1 Samuel 22
22
Phuqil Msapuh ka Soro
1Mlatac peeyah hiya ka Dawid, qduriq mosa tgleing beling Adulam. Mbahang ka mtswai na ma kana tnsapah tama na de, hmeruc mosa hiya kana. 2Kana mqraqil, niqan kusa ma, mqraqil lhebun daha we, meyah pmsseli Dawid hiya kana. Kiya de heya ka mdudul dheya. Yaa ba 4'00 seediq ka smnegul heya. 3Dawid we peeyah hiya mosa Micpeh gaga Moab. Rngagan na ka qbsuran paru Moab: “Braho su peeyah ptheyaq yamu ka tama ma bubu mu. Betaq ku mkela mesa maanu ka sooda ku na Utux Baro.” 4Dawid we madis tama ma bubu na mosa berah qbsuran paru Moab. Kana ali nniqan na dgiyaq qbrangan hiya ka Dawid we, ida gaga meeniq qbsuran paru Moab hiya ka tama ma bubu na uri. 5Gad mpgeela kari we rmengo Dawid: “Iya eeniq qbrangan dgiyaq ka isu. Asi osa dxeral Yehudah.” Kiya de mosa theruy ka Dawid ma, betaq llmiqu Xeret.
6Soro ge, mbahang nniqan Dawid ma dseediq smnegul ka heya. Gisu tleung toma qhuni lebi meeniq Gibeah ka Soro. Gaga dmoi smbrangan ka baga na ma, mheyu ssiyo na ka kana qbsuran mdayo heya. 7Soro we rmengo qbsuran mdayo gaga mheyu ssiyo na: “Seediq Binyamin! Qbahang! Laqi Yisay we mpdehuk mege qnpahan ma qnpahan lipas txtaxa namu ka heya peni? Dehuk pheyu qbsuran 10'00 supi ma 1'00 supi ka heya peni? 8Betaq namu so nii psseli tbrinah kenan! Mnoda psdehu laqi mu ma laqi Yisay ciida we, uka ka seediq rmengo kenan. Laqi mu ka rmnengo dqbsuran mdayo tbrinah kenan. Mntena so ali saya, uka ka seediq mneeru kenan duri ma, pslhebun kenan.” 9Ciida, mheyu dqbsuran mdayo Soro hiya ka Doeg seediq Edom we, cmiyuk rmengo: “Qntaan mu mquri Nob betaq Aximelek laqi Axitub hiya ka laqi Yisay. 10Aximelek ge, sniling na Utux Tmninun ma biqan na uqun. Kiya uri we sbege na heya ka hlmadac Golyat seediq Peliset.”
11Kiya de smkagul seediq mlawa Aximelek msapuh laqi Axitub ma kana tnsapah tama na, kiya ka kana msapuh gaga Nob hiya. Meyah qbsuran paru hiya ka kana daha. 12Rmengo ka Soro: “Laqi Axitub, Qbahang!” Cmiyuk ka heya: “Pusu tnsapah mu! Gisu ku hini.” 13Rmengo heya ka Soro: “Ma su mtheyaq laqi Yisay tbrinah kenan, biqan su uqun ma hlmadac ma, ririh heya slingan su ka Utux Baro uri ma tbrinah kenan so ka ali saya ho?” 14Cmiyuk qbsuran paru ka Aximelek: “Ckceka dqbsuran mdayo sunan we, ima ka mddungus riyung mntena Dawid ho? Ama su ka heya, kiya uri we qbsuran mdudul mheyu ssiyo su ka heya uri. Kiya we spruun bale dseediq sapah su hiya uri. 15Wano saya ka prading ku smiling heya quri Utux Baro peni? Uxe so kiya! Iya ku biqi qnquwan noda ka yaku ma kana tnsapah mu. Ado ani paru ma biciq ka noda nii we, ini bale kela ka tnqliyan su.” 16Rmengo ka qbsuran paru: “Aximelek, isu ma kana tnsapah tama su we pphqilun kana!” 17Kiya de tmgesa mpqlahang gaga mheyu ssiyo na ka qbsuran paru: “Spgeriq heyi namu sai phuqil ka msapuh Utux Tmninun! Ado dmnayo Dawid ka dheya ma, mkela wada qduriq ka Dawid we, ini rengo kenan ka dheya.” Kiya we, ini kmsruwa dmoi baga daha phuqil msapuh ka dheya. 18Rmengo Doeg ka qbsuran paru: “Isu ka spgeriq heyi su osa phuqil dmsapuh!” Kiya de mspgeriq heyi na mosa phuqil dmsapuh ka Doeg seediq Edom. Ali ciida ka wada phqilun mlukus ipudi snmalu malu nuqah we, 85 heyi. 19Dungal we dmoi hlmadac wada phqilun kana ka rseno ma mqedil, laqi ma gisu mnunuh gaga meeniq Nob alang msapuh hiya. Dungal we dmoi hlmadac phuqil dapa, miric ma, dapa roba.
20Wada qduriq ka 1 laqi Aximelek laqi Axitub. Ngayan na we Ebyatar. Mosa qduriq Dawid hiya ka heya. 21Kiya de Ebyatar we srengo na Dawid kana ka noda Soro pnhuqil msapuh Utux Tmninun. 22Rmengo Ebyatar ka Dawid: “Ali ciida qntaan mu hiya ka Doeg seediq Edom. Ida mu klaun maha rmengo Soro ka heya. Wada phqilun kana ka tnsapah su we, ririh so yaku ka kiya. 23Ani su nak meniq hini, iya kiicu. Ado migin knuudus su we, gisu migin knuudus mu uri. Meeniq su hini we, tduwa ku qmlahang sunan.”
Currently Selected:
1 Samuel 22: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
