1 Samuel 12
12
Kari Hniti Rmengo Samuel
1Rmengo kana seediq Israel ka Samuel: “Qtai! Wada ku mbahang kana kari rnengo namu kenan. Pheyu ku 1 qbsuran paru namu. 2Saya, qtai! Niqan qbsuran paru nii ka mpkkesa berah namu. Bhege ma rudan knkawas mu da. Qtai! Gaga hini kana ka laqi mu. Peeyah ku laqi betaq saya ida ku mkkesa berah namu. 3Gisu ku hini, asi namu ka pgkela kenan meeniq berah Utux Tmninun ma qbsuran paru hnrigan abura. Ima ka gnlekan mu dapa, dapa roba ma, ima ka tnrqilan mu ma, dehuk ku mqemi doriq mangal lnnabu peeyah ima baga na? Nasi niqan, asi mu prihi.” 4Rmengo ka kana seediq: “Ini su ba traqil yami ma, ini su ba tsiiyax yami. Uka ka seediq wada su mhmetun mangal peeyah dnoi baga daha uri.” 5Rmengo dheya ka Samuel: “Ini namu sdiyal ani maanu meniq baga mu ka dyamu. Gisu pgkela ckceka namu saya ka Utux Tmninun ma, qbsuran paru hnrigan abura duri.” Rmengo ka dheya: “Tai so mpgkela ka Utux Tmninun.”
6Rmengo seediq ka Samuel: “Utux Tmninun ka pnheyu Moseh ma Aharon. Kiya we heya ka dmnudul pusu rudan namu mlatac Micrayim. 7Heyu saya ka yamu. Kiya ka mtduwa ku mpprengo yamu quri Utux Tmninun so kana msderux noda na yamu ma pusu rudan namu meniq berah Utux Tmninun. 8Cuuxal, mosa theruy Micrayim ka Yakobu ma, bobo na de mlawa mesa Utux Tmninun ka pusu rudan namu. Kiya de smkagul Moseh ma Aharon dmnudul pusu rudan namu mlatac Micrayim ma, betaq dxeral nii namu niqan nii. 9Kiya de dheya de betaq cmhungi Utux Tmninun, Utux Baro daha. Kiya de Utux Tmninun we sbege na baga Sisra qbsuran mdudul supi Xacor, seediq Peliset ma, qbsuran paru Moab ka dheya. Kiya de dseediq nii we ini sange meyah kmremux dheya. 10Mlawa Utux Tmninun ka dheya: ‘Wada miyan qmada Utux Tmninun mosa nami thmuku Baal ma Astoret. Niqan miyan qnquwan noda di. Saya, braho su doi miyan baga platac baga pais miyan. Kiya de mpthmuku miyan sunan.’ 11Kiya de smkagul Yerubaal, Bedan, Yiptax, ma Samuel platac baga pais ssiyo namu ka Utux Tmninun. Kiya ka hani namu tbleyaq meniq. 12Qtaan namu gisu meyah kmremux yamu ka Naxas qbsuran paru Amon de, rmnengo namu kenan: ‘Uxe, ida asi ka niqan 1 qbsuran paru qmlahang menan.’ Bale ba we, Utux Tmninun, Utux Baro namu ka qbsuran paru namu. 13Saya, qtai! Nii ka qbsuran paru gnao ma pnesa namu. Qtai! Utux Tmninun we wada pheyu qbsuran paru namu ka heya di. 14Netun namu miicu thmuku Utux Tmninun, qmeepah heya ma, mbahang kari na. Ini namu tbrinah rnengo Utux Tmninun. Yamu ma qbsuran paru namu uri we smnegul namu Utux Tmninun, Utux Baro namu de, malu bale kiya da. 15Netun namu ini qbahang kari Utux Tmninun ma, tbrinah namu kari rnengo na de, pkremux yamu ka baga Utux Tmninun. Mntena so kmremux pusu rudan namu cbeyo. 16Heyu saya ka yamu. Qtai, mooda 1 paru bale noda berah doriq namu ka Utux Tmninun. 17Uxe ali ddaun qmburung mugi ka saya peni? Dmnurun ku Utux Tmninun, mpbruwa ma mpquyux ka heya. Kiya de maha namu klaun ma qtaun, noda namu pheyu qbsuran paru nii we niqan namu paru ba qnquwan noda.” 18Kiya de mlawa Utux Tmninun ka Samuel de, sbruwa ma qmuyux ka ali ciida. Kiya de miicu bale Utux Tmninun ma Samuel ka kana seediq.
19Rmengo Samuel ka kana seediq: “Braho su druni Utux Tmninun, Utux Baro su ka tnqliyan su. Kiya de so miyan uxe mphuqil. Ado noda miyan pheyu qbsuran paru nii we, kiya ka muumal qnquwan noda ka nii.” 20Rmengo seediq ka Samuel: “Iya kiicu! Ani namu wada moda naqah nii we, iya bale kriiril peeyah Utux Tmninun. Wano heya ka qpahi peeyah kana lhebun namu. 21Iya psridil smnegul utux uka ririh ma uxe mpdoi baga seediq. Ado uka dungus ka kiya. 22Utux Tmninun we, ririh paru ngayan na uxe mqada seediq na ka heya. Ado mqaras ngalun na seediq na ka dyamu. 23Quri so yamu de, netun ku msetuq ini durun yamu de, gisu niqan qnquwan noda Utux Tmninun kiya da. Uxe ku mpkeso kiya moda. Mpdoi ku malu kari ma elu ka stgesa mu yamu. 24Kiya de, asi namu ka miicu Utux Tmninun ma, peeyah kana lhebun kbale ba qmeepah heya. Ado qlahang bale yamu, paru riyung qneepah na quri sunan ka heya. 25Nasi namu ini setuq moda naqah de, isu ma dqbsuran paru namu we maha theyaq mhuqil kana.”
Currently Selected:
1 Samuel 12: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
