1 Samuel 27
27
Meeniq Ckceka Seediq Peliset ka Dawid
1Lmngelung ka lhebun Dawid: “Maha ba niqan 1 ali, mphuqil ku baga Soro ka yaku. Saya, malu ba mosa ku qduriq dxeral seediq Peliset. Kiya ka maha muuwic ka lnglungan Soro de, uxe ltlutuc na meyah migin yaku kana dxeral Israel ka Soro. So kiya de, maha ku ptaalix peeyah baga na.” 2Kiya de, mttui ka Dawid ma 6'00 heyi smnegul heya ma, mosa sdahar Akis laqi Maok qbsuran paru Gat. 3Dawid ma 2 mqedil na, kiya ka Axinoam seediq Yijreel ma Abigayil nmqedil Nabal meniq Karmel. Kiya uri we dseediq na ma tnsapah daha we, mosa meniq Akis Gat hiya. 4Meyah rmengo Soro ka duma seediq: “Wada qduriq Gat ka Dawid.” Kiya de ini smdurak Dawid ka heya di.
5Rmengo Akis ka Dawid: “Nasi su smparu kenan, braho su biqi ku 1 alang biciq nniqun mu ma, peeniq ku hiya. Maha hmuwa theyaq qbsuran paru meniq alang paru ka tnqliyan su peni?” 6Ali ciida, Akis we sbege na heya alang Ciqlag. Kiya ka nqbsuran paru Yehudah betaq saya ka Ciqlag. 7Dawid we, meniq dxeral seediq Peliset hiya we 1 knkawas 4 idas.
8Mosa tgbaro gmeeluk seediq Gesur, Gejer ma Amaleq ka Dawid ma dseediq na. Dheya nii we kiya ka dseediq pneeyah Telan moda Sur betaq Micrayim. 9Dawid we mosa mccebu dxeral kiya. Ani rseno ma mqedil we, ini na rngii pkuudus. Dungal we gmeeluk dapa, miric, dapa roba, dapa bukung ma llukus ka dheya ma, mbrinah dehuk Akis hiya. 10Rmengo ka Akis: “Yaa namu ini osa gmeeluk ani inu ka dyamu ho?” Rmengo ka Dawid: “Gneeluk miyan dxeral tgtruma Yehudah, Yeraxmeel ma, Qeyniy ka dyami.” 11Ani rseno ma mqedil, Dawid we ini na rngii pkuudus madis Gat. Rmengo ka heya: “So uxe mpneru ita ka dheya, rmengo: ‘Wada so nii moda ka Dawid’” Nniqun na dxeral seediq Peliset ka Dawid we ida so nii ka ooda na. 12Akis qbsuran paru we snhiyun na ba ka Dawid ma rmengo: “Wada trqilun ba seediq Israel ka Dawid ma, ida mptnqliyan kenan hini ani betaq knuwan.”
Currently Selected:
1 Samuel 27: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
