1 Samuel 25
25
Mhuqil ka Samuel
1Mhuqil ka Samuel. Msseli ka kana seediq Israel ma tsdamac lmingis heya. Kiya de saan daha smeku Ramah sapah na nanak ka heya.
Dawid ma Abigayil
Mtutuy ka Dawid mosa betaq tadus brenux Paran. 2Niqan 1 seediq meniq Maon, pusu dnoi na we gaga meniq Karmel. Seediq nii we mbleyaq seediq. Heya we, niqan 30'00 miric rudu ma 10'00 miric. Gisu matak ubal miric Karumeru hiya. 3Nabal kesun ka ngayan na. Mqedil na we Abigayil. Mqedil Nabal we niqan ba knkela na ma, mseediq ba taan ka hnyegan na. Kiya de Nabal we, seediq Kaleb ma, murung ba ma naqah noda na. 4Meeniq tadus brenux Dawid we, mnbahang gisu matak ubal miric ka Nabal de, 5Kiya de smkagul 10 tnqliyan ma rmengo dheya: “Osa steetu Karmel mosa Nabal hiya, pdai ngayan mu smbeyax dheya. 6Keso nii rmengo: ‘Tai su so maha mbleyaq ka bobo knkawas ma tnsapah su ma, kana ddaun su. 7Mnbahang ku saya, niqan su seediq maatak ubal miric. Mntheyaq kenan ka mtabu miric su. Kana ali nniqan daha Karmel we, ini miyan pqnaqah dheya ma kana dnoi daha we ida malu kana. 8Tgsai ka tnqliyan su, mprengo isu ka dheya. So su maha qrasun meniq berah su ka tnqliyan mu. Ado gisu miyan meyah ali mpndungus nii. Braho su biqi tikuh uqun ka tnqliyan ma Dawid laqi su.’”
9Dehuk ka dtnqliyan Dawid de, rmengo ngayan Dawid ma srengo na Nabal ka kana kari. Kiya de msange ka dheya di. 10Rmengo dtnqliyan Dawid ka Nabal: “Ima ka kesun Dawid? Ima ka kesun laqi Yisay! Ali saya, tbrinah qduriq peeyah pusu tnsapah ka tnqliyan na we egu riyung. 11Maanu ka maha mu sbege uqun ma, biqun mu heyi miric sseeliq mu dseediq matak ubal miric mu ka seediq ini mu klai di?” 12Kiya de dtnqliyan Dawid we mpbrinah ka dheya ma, srengo daha Dawid ka kana kari nii. 13Rmengo dseediq na ka Dawid: “Srugi hlmadac txtaxa namu!” Kiya de smiru hlmadac txtaxa daha ma Dawid uri. Smnegul Dawid we yaa ba 4'00 heyi ma, mpqlahang qyqeya hiya we 2'00.
141 tnqliyan Nabal we rmengo Abigayil mqedil Nabal: “Qtai! Smnkagul tnqliyan na pneyah tadus brenux ka Dawid meyah smbleyaq qmita pusu tnsapah mu we, tnsyaxan miyan pusu tnsapah mu ka dheya. 15Kiya de wada smbleyaq menan ka dheya gaga. Mntheyaq miyan bbreenux hiya ciida we ini ba pqnaqah menan. Uka ani maanu ka wada mgedang uri. 16Tmabu miyan miric ciida, dheya ka qmlahang menan ani diyan ma keeman. 17Saya, klai bale, teta ta huwa kesun mooda ka maha malu. Netun ta ini so kiya de, meeyah pusu tnsapah mu ma kana tnsapah na ka mpqraqil. Naqah ma mnpahung mseang ba ka heya, uka seediq mprengo heya.”
18Abigayil de nugaaguh psramal 2'00 pang, 2 lubuy qraqil sino, 5 miric hnpure, 5 sea pnstilux mugi, 1'00 puyuy dnngean pang lipas ma, 2'00 dnngean pang nunuh. Kana nii we spaapa na dapa roba. 19Rmengo tnqliyan na: “Geela mkkesa berah mu ka yamu. Qtai! Mpsnegul ku yamu ka yaku.” Kiya we ini na rngagi Nabal rseno na ka heya. 20Paapa dapa roba hmeruc saso dgiyaq ka Abigayil. Qtai! Gisu mquri Abigayil hini ka Dawid ma dseediq na. Kiya de mosa smterung dheya ka heya. 21Rmengo ka Dawid: “Meniq ku tadus brenux ciida, qmlahang miyan kana dnoi seediq kiya. Kiya de ini kgedang ani maanu ka heya. Maanu ba ka so nii! Betaq cmiyuk qnnaqah quri yaku. 22Kana drseno Nabal we, nasi mu rngiun betaq mgrebu kusun de, tai so pkdira Dawid ka Utux Baro!”
23Qmita Dawid ka Abigayil de nugaaguh mtuting peeyah dapa roba ma, mosa tmbqelic thmuku berah Dawid. 24Tgtemaq thmuku berah papak Dawid ka mqedil nii ma rmengo: “Pusu tnsapah mu! Tai so qnquwan noda nii we nnaku ka kiya! Srwai ku hiya rmengo kari sunan. Braho su ba bhangi tikuh ka kari mqedil tnqliyan su. 25Pusu tnsapah mu, iya pniqi lhebun ka seediq naqah ma kmmhemuc mseang Nabal kiya. Seediq na we mntena ba ngayan na. Nabal ka ngayan na ma, noda na we mntena ba mngataq. Quri so yaku mqedil tnqliyan su we, ini ku qita ka dtnqliyan snkgulan su. 26Saya, pusu tnsapah mu! Utux Tmninun we wada so nii hmetur sunan mpciyuk de, so uxe mpsdara ka seediq. Kiya de mpsdehu ku Utux Tmninun muudus ani knuwan ma, mpsdehu ku knuudus su duri: ‘Saya, tai so pais su ma dseediq kmphuqil tnpusu sapah mu we, maha mntena Nabal kana.’ 27Saya, braho su tnpusu sapah mu, ngali ka snadu nadis tnqliyan mu mqedil bege mu dtnqliyan smnegul sunan. 28Utux Tmninun we maha plekuh ba pheyu tnsapah su. Ado quri Utux Tmninun ka sccebu pusu tnsapah mu. Kiya uri we so kana kndesan su we, maha uka ggimun ka qnnaqah. 29Ani niqan ka seediq meyah smdurak sunan ma migin knuudus su ge, knuudus pusu tnsapah mu we, ga meniq ckceka Utux Tmninun, Utux Baro su hiya ka isu. Mntena so mtdehu riyung mgleing kndusan. Quri so knuudus pais su we, maha lixun Utux Tmninun ma, maha mntena so gisu qmada btunux pneeyah ptgyaun. 30Utux Tmninun we, mpuyu sntangan na mbbleyaq mbege tnpusu sapah mu betaq su pphyegun qbsuran paru Israel ciida de, 31pusu tnsapah we, uxe su mpqnaqah kuxul ka isu, ado ini su pooda baga su cmiyuk psdara dseediq uka qnquwan. So kiya de maha malu ka lhebun su. Smbleyaq tnpusu sapah mu ciida ka Utux Tmninun we, braho su lnglungi ka mqedil tnqliyan su.”
32Cmiyuk Abigayil ka Dawid: “Pusu tndhuun ka Utux Tmninun, Utux Baro nuIsrael. Ado Smkagul sunan ppsterung kenan ali saya. 33Tndhuun ka isu ma kkela lmngelung su. Ado wada su hmetur mpciyuk ku ma mpsdara ku seediq ka isu. 34Mpsdehu ku Utux Tmninun, Utux Baro nuIsrael muudus ani knuwan hmnetur kenan. Nasi uxe isu nnahari meyah smterung kenan de, naka uka ani 1 mtngari drseno Nabal betaq lmedax hido mgrebu kusun.” 35Dawid we ngalun na peeyah baga Abigayil ka lnabu nadis na de, rmengo heya: “Tbleyaq mosa sapah su di! Qtai! Wada ku qmita dqeras su ma mbahang kari su.”
36Mbrinah Nabal hiya ka Abigayil. Qtai! Gisu psramal uqan mqaras meniq sapah na, mntena so qbsuran paru ka uqun na. Mqaras riyung lhebun na ka Nabal ma bsukan riyung. Kiya de noda Abigayil ani paru ma biciq we, ini na rngagi heya betaq mgrebu so kusun. 37Mgrebu so kusun de, mtkela knbsukan na ka Nabal. Kiya de mqedil na we, srengo na heya ka noda nii. Kiya de asi nii mphuqil knnarux bahak na ma, mntena btunux knkere ka heya. 38Hmrinas Mk10 ali de, cmebu Nabal ka Utux Tmninun. Kiya de mhuqil ka heya di.
39Dawid we, mnbahang wada mhuqil ka Nabal de, rmengo: “Pusu tndhuun ka Utux Tmninun. Ado nangal ku pnqsiqa peeyah baga Nabal we, heya ka wada cmiyuk kenan. Dungal we heya ka hmnetur mooda naqah oda tnqliyan na uri. Utux Tmninun we, sbege na tunux Nabal ka qnnaqah na.” Kiya de smkagul snkgulan mosa rmengo Abigayil, ngalun na mqedil ka heya. 40Meyah Karmel betaq Abigayil hiya ka tnqliyan Dawid de, rmengo heya: “Dawid we, smkagul menan meyah isu hini ma maangal mpqedil sunan ka heya.” 41Kiya de mtutuy ma thmuku ka Abigayil ma tmbqelic dxeral thmuku rmengo: “Qtai! Tai ku so mpqedil tnqliyan su ma, tnqliyan mptrima papak pusu tnsapah mu ka yaku.” 42Kiya de, asi tutuy ma paapa dapa roba ma, smnegul heya ka 5 mqedil tnqliyan. Smnegul bukuy dtnqliyan Dawid ka heya. Kiya de ma mqedil Dawid ka Abigayil.
43Tgberah we mnangal mqedil Axinoam seediq Yijreel ka Dawid. 2 nii ka ma mqedil Dawid. 44Kiya de Mikal weewa Soro mqedil Dawid ge, wada na sbege mqedil Paltiy laqi Layis seediq Galim.
Currently Selected:
1 Samuel 25: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
