1 Samuel 14
14
Ndaan Mccebu Yehonatan
1Niqan 1 ali, Yonatan laqi Soro we, rmengo 1 riso gaga dmoi qyqeya mccebu: “Aguh, sae ta kobu supi seediq Peliset.” Kiya we, ini na rngagi ka tama na. 2Ciida we, meniq nganguc alang Gibeah hiya ka Soro, tleung toma qhuni qutirodux gaga Migron. Seediq smnegul heya we yaa ba 6'00 heyi. 3Meniq hiya we, Axiyah laqi Axitub mlukus ipudi. Mtswai Ikabod, laqi Pinexas ma, lqlaqi laqi Eriy ka heya. Mnsapuh Utux Tmninun Siylo hiya cuuxal ka Eriy. Wada peeyah hiya ka Yonatan we, ini kela ka seediq. 4Yonatan we mooda elu eyux mosa quri kobu supi Peliset hiya. Ssiyo 2 elu eyux nii we niqan pnkingal kdere kana: 1 we kesun Bocec. 1 we kesun Segeh. 5Mqquri tgbaro sipo ba Mikmas ka 1. 1 we mqquri tgtruma sipo ba Geba.
6Rmengo riso ga dmoi qyqeya mccebu ka Yehonatan: “Aguh, sae ta kobu dsupi uxe mnoda ptgaya psalak hiya. Nhuwa dmayo peeyah beyax ita ka Utux Tmninun. Ado pkbeyax seediq ka Utux Tmninun we, ini qita hbaro ma biciq seediq.” 7Cmiyuk ka riso ga dmoi qyqeya mccebu: “Seung nanak lnglungan su moda. Osa baro, Qtai! Mpsnegul ku sunan ma mptena sunan ka lhebun mu.” 8Rmengo ka Yehonatan: “Qtai! Mpntaril ta dseediq hiya ma maha ta mtqita dheya. 9Nasi rmengo ita ka dheya: ‘Heyu, Tara miyan meyah yamu hiya’ de, heyu ta hiya ma, uxe ta maha dheya hiya. 10Nasi rmengo so nii ka dheya: ‘Eyah mnkala hini’ de, mosa ta baro. Ado Utux Tmninun we, wada na sbege baga ta ka dheya da. Nii ka pnskraya tana.” 11Pqtaan na dsupi Peliset ka 2 heyi nii. Rmengo ka seediq Peliset: “Qtai! Ga peeyah beling tnugliingan daha pkriyak ka seediq Hiburu di!” 12Mlawa Yonatan ma mdoi qyqeya na ka dsupi qmburang: “Eyah baro hini. Rrengo mu yamu ka 1 ooda.” Kiya de rmengo mdoi qyqeya ka Yehonatan: “Eyah smnegul kenan. Ado Utux Tmninun we wada na sbege baga seediq Israel ka dheya di.” 13Mkkarang bawa ni papak na mnkala mosa baro ka Yonatan ma, smnegul heya mosa ka mdoi qyqeya na uri. Mtakur berah Yehonatan ka seediq Peliset. Smnegul heya ka mdoi qyqeya mccebu ma phuqil dheya. 14Plaale ba pnhuqil Yonatan ma mdoi qyqeya na we yaa ba 20 heyi. Kana nii we mneeniq dxeral dmeka 1 cmite. 15Kiya de, ga meniq kobu supi, qnpahan ma, ga meniq ckceka seediq we, mngungu riyung. Dsupi qmburang ma supi mpkremux uri we mngungu kana. Mlgelu ka dxeral uri. Kniicu pneeyah Utux Baro ka nii.
Ini Baka ka Seediq Peliset
16Qtaan supi mpqlahang Soro gaga meeniq Gibeah dxeral Binyamin. Qtai! Gisu mrrudu ka kana supi Peliset ma, trrehak qduriq ani inu. 17Kiya de rmengo seediq smnegul heya ka Soro: “Osa smepu knhbaro seediq, teta ima ka wada mplatac peeyah hini.” Smepu ka dheya. Qtai! Yonatan ma mdoi qyqeya mccebu na we uka hiya. 18Ciida, meniq seediq Israel hiya ka kulu pnsdhegan Utux Baro. Rmengo Axiyah ka Soro: “Adis hini ka kulu pnsdhegan Utux Baro.” 19Gisu mpprengo dmsapuh ka Soro ciida, krinah mrrudu ka kobu Peliset. Rmengo msapuh ka Soro: “Sange di!” 20Msseli mosa nniqan mccebu ka Soro ma kana seediq smnegul heya. Qtai! Gisu pphuqil dheya nanak ka seediq Peliset ma mrrudu riyung. 21Dseediq Hiburu tnuumal seediq Peliset pneeyah ani inu gaga meniq kobu daha we, mspgeriq tuumal dmayo dseediq Israel gaga smnegul Soro ma Yonatan. 22Dseediq Israel gaga tgleing ddgiyaq Eprayim, mnbahang wada qduriq ka seediq Peliset de, mlatac hiya smdurak cmebu Peliset ka dheya. 23Ali ciida, dmoi baga seediq Israel ka Utux Tmninun. Mccebu nii we betaq Bet Awen.
Mmhemuc Smdehu ka Soro
24Ali ciida, muuwic riyung ka seediq Israel. Ado psdehu seediq ka Soro: “Kana ini tara mnhedu ku cmiyuk dpais mu betaq keeman ma, wada mekan uqun de, maangal snyusan.” Kiya de, ini ekan uqun kana ka seediq. 25Mosa bbuyu ka seediq. Qtai! Qtaan daha niqan beyuq walu ka dxeral. 26Mosa bbuyu ka seediq. Qtai! Msbbiyuq ka beyuq walu. Kiya we miicu mangal walu posa quwaq ka dheya. Ado kcugun daha ka pnsdehu kiya. 27Ini qbahang pnsdhegan tama na dseediq ka Yonatan, kiya de hkragun na ka hukuc gaga baga na ma, btaqun na ckceka beyuq walu ka tunux hukuc na ma, dmoi baga na posa quwaq. Kiya de asi kledax ka doriq na. 28Rmengo heya ka taxa seediq: “Mnoda psdehu bale dseediq ka tama su. Kiya ka mnekan ali saya we, asi ka rbaun. Kiya de, muuwic ka kana seediq.” 29Rmengo ka Yonatan: “Nii pqraqil dxeral nii ka tama mu. Qtai bino! Ani biciq ba ka walu wada mu tnuguhun we nii lmedax ba ka doriq mu. 30Ali saya, netun spooda nanak lnglungan daha mekan gneeluk daha pneeyah pais de, uxe naka rmabang egu ka seediq Peliset wada phqilun saya dhenu peni?”
31Ali ciida, phuqil seediq Peliset ka seediq Israel ma, peeyah Mikmas betaq Ayalon. Kiya de muuwic riyung ka seediq. 32Kiya de asi ptkeeyux quri gglekun, gmeeluk dapa, miric ma, wawa dapa. Asi daha phqili dxeral. Kiya de ida kiya thiqan dara we wada daha uqun ka heyi. 33Meyah rmengo Soro ka duma seediq: “Qtai! Mnekan heyi tnhiyan dara ka dseediq ma, niqan qnquwan noda daha Utux Tmninun.” Rmengo ka Soro: “Nii namu mooda tbrinah kenan. Ali saya, ptdoruy yaku hini kingal btunux paru!” 34Rmengo dungal ka Soro: “Osa mkrehak ckceka seediq ka yamu. Adis berah mu hini ka txtaxa dapa ma miric namu. Phqili ma ekan hini ma, iya bale angal noda tnhrian Utux Tmninun mekan heyi gaga thiqan dara.” Keeman ciida, desun daha ka dapa daha nanak ma, phqilun daha hiya. 35Soro we smalu 1 spuhan Utux Tmninun. Kiya ka prading ba smalu spuhan Utux Tmninun ka nii.
36Rmengo ka Soro: “Maha ta smdurak seediq Peliset ani keeman, mpgeeluk dheya betaq lmedax karac, uxe mu rngiun ani 1 seediq.” Rmengo ka seediq: “Manu qntaan su so kenu ka malu de, oda kiya!” Rmengo ka msapuh: “Pllayo ta smdaling Utux Baro hini han.” 37Kiya de smiling Utux Baro ka Soro: “Ye ini huwa mosa ku smdurak seediq Peliset? Bbege su baga seediq Israel ka dheya ho?” Kiya we, ali ciida ini ciyuk heya ka Utux Baro. 38Rmengo ka Soro: “Kana qbsuran mdudul seediq, eyah yaku hini kana. Gimun ta saya, pneeyah inu ka qnquwan noda nii. 39Mpsdehu ku Utux Tmninun muudus ani betaq knuwan mdoi baga Israel. Ani laqi mu Yonatan ka wada qnuuqu noda na we, asi mu ka phqilun uri.” Kiya de, uka ka seediq cmiyuk heya. 40Rmengo kana seediq Israel ka Soro: “Eniq quri icil hiya ka yamu. Yaku ma Yonatan laqi mu we meniq miyan icil hini.” Rmengo Soro ka seediq: “Maanu qtaan su malu de, oda kiya!” 41Soro we dmurun Utux Tmninun, Utux Baro nuIsrael: “Braho su tgsai miyan ka bale ba cniyuk su.” Mnoda blebil qreti we, Soro ma Yonatan ka mnangal. Uka ani maanu ka dseediq. 42Rmengo ka Soro: “Oda blebil qreti dungal, teta so yaku ho? Uxe uri we laqi mu Yonatan ho? Pdai miyan blebil qreti.” Yonatan ka wada mangal.
43Rmengo Yonatan ka Soro: “Rngagi ku hiya, mnoda su meepah manu?” Rmengo ka Yehonatan: “Wano ba dmnoi ku hukuc baga mu, sreeru mu tikuh ba beyuq walu ka puting hukuc mu ma, wada mu chepan. Qtai! Mphuqil ku di peni?” 44Rmengo ka Soro: “Yonatan, asi su ka mhuqil! Uxe de, tai so pkdira paru menan ka Utux Baro.” 45Rmengo Soro ka dseediq: “Paru riyung ndaan na dmoi baga Israel ka Yonatan we, phqilun na peni? Iya bale so kiya! Mpsdehu miyan Utux Tmninun muudus ani knuwan. Ani 1 snuunux na we uxe mptuting dxeral. Ado mntheyaq Utux Baro mneepah ali saya ka heya.” So kiya de, wada dmoi baga Yehonatan pqduriq hnqilan ka seediq. 46Mosa tgbaro ka Soro ma, ini osa smdurak seediq Peliset ka heya. Dseediq Peliset we mbrinah dxeral daha nanak uri.
Beyax Qbsuran Paru ma Tnsapah Soro
47Dmoi beyax mpqlahang qlhangan Israel ka Soro. Heya we murung pais ssiyo na ka heya. Kiya ka seediq Moab, Amon, Edom ma, dqbsuran paru Cobah ma dseediq Peliset. Ani inu nsaan na we ida na ini baka kana ka dheya. 48Paru ba pahung na mccebu ka Soro ma, ini na baka ka seediq Amaleq ma, dmoi baga Israel pqduriq baga mpgeeluk dheya.
49Laqi rseno Soro we Yonatan, Yiswiy ma, Malkiy Sua. 2 ka laqi na mqedil: Qbsuran na we Merab ma mtswai na we Mikal. 50Ngayan mqedil Soro we Axinoam laqi Aximaac. Ngayan qbsuran supi Soro we Abner laqi Ner mtswai tama na. 51Qis ka tama Soro ma, Ner ka tama Abner. To laqi Abiel kana.
52Kana kndesan Soro we mccebu seediq Peliset ka heya. Kana seediq niqan knkela ma mkkere na we, plaanun na smnegul heya kana.
Currently Selected:
1 Samuel 14: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
