1 Samuel 11
11
Ini Baka Soro ka Seediq Amon
1Meyah tgbaro ka Naxas seediq Amon ma pkobu sipo Yabes dxeral Gilad. Rmengo Naxas ka dseediq Yabis: “Psdehu ta kari de, tduwa miyan meepah sunan.” 2Cmiyuk dheya ka Naxas seediq Amon: “Nasi namu smruwa gqerun mu mangal ka doriq narac txtaxa namu, kiya ka ngalun ta tmsiiyax seediq Israel de, mpsruwa ku psdehu yamu.” 3Rmengo heya ka drudan Yabes: “Trai miyan mk7 ali han. Trai miyan mpskagul miyan seediq mosa kana dxeral Israel. Nasi uka ka seediq meyah dmoi baga menan de, meeyah miyan smnegul sunan.” 4Betaq Gibeah gaga niqan Soro hiya ka snkgulan ma, srengo na seediq hiya ka so nii kari de, asi lingis kana ka seediq.
5Qtai! Gisu peeyah qnpahan dmudul dapa ka Soro ma, smiling: “Ga lmingis maanu ka seediq nii?” Srengo daha heya ka rnengo seediq Yabes. 6Mbahang so kari nii ka Soro de, tlengun Bgihur Utux Baro ka heya ma, sqama seang na. 7Ttui na biciq ka heyi dapa ma, smkagul snkgulan hmaduc kana dxeral Israel ma rnengo: “Kana ini snegul Soro ma Samuel we, maha mntena so dapa nii ka heya.” Pkcugun Utux Tmninun ka seediq ma, kiya de mntena so 1 seediq meyah kana ka dheya. 8Soro we, spegun na meniq Bise hiya ka dheya: Seediq Israel we 30 mang heyi daha ma, seediq Yehudah we 3 mang. 9Rmengo dsnkgulan ka dheya: “Kesi rmengo ka seediq Yabes gaga Gilad, mpdehuk ba ceka naali ka hido kusun de, maha dooyun baga ka dyamu.” Kiya de mosa mbrinah pgkela seediq Yabis ka dheya. Kiya de mqaras ka dheya di. 10Kiya de rmengo seediq Amon ka dseediq Yabes: “Meeyah miyan smnegul sunan kusun. Kiya de pdai nanak so malu qtaan namu menan.” 11So kusun, Soro we struun na qpuruh ka seediq. Mgrebu bale mppriyux mpqlahang ciida, mremux kobu dseediq Amon ka dheya. Betaq smdaling ceka naali mccebu dheya. Wada mkrehak kana ka seediq qnduriq, uka ba ka md2 mtheyaq.
12Rmengo Samuel ka seediq: “Ima ka rmnengo mesa ‘Mppdehuk mqbsuran paru ita ka Soro nii?’” Peyah hini ka dheya, phqilun miyan. 13Rmengo ka Soro: “Gisu moda dmoi baga ckceka Israel ka Utux Tmninun saya, kiya de iya phuqil ani ima seediq ka ali saya.” 14Rmengo seediq ka Samuel: “Aguh! Mosa ta Gilgal. Mprading ta bgurah qlhangan hiya.” 15Mosa Gilgal hiya ka kana seediq. Meniq berah Utux Tmninun, phyegun daha qbsuran paru ka Soro. Kiya de mege snapuh ptbale berah Utux Tmninun. Soro ma kana seediq Israel we mqaras riyung meniq hiya.
Currently Selected:
1 Samuel 11: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
