1 Samuel 20
20
Dmayo Dawid ka Yehonatan
1Qduriq peeyah Nayot gaga Ramah ka Dawid ma, meyah berah Yehonatan ma, rmengo heya: “Hmnuwa ku peni? Maanu ka qnquwan mu noda ma, maanu ba ka qnquwan mu noda meniq berah tama su ho? Kiya ka betaq so nii migin aangal knuudus mu ka heya?” 2Rmengo heya ka Yehonatan: “Uxe mpuso kiya! Uxe su mphuqil ka isu. Qtai! Noda tama mu we, ani paru ma biciq we, uka ka ini na rngagi kenan. Hmuwa ma mgleing oda nii ka tama mu? Uxe ba mpuso kiya!” 3Smdehu rmengo dungal ka Dawid: “Mkela gmaalu su kenan ka tama su. Kiya de rmengo ka heya: ‘Iya ba pgklai Yehonatan ka ooda nii. Kiya ka uxe mpslhebun ka heya.’ Mptiyu ku Utux Tmninun muudus ani knuwan psdehu ma, mtiyu ku knuudus su psdehu, meyah kingal ba qango de mphuqil ku ka yaku di.” 4Rmengo Dawid ka Yehonatan: “So ka pnesa lhebun su we, ida mu daun.” 5Rmengo Yehonatan ka Dawid: “Qtai! Kusun we smseman prading tgkingal ali. Asi ku ka mosa theyaq mekan qbsuran paru ka yaku. Braho su, liingi ku qnpahan betaq mk3 rabi. 6Nasi qmita uka ka uuqan hiya ka yaku de, rengo ka isu: ‘Rmnengo mesa kenan ka Dawid, so ssruwa pbrinah mosa Betlexem alang na nanak. Ado kana tnsapah na we, gisu mege snapuh knkawas hiya ka dheya.’ 7Netun malu mesa ka kari tama su de, mptbale ka tnqliyan su dhenu. Netun mseang paru ka heya de, ida su klaun mooda naqah oda ka heya. 8Braho su glaani ka tnqliyan su. Ado mnoda su smndehu berah Utux Tmninun ka isu. Netun ku niqan qnquwan noda we, asi ku hiya phqili. Hwaun saku mege tama su ka yaku dungal?” 9Rmengo ka Yehonatan: “Uka ba ka so kiya! Nasi mu klaun ba mphuqil sunan ka tama mu de, hmuwa ku lux ini rengo sunan peni?” 10Rmengo Yehonatan ka Dawid: “Netun sqama seang na cmiyuk sunan ka tama su we, ima ka meeyah rmengo kenan da peni?” 11Cmiyuk Dawid ka Yehonatan: “Aguh, nita qnpahan.” Kiya de mosa qnpahan ka 2 daha heyi.
12Rmengo Dawid ka Yehonatan: “Tai so Utux Tmninun, Utux Baro nuIsrael ka mpgkela. Ali so nii kusun, uxe we mkaxa, kruuyun mu ka lnglungan tama mu. Qtai! Nasi malu ka lnglungan na quri Dawid we, ima ka uxe mpskagul seediq pgkela sunan? 13Netun niqan lnglungan na pphuqil isu ka tama mu ma, ini ku rengo sunan ma pbleyaq pqduriq sunan de, tai so pkdira riyung Yehonatan ka Utux Tmninun. Tai so mtheyaq sunan ka Utux Tmninun, mntena so mntheyaq tama mu cuuxal uri. 14Pdai ku gnhuwe Utux Tmninun gmaalu kenan. So ku uxe mphuqil muudus ku ciida. 15Kiya ka mooda phuqil kana pais Dawid ciida ka Utux Tmninun we, iya bale psteqi gnhuwe su tnsapah mu ka isu.” 16Kiya de psdehu ka Yehonatan ma Dawid: “Tai so mciyuk pais Dawid ka Utux Tmninun.” 17Yehonatan we gmaalu Dawid mntena gmaalu knuudus na nanak. Kiya de moda psdehu dungal ka heya.
18Rmengo heya ka Yehonatan: “Tgkingal ali ka kusun. Tluungan su we maha uka seediq tleung de, mpkela uka su hiya ka seediq. 19Betaq mk3 ali de, asi su ka mosa hmeruc mkkesa bbaro elu ma, osa nsaan su mgleing pkelu so ooda ciida. Tara ssiyo btunux Ejel hiya. 20Mpquri ku ssiyo btunux mpcebu ku 3 raqic, mntena so nii cmebu raqic. 21Qtai! Mpskagul ku laqi ma, mprengo ku: ‘Sai migin ka budi.’ Nasi ku mlawa rmengo laqi: ‘Qtai! Gaga tghini su ka budi, adis hini.’ Kiya de tduwa su tbleyaq mbrinah ka isu. Mpsdehu ku Utux Tmninun muudus ani knuwan, uxe su mhuwa ka isu. 22Nasi ku rmengo laqi: ‘Qtai! Gaga thngali su ka raqic’ de, asi su ka qduriq ka isu. Ado gisu smkagul sunan ka Utux Tmninun. 23Quri so kari rnengo ta isu ma yaku de, qtai, mpgkeela ckceka ta betaq ani knuwan ka Utux Tmninun.”
24Kiya de mosa tgleing dxeral nrao ka Dawid. Betaq smseman prading tgkingal ali de, dehuk ka uqan hnpure qbsuran paru. 25Kiya de ida tleung tluungan na gaga ssiyo qnabil ka qbsuran paru. Mbbege berah daha qbsuran paru ka Yehonatan ma, tleung ssiyo Soro ka Abner. Kiya we uka tluungan Dawid.
26Ini rengo ani maanu ali ciida ka Soro. Ado rmengo ka heya: “Ida ba yaa niqan ooda na ka Dawid, uxe uri we gaga mrutiq heyi ma ini kbgurah na.” 27Tg2 ali de, ida uka tleung ka tluungan Dawid na. Rmengo Yehonatan laqi na ka Soro: “Ali ciga ma ali saya we, hmuwa ini eyah mekan ka laqi Yisay ho?” 28Cmiyuk Soro ka Yehonatan: “Pnesa rmengo kenan psruwa brinah Betlexem ka Dawid. 29Rmengo kenan: ‘Braho su psai ku hiya. Ado tnsapah mu we niqan oda ddaun miyan mege smnapuh. Meyah mlawa kenan ka dqbsuran mu. Nasi saku ghwai berah su, srwai ku hiya mosa tqita mtswai mu.’ Kiya ka ini dehuk meyah mekan hnpure qbsuran paru ka Dawid.”
30Sqama seang na Yehonatan ka Soro ma rmengo: “Isu nii ka uka rrihan, nlaqi mqedil uka stmaan. Inu uxe ku pkela gisu su gmao laqi Yisay ka isu ma, pqsiqa su sunan nanak, ptuura su pqsiqa pnbrasan bubu su ho? 31Nasi ida muudus bobo dxeral 1 ali ka laqi Yisay we, uxe su meeniq ka isu ma qnlhangan su. Saya asi skagul seediq ma, desi hini ka heya. Ado asi ka phqilun ka heya.” 32Cmiyuk rmengo Soro tama na ka Yehonatan: “Ma asi ka phqilun ka heya? Hmnuwa?” 33Qmada smbrangan Yehonatan ka Soro. Kiya de Yehonatan we, klaun na ida qmphuqil Dawid ka tama na. 34Kiya de asi sqama seang mheyu peeyah uqan ka Yehonatan. Ini ekan hnpure ka tg2 ali nii. Ado pslhebun Dawid ka heya ma, wada pqsiqa smngayan Dawid ka tama na uri.
35Mgrebu ba so kusun, ida so ali pnrngagan daha ka Yehonatan ma Dawid mosa dxeral nrao ma, maadis 1 laqi smnegul Yehonatan. 36Rngagan na ka laqi: “Sai tmalang mangal ka raqic pnsaan mu.” Tmalang mosa ka laqi. Kiya de hmrinas raqic tgberah laqi ka Yehonatan. 37Betaq gaga dhekan raqic hiya ka laqi de, mlawa laqi ka Yehonatan: “Uxe gaga thngali su ka raqic peni?” 38Rmengo laqi dungal ka Yehonatan: “Osa nhari, Iya heyu hiya!” Kiya de mosa lmamu raqic ka laqi ma mbrinah tnpusu sapah na hiya. 39Ini kela ani maanu noda na ka laqi nii. Wano ba Yehonatan ma Dawid ka mkela noda nii. 40Yehonatan ge, sbege na laqi ka raqic ma budi de, rmengo heya: “Desi alang hiya ka nii.” 41Wada ka laqi de, asi tkriyak peeyah tgtruma ka Dawid ma, tgtemaq thmuku mn3 dxeral. Pttunguh ka dheya ma mtheyaq lmingis. Mrana paru lingis na qnnaqah kuxul ka Dawid. 42Rmengo Dawid ka Yehonatan: “Tbleyaq mosa ka isu! Ado 2 ta we mnoda ta psdehu ngayan Utux Tmninun: ‘Tai so mpgkela ckceka ta ma lqlaqi mslutuc ta betaq ani knuwan ka Utux Tmninun.’” Kiya de wada ka Dawid de, mbrinah alang ka Yehonatan da.
Currently Selected:
1 Samuel 20: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
