1 Samuel 28

1Ciida, psseli supi ka seediq Peliset ma kmccebu Israel. Rmengo Dawid ka Akis: “Kkela ka isu, asi su ka mtheyaq kenan mosa mccebu ka isu ma dseediq su.” 2Rmengo Akis ka Dawid: “Un wa. Qbsuran paru, ida su klaun kana ka ooda tnqliyan.” Rmengo Dawid ka Akis: “Un. Mpheyu ku mqbsuran mpqlahang kenan ka isu.”

Smiling Mqedil Mprengo Utux ka Soro

3Tena wada mhuqil ka Samuel ciida, tsdamac lmingis heya ka kana seediq Israel ma saan daha smeku Ramah alang na hiya. Soro we ndaan na lmiwaq peeyah qlhangan ka mprengo utux ma mhuni. 4Msseli ka seediq Peliset ma pkobu Sunem. Soro we psseli seediq Israel ma pkobu Gilboa hiya. 5Miicu riyung ma pkrkerang qmita supi Peliset ka Soro. 6Smiling Utux Tmninun ka Soro we ani spooda sepi, Uring ma, mpgeela kari we, ini bale ciyuk. 7Posa kari mdayo na ka Soro: “Saani ku migin mqedil mprengo utux ma slinge mu.” Rmengo heya ka qbsuran mdayo: “Qtai! Gaga Eyn Dor hiya ka mqedil mprengo utux.”

8Kiya de priyux lukus kingal nanak ka Soro ma maadis 2 seediq mnskeeman mosa tqita mqedil kiya. Rmengo ka Soro: “Braho su pdai knsttuxan su taus ka seediq mnhuqil tnugesa mu sunan.” 9Rmengo heya ka mqedil: “Qtai! Klaun su ka ndaan Soro. Wada na sqada peeyah dxeral hini ka mprengo utux ma mhuni. Ma su meyah posa wano kmphuqil su kenan di?” 10Soro ge, spooda na Utux Tmninun smdehu mqedil: “Mpsdehu ku Utux Tmninun muudus ani knuwan. Uxe su maangal pnkdira ririh noda nii.” 11Rmengo ka mqedil: “Ima ka splawa mu?” Rmengo ka heya: “Samuel ka plaani baro.” 12Qmita Samuel ka mqedil de mdiras mlawa. Rmengo Soro ka mqedil: “Soro su ka isu. Ma su mberiq kenan ho?” 13Rmengo mqedil ka qbsuran paru: “Iya kiicu! Maanu ka ntaan su?” Rmengo Soro ka mqedil: “Qmnita ku niqan utux mgkala baro.” 14Rmengo ka Soro: “Mgmaanu ka hnyegan na?” Rmengo ka mqedil: “Rudan ka mnkala baro. Hmaluy lukus rila.” Samuel ka heya mesa mkela ka Soro de, tgtemaq berah na thmuku heya.

15Rmengo Soro ka Samuel: “Ma su prrudu kenan? Ma su mlawa mgkala baro ho?” Rmengo ka Soro: “Nii mu uka ba klaan. Ado meyah mccebu kenan ka seediq Peliset. Wada mlatac kenan ka Utux Tmninun ma, ini pooda mpgeela kari ma sepi rmengo kenan ka heya. So kiya de, mlawa ku sunan meyah baro, so su maha tmgesa kenan maanu ka daun mu.” 16Rmengo ka Samuel: “Kmpais sunan ma, wada mlatac sunan ka Utux Tmninun de, ma su smiling kenan dungal ho? 17Utux Tmninun we, spooda na rnengo kenan mpbale so kiya mooda ka heya. Wada na ngalun ka beyax su qmlahang qlhangan ma, sbege na icil seediq, kiya ka Dawid. 18Ado ini su qbahang kari Utux Tmninun ka isu. Ini su ooda qmeepah seang Utux Tmninun quri seediq Amaleq. Kiya de wada so nii sunan ali saya ka Utux Tmninun. 19Utux Tmninun we bege na baga seediq Peliset uri ka isu ma Israel. Kusun we, maha su mtheyaq kenan ka isu ma lqlaqi su. Utux Tmninun we sbege na baga seediq Peliset supi Israel.”

20Kiya de Asi tgtemaq mtakur dxeral ka Soro. Ado kari Samuel betaq miicu riyung ka heya. Uka ka beyax na, ado ini ekan ani maanu 1 ali 1 knmanan ka heya ciida. 21Meyah berah Soro ka mqedil kiya. Qtaan na gisu miicu riyung de, rmengo heya: “Qtai! Wada ku mbahang kari su ka tnqliyan. Betaq ku ini kraguh knuudus mu nanak muyu ku kari su. 22Saya de braho su, bhangi ku hiya ka kari mu uri. Psai mu tikuh uqun ka berah su. Uqi ma kiya ka maha su niqan tikuh beyax mooda elu.” 23Ini sruwa ka Soro, rmengo: “Uxe ku meekan.” Kiya de ida rmengo heya ka tnqliyan na ma mqedil kiya. Kiya ka hani mbahang kari daha. Mtutuy peeyah dxeral ma tleung bobo qlapo. 24Mqedil kiya we, asi nhari mosa phuqil tbeno wawa miric sapah na ma, gmmegang nemu mugi ma smalu pang ini psai tgeda. 25Psaun na berah Soro ma tnqliyan na. Meekan ka dheya ma, wada keeman ciida ka dheya di.

Currently Selected:

1 Samuel 28: Stgdaya

Highlight

Copy