1 Samuel 26

Ptpusal Psruwa Knuudus Soro ka Dawid

1Meyah Gibeah Soro hiya ka seediq Jip ma rmengo: “Uxe gaga tgleing dgiyaq Xakilah nklaan hido breenux hiya ka Dawid peni.” 2Kiya de mtutuy ka Soro ma, madis 30'00 gneegan supi peeyah ckceka seediq Israel hmeruc mqquri tadus brenux Jip migin Dawid. 3Soro we pkobu ssiyo elu dgiyaq Xakilah nklaan hido breenux hiya. Meniq tadus brenux hiya ciida ka Dawid ma, qtaan na nii smdurak heya betaq tadus brenux ka Soro. 4Kiya de Dawid we smkagul seediq mpkuuruy, klaun na gisu nii ka Soro. 5Mtutuy ka Dawid, mosa nniqan kobu Soro hiya. Qtaan na ka tnqiyan Soro ma Abner qbsuran supi laqi Ner. Mtaqi truma kobu ka Soro ma, nii pkobu ssiyo na ka dsupi.

6Kiya de Dawid we rmengo Aximelek seediq Xet ma Abisay laqi Ceruyah mtswai Yoab: “Ima ka mptheyaq kenan mosa kobu Soro ho?” Rmengo ka Abisay: “Yaku ka mptheyaq sunan.” 7Kiya de keeman ciida, Dawid ma Abisay we meyah betaq supi hiya. Qtai! Gisu mtaqi kobu na hiya ka Soro. Smbrangan na we gaga meniq ssiyo na ma syeqi na dxeral. Abner ma dsupi na we mtaqi ssiyo na. 8Rmengo Dawid ka Abisay: “Utux Baro we nii na sbege baga su ka pais su. Ali saya, mdoi ku smbrangan mu, ptxalun mu lmihu dxeral ka heya. Ani mnexal bale, uxe snpsalun metaq.” 9Rmengo Abisay ka Dawid: “Iya phuqil ka heya! Ima ka uka qnquwan noda betaq phuqil hnrigan abura Utux Tmninun peni?” 10Rmengo dungal ka Dawid: “Mpsdehu ku Utux Tmninun muudus ani knuwan. Ya uxe duri we pphqilun Utux Tmninun ka Soro. Kiya de ya dehuk ka ali hnqilan ma, ya mpnhuqil nsaan na mccebu duri, 11Kiya we Utux Tmninun we, ini sruwa pooda baga mu phuqil hnrigan abura Utux Tmninun. Saya, tduwa su ngalun ka smbrangan ma rusuq psaan qsiya gaga ssiyo tunux na. Kiya de maha ta di.” 12Kiya de mangal smbrangan ma rusuq psaan qsiya gaga ssiyo tunux Soro ka Dawid de, mlatac ka dheya. Uka ani ima ka qmnita ma, uka ka mkela uri ma, ini ba tutuy ka seediq duri. Gaga mtaqi kana ka dheya. Ado pchngian ptaqi Utux Tmninun ka dheya.

13Mntaril sipo ka Dawid ma, mosa mheyu bungu dgiyaq smtheya ba peeyah gaga daha niqan. 14Mlawa seediq ma Abner laqi Ner ka Dawid: “Abner! Ma su ini ciyuk?” Cmiyuk ka Abner: “Ima su ba? Betaq su so nii mlawa qbsuran paru?” 15Rmengo Abner ka Dawid: “Uxe su rseno bale ka isu peni? Ckceka Israel we, ima ka maha mgkala sunan? Ckceka seediq we, niqan ka seediq mneyah phuqil pusu tnsapah su ma qbsuran paru su we, ma su ini qlahang pusu tnsapah su ma qbsuran paru su? 16Uxe malu ka noda su so nii! Mpsdehu ku Utux Tmninun muudus ani knuwan. Bale ba phqilun kana ka dyamu. Ado ini namu qlahang pusu tnsapah namu, kiya ka hnrigan abura Utux Tmninun. Qtai! Saya, smbrangan ma rusuq psaan qsiya qbsuran paru mneniq ssiyo tunux qbsuran paru su we, gaga inu di?”

17Mkela mesa hrenang Dawid ka Soro de, rmengo: “Laqi mu, Dawid, ye hrenang su ka nii?” Cmiyuk ka Dawid: “Pusu tnsapah mu ma, bukung mu! Hrenang mu ka nii.” 18Rmengo dungal: “Pusu tnsapah mu, hmuwa ma su smdurak tnqliyan su? Hmnuwa ku ka yaku? Maanu ba ka qnnaqah noda baga mu? 19Saya, pusu tnsapah ma qbsuran paru mu. Bhangi ka kari tnqliyan. Nasi Utux Tmninun ka ptbeyax sunan meyah su kmremux kenan de, tai so qqrasun mangal Utux Tmninun ka snapuh bnege. Nasi pnooda seediq de, tai so syusun berah Utux Tmninun kiya. Ado smdurak yaku ali saya we, gisu ini knbege pusu dnoi Utux Tmninun kenan ka dheya ma, rmengo, betaq rmengo: ‘Osa thmuku utux icil da!’ 20Saya, iya bale qdriqi phuqil peeyah bobo dxeral Utux Tmninun ka dara mu. Ado qbsuran paru nuIsrael we, gisu smdurak 1 tmaqu ma, mntena seediq gisu smdurak 1 ramang meeniq dgiyaq.”

21Rmengo ka Soro: “Niqan ku qnquwan noda di! Dawid, laqi mu, brinah di! Uxe ku mphuqil sunan di, ado wada su smparu qmita knuudus mu ka isu. Qtai! Seediq ku mkuni ka yaku ma, paru riyung ka qnquwan mu.” 22Rmengo ka Dawid: “Qtai! Nii hini ka smbrangan qbsuran paru. Skguli taxa tnqliyan su ma yahi paangal. 23Ali saya, Utux Tmninun we, bnege na baga mu ka qbsuran paru. Kiya we ini ku sruwa pooda baga mu phuqil hnrigan abura Utux Tmninun. Utux Tmninun we, mpuyu knsderux seediq mpbale mpciyuk ka heya. 24Qtai! Ali saya we, smparu ku qmita knuudus su. Tai so Utux Tmninun we mpuyu so nii smparu qmita knuudus mu ka heya uri. Kiya uri we mdoi baga kenan peeyah kana pnqraqil.” 25Rmengo Dawid ka Soro: “Laqi mu, Dawid. Tai so mangal su smbleqan! Mooda su paru noda ma, mpkbeyax su mccebu ka isu.” Kiya de wada mosa elu na ka Dawid ma, mbrinah dxeral na nanak ka Soro uri.

Currently Selected:

1 Samuel 26: Stgdaya

Highlight

Copy