1 Samuel 24
24
Smruwa Knuudus Soro ka Dawid
1Mnosa smdurak seediq Peliset mbrinah ka Soro de, meyah rmengo heya ka duma seediq: “Qtai! Gaga meniq tadus brenux Eyn Gediy ka Dawid.” 2Kiya de, Soro we madis 30'00 supi gneegan peeyah kana Israel mquri nklaan hido lhengo Miric migin Dawid ma dseediq na. 3Dehuk ssiyo elu qnalang miric de, niqan lhengo ka hiya. Mosa nganguc hiya ka Soro. Dawid ma dseediq na we, gisu mglein tgtruma beling hiya ka dheya. 4Rmengo Dawid ka dseediq na: “Qtai! Dehuk ka ali da! Rmnengo sunan ka Utux Tmninun: ‘Qtai! Bbege mu baga su ka pais su ma, seung nanak lnglungan su mquri heya.’” Kiya de mtutuy ka Dawid, mosa gmuruus kmayak palic lukus mgbaro Soro. 5Bobo na de, mseang heya nanak ka Dawid, ado wada kmayak palic lukus mgbaro Soro ka heya. 6Rmengo dseediq na ka Dawid: “Utux Tmninun we, ini sruwa so nii noda mu quri pusu tnsapah mu ma, phuqil hnrigan abura Utux Tmninun. Ado hnrigan abura Utux Tmninun ka heya.” 7Dawid we, dmoi kari so nii hmetur dseediq na. Ini na srwai mosa phuqil Soro ka dheya. Mtutuy ka Soro de, mlatac peeyah beling mmaha ddaun na.
8Bobo na de, mtutuy ka Dawid uri. Peeyah beling meyah nganguc ma, mlawa Soro: “Pusu tnsapah mu, qbsuran paru mu!” Mspgeriq bukuy qmita ka Soro de, tmbqelic dxeral thmuku ka Dawid. 9Rmengo Soro ka Dawid: “Isu ge, hmuwa ma su snhii bgihur kari mesa: ‘Qtai! Kmphuqil sunan ka Dawid’ ho? 10Qtai! Qtaan su bale ali saya, mneeniq su beling we, Utux Tmninun sbege na baga mu ka isu. Kmphuqil sunan ka duma seediq we, krinah ku gmaalu sunan ka yaku ma rmengo ku: ‘Miicu ku phuqil pusu tnsapah mu. Ado hnrigan abura Utux Tmninun ka heya’ 11Tama mu! Braho su qita, qtai ka palic lukus su mgbaro, gisu baga mu nii. Kmayak ku palic lukus su mgbaro ma, ini misu qphqili. Qtai ba, uka qnnaqah lnglungan mu tbrinah sunan. Ani su nii migin knuudus mu we, ini ku pqnaqah sunan ka yaku. 12Tai so mpsgao kenan ma sunan ka Utux Tmninun. Tai so mdayo rmengo kenan meeniq heyi su ka Utux Tmninun. Ini ku phuqil sunan ka yaku. 13Niqan ka kari pnccwilan cbeyo: ‘Qnnaqah noda we mpeeyah nanak naqah seediq.’ Kiya we ini ku phuqil sunan ka yaku. 14Qbsuran paru Israel we, ima ka yyahan na migin ho? Ima ka ssdrapun su? Huling mnhuqil ma tmaquy ba nanak ka heya. 15Tai so ma mpsgao meeniq ckceka su ma yaku ka Utux Tmninun. Tai so ndwaun na migin ma mdayo rmengo kenan ma, mpdoi baga mu mpqduriq baga su ka heya.”
16Mnhedu rmengo so nii kari Soro ka Dawid de, cmiyuk ka Soro: “Laqi mu Dawid, hrenang su ka nii ho?” Kiya de pmbaro lmingis ka Soro. 17Rmengo Dawid: “Mgkala su msderux kenan ka isu. Ado smbleyaq su kenan. Kiya we cmiyuk ku qnnaqah sunan ka yaku. 18Wada truura ba gmaalu su menan ali saya. Ado Utux Tmninun we, sbege na baga su ka yaku, kiya de ini su phuqil kenan ka isu. 19Netun psterung pais na ka seediq we, ima ka dehuk malix ma psbleyaq posa ho? Tai so noda su ali saya, mpciyuk malu sunan ka Utux Tmninun. 20Saya, qtai! Klaun mu maha su mpqbsuran paru ka isu. Qlhangan Israel we asi ka mpsdehu baga su. 21Saya, psdehu quri Utux Tmninun kenan ka isu. Uxe su mpkaangal lqlaqi mslutuc mu ma, uxe su sresun peeyah sapah tama mu ka ngayan mu.” 22Kiya de smdehu quri Soro ka Dawid ma, wada mbrinah sapah ka Soro di, Dawid ma dseediq na we wada qbrangan na ddgiyaq ka dheya.
Currently Selected:
1 Samuel 24: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
