1 Samuel 23
23
Dnoi Baga Alang Qeilah ka Dawid
1Meyah rmengo Dawid ka duma seediq: “Qtai! Gaga cmebu Qeilah ka seediq Peliset ma, gmeluk mugi snbetan.” 2Smiling Utux Tmninun ka Dawid: “Ya ini huwa mosa ku? Ya ini huwa mosa ku mccebu seediq Peliset?” Rmengo Dawid ka Utux Tmninun: “Ani su nak mosa mccebu seediq Peliset ma dmoi baga Qeilah.” 3Rmengo Dawid ka dseediq na: “Qtai! Meeniq ta Yehudah hini we, ida niqan ka kniicu ta na, huwa ta kesun mosa Qeilah, mccebu supi seediq Peliset dungal?” 4Smiling Utux Tmninun dungal ka Dawid. Cmiyuk ka Utux Tmninun: “Osa hmeruc Qeilah. Bege mu baga su ka seediq Peliset.” 5Kiya de mosa Qeilah ma mccebu seediq Peliset ka Dawid ma seediq na. Dawid we, wada na ini baka ka dheya ma, glekun na mangal ka tnbugan daha. So kiya de, dmnoi baga seediq Qeilah ka Dawid.
6Qnduriq mosa Dawid Qeilah hiya ciida ka Ebyatar laqi Aximelek we, mnadis ipudi ka baga na. 7Meyah rmengo ga dehuk Qeilah hiya ka Dawid kesun daha ka Soro. Rmengo ka Soro: “Utux Baro we sbege na kenan ka heya di. Ado gisu mremux alang niqan ruhu ka heya ma mphetur nanak heya.” 8Kiya de Soro we psseli seediq mmaha mccebu Qeilah ma tmlibu Dawid ka dheya. 9Dawid we klaun na gaga psramal mphuqil heya ka Soro de, rmengo Ebyatar msapuh ka heya: “Adis hini ka ipudi.” 10Rmengo ka Dawid: “Utux Tmninun, Utux Baro nuIsrael! Tnqliyan su we, bale ba mnbahang mmeyah Qeilah ka Soro ma, ririh yaku seeyah na smeeliq alang nii ka heya. 11Dseediq Qeilah we ya ku daha bbege baga Soro? Bale ba meeyah ka Soro, mntena so bnhangan tnqliyan su ho? Utux Tmninun, Utux Baro nuIsrael. Braho misu bale, tgsai ka tnqliyan su!” Rmengo ka Utux Tmninun: “Meeyah ka heya.” 12Rmengo dungal ka Dawid: “Kiya de dseediq Qeilah we ya na bbege baga Soro ka yaku ma dseediq mu?” Rmengo ka Utux Tmninun: “Bbege namu na dheya.” 13Kiya de Dawid ma yaa ba 6'00 heyi dseediq na we, mlatac peeyah Qeilah mquri so tduwa daha saan. Mosa mneeru Soro ka seediq, wada mlatac peeyah Qeilah ka Dawid di kesun daha rmengo de, ini osa ka Soro di.
Meniq Tadus Brenux Mgleing Soro ka Dawid
14Dawid ge, meeniq qbrangan ddgiyaq tadus brenux, kiya ka ddgiyaq tadus brenux Jip. Soro we, ida migin Dawid klaali. Kiya we Utux Baro we, ini na biqi baga na ka Dawid.
15Dawid we, qmita gisu meyah migin knuudus na ka Soro. Ciida, mneniq lmiqu tadus brenux Jip hiya ka Dawid. 16Yehonatan laqi Soro we, mtutuy mosa lmiqu tqita Dawid. So maha pskere ba smtama Utux Baro ka baga na. 17Rmengo ka heya: “Iya kiicu! Uxe mphuqil sunan ka baga tama mu. Maha su mpqbsuran paru Israel ma, yaku ka qbsuran mdayo sunan. Soro tama mu we, mkela ka heya uri.” 18Kiya de psdehu berah Utux Tmninun ka 2 heyi. Dawid we, ida meniq lmiqu ma, mbrinah sapah na ka Yehonatan.
19Steetu mosa rmengo Soro Gibeah hiya ka seediq Jip: “Uka yami hini ka Dawid, gaga meeniq qbrangan ddgiyaq lmiqu. Uxe gaga tgleing tgtruma ddgiyaq Xakilah brenux nrao peni? 20Saya, qbsuran paru! Pdai nanak lnglungan su hmeruc eyah hini. Quri so yami we, ida miyan sbege baga su ka heya.” 21Rmengo ka Soro: “Tai so smbleyaq munan ka Utux Tmninun. Ado lmngelung namu kenan han. 22Braho maku osa mbrinah dungal, sai tgleus ba qmita. Qtai bale ga in ka gaga na niqan ma, diima ka gaga mtheyaq hiya. Ado rmnengo kenan ka seediq we, mkela ba tmraki ka dheya. 23Qtai bale, gimi ka kana ndaan na mgleing. Kiya de yahi ku hiya pgkela ba rmengo. Kiya ka mptheyaq ku sunan mosa. Nasi gaga ddxeral namu hiya we, asi mu ka speeyah kana sapah Yehudah migin heya.” 24Kiya de mtutuy ka seediq Jip, tlaale mosa Soro mquri Jip ka dheya.
Kiya we, Dawid ma dseediq na we gisu meeniq tadus brenux Maon gaga Arabah tgtruma breenux bnaquy hiya. 25Meyah migin Dawid ka Soro ma dseediq na. Meyah rmengo Dawid ka duma seediq, kiya de hmeruc mosa btunux hiya ka heya ma, meniq tadus brenux Maun. Mbahang ka Soro de mosa tadus brenux Maon smdurak Dawid. 26Gisu mkkesa ddgiyaq hini ka Soro ma, Dawid ma dseediq na we gisu mkkesa ddgiyaq sipo kiya. Asi nhari mosa tgleing Soro ka Dawid. Soro ma dseediq na we, asi tmlibu ma mqerac Dawid ma dseediq na ka dheya. 27Niqan ka 1 snkgulan meyah rmengo Soro: “Seediq Peliset we, gisu kmremux gmeeluk lualang, kiya de mbrinah nhari!” 28Kiya de ini smdurak Dawid ka Soro ma, mbrinah mccebu seediq Peliset. Kiya de Sela Hamaxleqot, kesun daha tmngayan ka dxeral hiya. 29Dawid we mqquri tgbaro, mosa meeniq qbrangan ddgiyaq Eyn Gediy.
Currently Selected:
1 Samuel 23: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
