1 Samuel 21
21
Qduriq Soro ka Dawid
1Dawid we dehuk Aximelek msapuh gaga Nob hiya. Mkrkerang smterung Dawid ka Aximelek ma rmengo heya: “Ma su murux ba ma, uka ka tqene sunan ho?” 2Rmengo Aximelek ka Dawid: “Rmnengo 1 kari ka qbsuran paru, kesun ku na: ‘Smkagul ku sunan ma, oda tnugsaan su mu nii we, iya bale pklai seediq.’ Kiya de, wada mu skgulun rmengo mosa icil ka duma tnqliyan mu. 3Niqan maanu ka baga su saya ho? Braho su biqi ku 5 pang ma, uxe uri we duma uqun slayan su.” 4Rmengo Dawid ka msapuh: “Gaga baga mu we uka ka pang bale. Wano ba pang mrtaso. Asi ka sbege riso uxe mtheyaq mqedil kiya.” 5Cmiyuk msapuh ka Dawid: “Bale ba yami we, ini miyan theyaq mqedil, mntena so mosa ku mccebu ciida. Mkkesa miyan klaali we, heyi tnqliyan su we psaanak miyan prtaso uri. So kiya de, uxe miyan psaanak prtaso ka yami nanak da peni?” 6Kiya de mege pang heya ka msapuh. Ado uka ka pang bale, wano ba pang snapuh berah Utux Tmninun. Kiya ka mnangal pang pnryuxan hani mtilux.
7Ali ciida, gaga meeniq berah Utux Tmninun hiya ka tnqliyan Soro. Ngayan na we Doeg seediq Edom ma, mdudul dmtabu Soro.
8Rmengo Aximelek ka Dawid: “Ya niqan smbrangan uxe we hlmadac ka baga su ho? Ado ptbeyax ka ooda qbsuran paru, kiya de ani hlmadac ma qyqeya mccebu we ini ku adis kana.” 9Rmengo ka msapuh: “Hlmadac pnhuqil su Golyat seediq Peliset meniq ayu Ila hiya. Qtai! Gisu lbuun galiq ma, gaga psaun bukuy ipudi ka kiya. Wano ba kiya ka ngngalun su de, uka ani maanu di.” Rmengo ka Dawid: “Uka ani maanu mgkala kiya! Biqi ku hiya!”
10Ali ciida, mtutuy ka Dawid ma qduriq Soro, mosa betaq Akis qbsuran paru Gat. 11Rmengo heya ka qbsuran mdayo Akis: “Uxe Dawid qbsuran paru hiya ka seediq nii peni? Dseediq hiya we mnqqaras ba kmeeki muuyas:
‘Soro we phuqil 10'00 heyi,
Dawid we phuqil 1 mang heyi.’
Uxe heya ka gaga srengo peni?” 12Dawid we, psaun na lhebun na ka kari nii. Kiya de miicu Akis qbsuran paru Gat ka heya. 13Kiya de kmpriyux hnyegan na meniq berah dseediq hiya ka Dawid. Mnnangi so mkuni tunux ma mkuni ckceka daha ma, mkmhemuc matis rhengun alang ma, thrulas betaq ngudus na. 14Rmengo thlangan mdayo heya ka Akis: “Tai bino! Nii mkuni tunux ka seediq nii di! Ma namu desun hini ka heya? 15Ya ini baka ka seediq mu mkuni tunux hini, lexun namu madis pkuni berah mu ka seediq nii? Ya ani nak mremux tnsapah mu ka seediq nii peni?”
Currently Selected:
1 Samuel 21: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
