1 Samuel 13

Mccebu Seediq Peliset

130 knkawas na mqbsuran paru ka Soro ma 2 knkawas qlhangan na Israel.

2Soro we gmao 30'00 seediq peeyah Israel: 20'00 we smnegul Soro pniqun na Mikmas ma ddgiyaq Beytel. 10'00 heyi we smnegul Yonatan meniq Gibeah dxeral Binyamin. Seediq mnsngari na de, psaun na kobu daha nanak. 3Yonatan we mmaha kmremux supi seediq Peliset ga pkobu Geba hiya. Mnbahang so nii ka seediq Peliset. Soro we miyuk iyuk urung kana qlhangan ka heya ma rmengo: “Pqbhangi kana seediq Hiburu.” 4Kana seediq Israel ge, mnbahang mpcebu supi Peliset ka Soro ma, mbahang qnriqu Israel ka seediq Peliset de, smnegul Soro kana ka seediq ma, msseli Gilgal hiya.

5Msseli mccebu daha seediq Israel ka seediq Peliset. Rulu mccebu daha we niqan 3 mang, supi paapa dapa dmay we 60'00 heyi. Mntena so bnaquy ssiyo rcilung kneegu ka kana supi. Meyah mgkala baro ma, pkobu Mikmas quri nklaan hido Bet Awen ka dheya. 6Seediq Israel we, qmita so smiicu ktnbyaxan pais tmlibu dheya de, mosa tgleing lhengo, mmaku, toma tasil, ccenga btunux, beling ka dheya. 7Duma seediq Hiburu we mntaril yayung Yarden, mosa qduriq betaq dxeral Gad ma Gilad. Soro we ida meniq Gilgal ka heya. Pkrkerang smnegul heya ka kana seediq.

Mege Snapuh Uxe Mndungus ka Soro

8Soro ge, muyu kari nSamuel, tmara mk7 ali ka heya. Ani si uka meyah Gilgal ka Samuel de, prading smwaye peeyah heya ka seediq. 9Kiya de rmengo ka Soro: “Adis hini ka snapuh psqama ma snapuh ptbale.” Kiya de mege snapuh psqama ka Soro. 10Hani mhedu mege snapuh psqama ka heya. Qtai! Gisu dehuk ka Samuel. Mosa smterung heya ma, thmuku heya ka Soro. 11Rmengo ka Samuel: “Mnoda su hmuwa ho?” Rmengo ka Soro: “Ado taan mu wada smwaye peeyah kenan ka seediq ma, ida uka su meyah ka ali pnrngagan ta uri. Kiya uri we mhedu psramal psseli Mikmas hiya ka seediq Peliset. 12Kiya de, rmengo ku: ‘Saya, gisu mmeeyah kmremux yaku meniq Gilgal ka seediq Peliset. Kiya we ini ku durun quri Utux Tmninun nana.’ Kiya de wada ku meyux mege snapuh psqama di.” 13Rmengo Soro ka Samuel: “Mnoda su ooda mngataq di. Ini su puyu kari rnengo Utux Tmninun, Utux Baro su. Nasi so hmuwa de, Utux Tmninun we, mpskere qlhangan su betaq ani knuwan meniq ckceka Israel. 14Saya, uxe mpqbsiyaq ka qlhangan su. Utux Tmninun we tena mnigin 1 mndungus lhebun na ma, phyegun na mqbsuran paru dseediq. Ado ini su puyu rnengo Utux Tmninun ka isu.” 15Kiya de mtutuy ka Samuel, peeyah Gilgal mosa Gibeah dxeral Binyamin.

Psramal Mccebu

Soro we smepu seediq smnegul heya ma, niqan 6'00 heyi. 16Soro ma Yonatan laqi na ma, dseediq smnegul heya we meniq Geba dxeral Binyamin. Seediq Peliset we pkobu Mikmas. 17Niqan ka supi mtg3 pnspuwan na pneeyah ckceka kobu seediq Peliset. Mquri dxeral Oprah betaq Sual ka 1. 18Mqquri Bet Xoron ka 1 ma, mquri ssiyo ayus qlhangan betaq tgtruma mquri ayu Ceboim tadus brenux ka kingal.

19Ciida, kana dxeral Israel we ini daha slai ani kingal ka seediq mtuting xiluy. Ado rmnengo ka seediq Peliset: “Iicu daha mpsmalu hlmadac ma smbrangan ka dseediq Hiburu.” 20Kmsalu sakur, ahuc, puru ma, kagur qburung ka dseediq Israel we, asi ka mosa lmepax quri seediq Peliset hiya. 21Plepax parih ma parih dapa we 2 tnugtruwan skere. Plepax kuruk limuk ma riduy betaq we 1 tnugtruwan skere. 22Betaq ali mccebu ciida, baga kana smnegul Soro ma Yonatan we, uka ani 1 ka niqan hlmadac ma smbrangan. Wano ba Soro ma Yehonatan ka niqan. 23Meyah ka 1 qpuruh supi seediq Peliset betaq eyux Mikmas hiya.

Currently Selected:

1 Samuel 13: Stgdaya

Highlight

Copy