1 Samuel 19
19
Tmraqil Dawid ka Soro
1Tmgesa Yonatan laqi na ma dqbsuran mdayo heya quri pphuqil Dawid ka Soro. Kiya de Yehonatan laqi Soro we gmaalu bale Dawid ka heya. 2Rmengo Dawid ka Yehonatan: “Soro tama mu we kmphuqil sunan. Qlahang ba saya ka isu. Mgrebu so kusun, osa tgleing uxe nsaan seediq. 3Mosa ku nganguc nniqan su tgleing hiya. Mpheyu ku ssiyo tama mu ma mpprengo ku quri isu. Teta so hmuwa de, rngagun misu.” 4Yehonatan ge, stndahu na rmengo Soro tama na ka Dawid, rmengo heya: “Qbsuran paru. Iya pniqi qnquwan noda ka Dawid tnqliyan su. Ado heya we uka qnquwan noda na sunan. Noda na we gisu paru bale rrihan su kana. 5Heya we, mbeyax riyung phuqil seediq Peliset. Kiya uri we betaq dmoi baga kana Israel ka Utux Tmninun. Qntaan su ka ciida ma, qrasun bale uri. Hmuwa ma su lux mooda qnquwan noda, psdara uka qnquwan seediq ma, mmhemuc su phuqil Dawid ho?” 6Mbahang kari Yehonatan ka Soro de, smdehu quri Utux Tmninun muudus ani knuwan ka heya: “Uxe ku mphuqil heya.” 7Kiya de mlawa Dawid ka Yehonatan ma srengo na heya kana ka ooda ni. Yehonatan we madis Dawid mosa mita Soro. Kiya de, mntena cuuxal ida mheyu berah Soro ka heya.
8Bobo na de, niqan dungal ka mccebu. Mosa nganguc ma mccebu seediq Peliset ka Dawid. Wada na ini baka ka dheya ma, qduriq peeyah berah na kana ka dheya. 9Kiya we, meyah meeniq heyi Soro dungal ka bgihur naqah pneyah Utux Tmninun. Soro we dmoi smbrangan tleung sapah truma. Dawid we gisu tmubu tubu ka baga na. 10Soro we, mkmetaq smbrangan Dawid ka heya ma, ssatang na pttei qnabil heya. Kiya we, wada qduriq ka heya ma, metaq qnabil hiya ka smbrangan Soro. Rabi ciida, qduriq ka Dawid ma mosa mgleing.
11Soro we, smkagul snkgulan mosa qmlahang sapah Dawid hiya. Tmara lmedax ka karac de, phqilun na ka heya. Mikal mqedil Dawid we, rmengo Dawid: “Nasi su ini qduriq keeman saya de, phqilun su daha kusun di.” 12Kiya de Mikal we psdduyun na snuyuk ptuting peeyah beling ka Dawid ma pqdriqun na. Kiya de wada qduriq ma mgleing ka Dawid. 13Mikal we, psaun na bobo qlapo ka tikung sapah. Tunux na we, tpnuwan na ubal miric ka tunux na ma bungan na lukus. 14Smkagul snkgulan meeyah qmeerac Dawid ka Soro. Rmengo ka Mikal: “Gaga mnarux ka heya.” 15Dungal we smkagul snkgulan mosa qmita Dawid ka Soro, rmengo: “Spui dmidil qlapo ka heya ma adis hini. Klaun mu phuqil ka heya.” 16Mremux sapah ka snkgulan. Qtai! Tikung ka gaga bobo qlapo. Tunux na we, gaga tpunu bobo ubal miric. 17Rmengo Mikal ka Soro: “Hmuwa ma su so nii mberiq kenan? Wada su pqdriqun ka pais mu?” Rmengo Soro ka Mikal: “Rmengo kenan ka heya: ‘Psai ku ka yaku! Ima ka mphuqil sunan peni?’”
18Qduriq ka Dawid we mosa Ramah nniqan Samuel hiya. Srengo na heya kana ka ndaan na quri heya ka Soro. Kiya de mosa meniq Nayot ka heya ma Samuel. 19Niqan ka seediq mosa mneeru Soro: “Qtai! Gaga Nayot Ramah hiya ka Dawid.” 20Smkagul duma snkgulan mosa qmerac Dawid ka Soro. Qmnita gisu rmengo kari pgkela ka 1 rahul mpgeela kari. Kiya we Samuel we, dmudul ckceka daha ka heya. Kiya de, snkgulan Soro we, gisu rmengo kari pneyah Bgihur Utux Baro ka dheya uri. 21Niqan ka seediq mosa mneru Soro. Kiya de smkagul snkgulan dungal ka heya. Ida rmengo kari pgkela ka dheya uri. Mn3 smkagul snkgulan ka Soro, kiya we ida rmengo kari pgkela ka dheya uri. 22Kiya de asi osa Ramah heya nanak ka Soro. Dehuk Seku hghugan qsiya paru de, smiling seediq: “Gaga inu ka Samuel ma Dawid ho?” Rmengo ka duma seediq: “Qtai! Gaga Nayot Rama.” 23Kiya de mquri hiya ka heya, betaq Nayot Ramah. Meyah heya ka Bgihur Utux Baro. Mkkesa ciida we, ida rmengo kari pgkela ka heya ma betaq Nayot Ramah hiya. 24Lmhelah lukus ka heya uri ma, rmengo kari pgkela berah Samuel uri. 1 ali ma 1 rabi ida kiya mbberas sbaang. Kiya de, rmengo ka duma seediq: “Gaga ckceka dmpgeela kari ka Soro uri ho?”
Currently Selected:
1 Samuel 19: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
