.
Heya we mcebu bruwa peeyah karac baro.
Utux Tmninun we psgeegun na ka kana seediq qnlangan,
sbege na qbsuran paru pnheyu na ka beyax,
phyegun na baro ka urung hnrigan na abura.”
11Mbrinah sapah na Ramah ka Elqanah di. Laqi kiya we qmeepah Utux Tmninun meniq berah Eriy.
2 Lqai Eriy
122 laqi Eriy we sqquru bale ma ini kela Utux Tmninun. 13So nii ka noda daha pnugaya seediq: Niqan ka seediq meyah smapuh tnbugan ma muduh ciida na we, dmoi 3 qango lihu heyi ka tnqliyan dmsapuh. 14Asi na cqii pqrii ribo, ribo paru ma, sara, uxe uri we cqeun na rusuq. Kana heyi lnihu na we, wada na desun kana. Kana dseediq Israel meyah Siylo hiya we, kesun na moda kana. 15Uxe wano kiya, berah ini uduh daruk siyang han we, meyah rmengo dseediq dmpsapuh ka tnqliyan msapuh: “Biqi msapuh ka heyi. Heya ka mooda muduh na. Uxe mangal nuduh su, asi ka meluq ka ngalun na.” 16Nasi rmengo ka dseediq dmpsapuh: “Asi ka qhdeun psqama ka siyang, kiya de tduwa su mmhemuc mangal da.” Kiya de mprengo ka tnqliyan: “Uxe, biqi ku hiya nhari. Kiya de gleekun mu mangal di.” 17Qnquwan noda driso nii we paru bale meeniq berah Utux Tmninun. Ado dseediq nii we, slkahun daha qmita ka snapuh Utux Tmninun.
Meniq Siylo ka Samuel
18Ciida, ida laqi ka Samuel na. Mlukus ipudi snmalu malu nuqah ma, mheyu berah Utux Tmninun. 19Knkingal knkawas bubu na we ssais na lukus biciq mgbaro ka Samuel ma, sbege na heya mtheyaq rseno na meeyah smapuh knkawas ciida. 20Eriy we smbleyaq Elqanah ma mqedil na: “Tai so Utux Tmninun we spooda na mqedil nii mege lqlaqi mslutuc su. Kiya ka rmirih laqi pnesa su Utux Tmninun.” Kiya de mbrinah mosa dxeral daha ka dheya.
21Utux Tmninun we smbleyaq Xanah, kiya de mtuting 3 laqi rseno ma 2 mqedil ka heya. Laqi na Samuel we mdakil meniq berah Utux Tmninun.
Rmengo Kari Pgeela Mqraqil Tnsapah Eriy
22Rudan ba ka Eriy, mnbahang noda 2 laqi na quri kana seediq Israel. Dungal we mnbahang mntheyaq mtaqi dmqedil gaga qmeepah rhengun kobu. 23Kiya de rmengo dheya: “Hmuwa ma so nii noda namu ho? Mbahang ku naqah noda namu peeyah kana seediq. 24Lqlaqi mu! Iya so kiya! Mnbahang ku dseediq nuUtux Tmninun we, nii gmarang qnnaqah ngayan namu. 25Nasi niqan qnquwan noda na seediq we, niqan Utux Baro ka psgeegan na. Nasi wada niqan qnquwan noda Utux Tmninun ka seediq, ima ka mptduwa dmayo dmurun dheya ho?” Kiya de ida ini qbahang kari tama daha ka dheya. Ado kmphuqil dheya ka Utux Tmninun.
26Samuel laqi nii we mndakil ba. Qrasun riyung Utux Tmninun ma kana seediq.
27Meyah rmengo Eriy ka seediq Utux Baro: “So nii kari rnengo Utux Tmninun: ‘Pusu tnsapah rudan su mneeniq Paroh Micrayim ciida we, uxe ku pntuura dheya ka yaku peni? 28Meeniq ckceka pnswayan rudan Israel we, uxe ku gnao heya ngalan mu msapuh peni? Uxe mu wada sbege tnsapah pusu rudan namu ka snapuh puniq bnege snapuh dseediq Israel peni? 29Ma namu psbrangun smeeliq snapuh ma ssapuh tnugesa mu bbege namu nniqan mu ho? Ma su smparu qmita laqi su mgkala smparu kenan ma, malu ba snapuh bnege seediq mu Israel we, wada saku hiya stbeno yamu nanak ho?’. 30So kiya de, rmengo ka Utux Tmninun, Utux Baro nuIsrael: ‘Bale ba rmnengo ku, isu ma tnsapah pusu rudan su we, meeniq berah mu betaq ani knuwan. Kiya de, mprengo so nii saya ka Utux Tmninun, uxe ku mpkeso nii mooda da. Ado smparu kenan we, spruun mu ka heya uri. Ini psparu kenan we, ida ku mpsbiciq qmita heya uri. 31Qtai! Gisu ka ali, slapun mu ka hiqur baga su ma hiqur baga tnsapah pusu rudan su. Kiya de maha uka ani 1 rudan tnsapah su. 32Tbleyaq su meniq seediq Israel ciida, mpqita su mpkuuka ka rudan tnsapah su. 33Tnsapah su we, ini mu sqeti peeyah spuhan mu. Maha mbudu ka doriq su ma naqah su kuxul. Pnrana seediq tnsapah su we maha mhuqil kana. 34Daun smterung Noda Xopniy ma Pinexas 2 laqi su we, kiya ka gisu plaale pgkela, ddaha daha we mptena mhuqil 1 ali. 35Mpheyu ku nanak 1 msapuh malu stmaan. Ooda na we maha muyu lhebun mu ma, lnglungan mu. Mpskere ku pheyu sapah na. Heya we mpkkesa klaali meeniq berah hnrigan mu abura. 36Ida meyah thmuku heya kana ka seediq mnsngari muudus tnsapah su. Meyah mesa 1 ging ma 1 pang. Mprengo: Biqi ku qpahun msapuh, kiya ka tduwa ku mekan nangal mu uqun.’”
Currently Selected:
1 Samuel 2: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
