1 Samuel 15

Mccebu Daha Seediq Amaleq

1Rmengo Soro ka Samuel: “Smnkagul kenan ka Utux Tmninun ma hnrigan misu abura mqbsuran paru ma mpqlahang su seediq na Israel ka isu. Saya we, asi su ka mbahang kari Utux Tmninun. 2So nii kari na ka Utux Tmninun Mdoi Kana Supi: ‘Mnlatac peeyah Micrayim mnoda elu ciida ka seediq Israel we, wada hmuwa mesa ka seediq Amaleq ma pqnqihan na yamu we, asi mu ka pkdraun. 3Saya, mosa su mccebu seediq Amaleq ka isu. Phqili kana ka dheya ma iya bale krwahi. Drseno ma mqedil, lqlaqi ma gaga mnunuh. Kiya uri we, dapa, miric, dapa bukung ma, dapa roba we phqili kana.’”

4Kiya de psseli kana seediq meniq Telim hiya ka Soro ma smepu dheya. Kana ba we 20 mang ka supi mkkesa ma, 1 mang ka seediq Yehudah. 5Dehuk alang paru Amaleq ka Soro ma, qmburang ayu hiya ka dheya. 6Rmengo seediq Qeyniy ka Soro: “Swaye peeyah seediq Amaleq ka yamu ma, osa di! So miyan uxe pspuun phuqil seediq Amaleq ka dyamu. Ado mnlatac pneeyah Micrayim ciida ka seediq Israel we, snbleyaq namu dheya.” Kiya de wada smwaye peeyah seediq Amaleq ka seediq Qeyniy. 7Cmebu seediq Amaleq ka Soro, peeyah Xawilah betaq Sur quri nklaan hido Micrayim. 8Betaq na qrapun ka Agag qbsuran paru Amaleq ma, sdoi daha hlmadac phuqil kana ka dseediq Amaleq. 9Kiya de Soro ma dseediq we, krwahun daha ka Agag ma, krwahun daha ka dapa malu ba, miric, wawa dapa, wawa miric ma, kana qyqeya malu ma, ini daha phqili. Kiya de kana uxe daha kuxi ma uka bbrihan na we, wada daha phqilun kana.

Wada Lixan ka Soro

10Meyah rmengo Samuel ka kari Utux Tmninun: 11“Ani ba rabang pnheyu ku qbsuran paru Soro nii. Ado kmpriyux ini snegul kenan ma, ini qbahang kari mu ka heya.” Kiya de mseang ba ka Samuel ma, asi ba pksrabi mqquri Utux Tmninun tddiras dmurun ka heya. 12Mtutuy mgrebu ba so kusun ka Samuel ma, mosa qmita Soro ka heya. Meyah rmengo Samuel ka seediq: “Dehuk Karmel ka Soro. Qtai! Pnteetu 1 btunux so uxe cchungi heya nanak ka heya. Dungal we hmeruc betaq Gilgal.” 13Betaq Soro hiya ka Samuel ma, rmengo heya ka Soro: “Tai so smbleyaq sunan ka Utux Tmninun! Wada mu dhekun ba muyu tnugesa Utux Tmninun di.” 14Rmengo ka Samuel: “Mnbahang rengac miric, dapa ka birac mu we, maanu ka kiya ho?” 15Cmiyuk ka Soro: “Nadis seediq pneeyah seediq Amaleq hiya ka nii. Ado smkuxul malu ba dapa ma miric bbege daha Utux Tmninun, Utux Baro su ka dheya. Msngari na de, wada miyan phqilun kana di!” 16Rmengo Soro ka Samuel: “Glmelux quwaq su! Tara ku mprengo ku sunan ka rnengo ku na Utux Tmninun rabi skeeman.” Rmengo ka Soro: “Rngagi ku.”

17Rmengo ka Samuel: “Ana ya su tgbiciq ba qmita sunan we, uxe su gaga ngalun qbsuran ba mdudul kana pnswayan rudan Israel ka isu peni? Utux Tmninun ka cmnuwaq abura sunan kiya ka mqbsuran su paru Israel. 18Smnkagul sunan ka Utux Tmninun ma rmnengo: ‘Sai phuqil ma cmebu ka seediq Amaleq mnoda qnnaqah noda ma, betaq wada phqilun kana ka dheya.’ 19Hmuwa, ma su ini qbahang kari Utux Tmninun? Ma su tbbeyax mqquri qyqeya ma, ini mndungus Utux Tmninun ka noda su ho?” 20Rmengo Samuel ka Soro: “Wada ku mbahang kari Utux Tmninun ma, mnoda ku elu snkagul na ma, betaq mu qrapun ka Agag qbsuran paru Amaleq ma phuqil kana seediq Amaleq. 21Kiya de, peeyah gnlekan mangal dapa ma miric ka seediq, nii we knmalu na naka pkuuka. Bbege daha Utux Tmninun, Utux Baro su meniq Gilgal hiya.” 22Rmengo ka Samuel:

“Smkuxul snapuh psqama ma mege snapuh ka Utux Tmninun,

kiya we uxe mgkala smkuxul mbahang kari na peni?

Qtai! Mgkala mege snapuh ka mbahang kari pnosa na,

mgkala daruk balas miric ka thei kari.

23Mntena qnquwan noda ka tbrinah ma dmpsbunul,

mntena qnquwan noda ka mkkere lhebun ma thmuku tikung.

Ado qmnada su kari pnosa Utux Tmninun ka isu,

Utux Tmninun we, mqada sunan peeyah qnbsranan su paru duri.”

Ptuura Qnquwan Noda Na ka Soro

24Rmengo Samuel ka Soro: “Bale ba niqan ku qnquwan noda di! Wada ku tbrinah rnengo su ma tnugesa Utux Tmninun di. Ado miicu ku seediq ma, wada ku mbahang kari daha. 25Saya, ani su ba rabang, srwai ku heya ka qnquwan noda mu. Theyaq kenan mbrinah sapah, tai ku so maha thmuku Utux Tmninun.” 26Rmengo Soro ka Samuel: “Uxe ku mptqene sunan mosa. Ado qmada su rnengo Utux Tmninun ka isu ma, Utux Tmninun we mqada mpqbsuran paru Israel sunan ka heya uri.” 27Mspgeriq mmaha ka Samuel de, dmoi palic lukus mgbaro na ka Soro ma, asi msgaliq ka lukus da. 28Rmengo heya ka Samuel: “Utux Tmninun we, wada na pstequn peeyah isu saya ka qlhangan Israel. Qlhangan nii we sbege na 1 seediq mgkala sunan. 29Ini qberiq ma ini psbrinah lmngelung ka Paru Beyax nuIsrael. Ado uxe seediq bobo dxeral ka heya ma, ini psberih lmngelung ka heya.” 30Rmengo ka Soro: “Niqan qnquwan noda mu di. Braho su sprui ku berah rdrudan seediq ma dseediq Israel, theyaq kenan mbrinah. Klaun mu mosa thmuku ka Utux Tmninun, Utux Baro su.” 31Kiya de Samuel we tqene Soro mosa ma, mosa thmuku Utux Tmninun ka Soro.

32Rmengo ka Samuel: “Adis kenan hini ka Asia qbsuran paru Amaleq.” Kiya de mqaras riyung meyah berah na ka Agag ge, rmengo: “Wada hmrinas ka qnrqilan mhuqil di!” 33Rmengo ka Samuel: “Dmnoi su hlmadac pkuuka laqi mqrinuc. Kiya de maha so kiya mphuqil laqi ckceka mqedil hiya ka bubu su uri.” Kiya de Samuel ge, phqilun na berah Utux Tmninun Gilgal hiya ka Agag.

34Mbrinah meyah Ramah ka Samuel. Soro we mbrinah mosa nniqan sapah na nanak Gibeah ka heya. 35Betaq ali hnqilan Samuel we, ida ini tqita Soro ka heya. Kiya de Samuel we sqnaqah na kuxul ka Soro. Ado wada pqnaqah kuxul Utux Tmninun pnheyu Soro ngalan qbsuran paru Israel ka heya.

Currently Selected:

1 Samuel 15: Stgdaya

Highlight

Copy