1 Qbsuran Paru 9
9
Mtqita Dungal Selomoh ka Utux Tmninun
(2 No 7:11-22)
1Selomoh we, qhdeun na smalu ka sapah thmkuwan Utux Tmninun ma nniqan qbsuran paru ma, kana ka sslmeun na. 2Utux Tmninun we, mtqita dungal Selomoh, ida mntena so tnqita na Gibon hiya. 3Rmengo heya ka Utux Tmninun: “Wada mu qbhangan ka pnesa su ma dnurun su berah mu. Ptgnakun mu prtaso ka sapah thmkuwan snmalu su nii, so maha mheyu hiya betaq ani knuwan ka ngayan mu. Doriq mu ma, lhebun mu we meeniq hiya klaali. 4Nasi ida so ndaan Dawid tama su spoda su pskingal lhebun ma msderux meepah berah mu, muyu su kana pndakar mu sunan ma, qmeepah su kari pndakar ma gaya bneku mu de, 5ida ku mpsdehu tluungan qbsuran paru qlhangan Israel betaq ani knuwan. Mntena so sntangan mu Dawid tama su: ‘Uxe mpqsetuq ani betaq knuwan mptleung tluungan qbsuran paru ka lqlaqi laqi su.’ 6Yamu ma lqlaqi laqi namu ge, nasi tbrinah malix kenan ma ini puyu gaya pndakar ma kari pndakar pnsaan mu berah namu ma, mosa qmeepah utux icil ma thmuku dheya de, 7qada mu peeyah dxeral bnege mu dheya ka Israel ma, qada mu ka sapah thmkuwan mnoda ngayan mu ptgaanak pkrtaso uri. Kiya de tgruun mhulis kana seediq ka Israel. 8Ani spruun riyung ka sapah thmkuwan nii, bobo na de mpsklui ma mthulis rmengo ka kana mnoda hiya: ‘Utux Tmninun we, mmaha na kesun hiya ka dxeral nii ma sapah thmkuwan nii ho?’ 9Mprengo ka seediq: ‘Ado seediq mneeniq hini we, wada malix Utux Tmninun, Utux Baro daha dmnudul pusu rdrudan daha mnlatac pneeyah Micrayim, mosa smdaling utux icil ma, thmuku ma qmeepah dheya. Kiya ka Utux Tmninun we pstrengun na kana mqraqil nii ka dheya.’”
Pnsdhegan Selomoh ma Xiram
(2 No 8:1-2)
10Wada 20 knkawas pnhyegan na sapah thmkuwan Utux Tmninun ma sapah qbsuran paru ka Selomoh. 11Xiram qbsuran paru Cor we muyu ida so pnesa Selomoh qbsuran paru, biqan na qulic bale ma tqilung ma king. Kiya de Selomoh de biqan na 20 alang gaga dxeral Galil hiya ka Xiram. 12Kiya de kndalax peeyah Cor mosa rmigo qmita lualang bnege Selomoh ka Xiram ciida, uxe na kuxul ka alang nii ma 13rmengo ka heya: “Mtswai mu! Lualang maanu ka bnege su kenan ho?” Kiya de betaq saya, kesun na tmngayan “Dxeral Kebul” ka lualang nii. 14King wada sbege Xiram quri qbsuran paru we 1'20 tarantu.
Duma Qneepah Selomoh
(2 No 8:3-18)
15Lmamu psseli seediq mpqeepah ka Selomoh ma, so maha ssmalu sapah thmkuwan nuUtux Tmninun, sapah qbsuran paru ma smalu pnharac qnalang alang Miru, Yerusalem ma smalu alang Xacor, Mgidu ma Gejer. 16Gejer nii we nyahan mccebu Paroh qbsuran paru Micrayim. Psqmaun na ka alang ma wada na phqilun ka seediq Kenaan meniq alang hiya. Sbege na weewa na ka alang nii ma ngalan na so pnaadis pnstreengan daha ma mqedil Selomoh kiya. 17Selomoh ge, tgruwan na smalu ka Gejer ma Bet Xoron, 18Baalat ma Tadmor gaga tadus brenux nii. 19Selomoh we smalu kana alang repun, alang rulu mccebu, alang supi mpaapa dapa dmay ma, kana knddaun na ssmalu meeniq Yerusalem, Lebanon ma kana dxeral qnlhangan na we wada na smleun. 20Quri so dseediq mntngari, uxe dseediq Israel ka seediq Amori, Xet, Perijiy, Xiwiy ma seediq Yebus. 21Kiya ka dseediq ini phqili seediq Israel we, splawa Selomoh mtnqliyan mqeepah ka lqlaqi laqi daha betaq ali saya. 22Kiya de Selomoh ge, wano ba seediq Israel we, ini na ngali tnqliyan. Dheya we ngalan na supi mccebu, dqbsuran mdayo qbsuran paru, qbsuran mdudul, mdayo qbsuran supi, qbsuran supi rulu mccebu ma, qbsuran supi mpaapa dapa dmay.
23Ngalan mpqlahang qpahun Selomoh ka 5'50 heyi we qmlahang dseediq qmeepah ka dheya.
24Laqi mqedil Paroh ka peeyah alang Dawid meyah theruy meniq sapah bnrahan smalu hiya. Ciida, hani smalu Miru ka Selomoh.
25Knkingal knkawas mn3 mege snapuh psqama ma snapuh ptbale bobo spuhan snmalu na Utux Tmninun ka Selomoh. Dungal we psqama skenux bobo spuhan berah Utux Tmninun. So kiya mhedu smalu sapah thmkuwan ka heya.
26Selomoh qbsuran paru we smalu asu Ecyon Geber hiya. Nii we smdaling Eylot ssiyo rcilung Mtanah dxeral Edom. 27Xiram qbsuran paru ge, smkagul duma tnqliyan na tgluhe ba tmaasu ma pspuun na dmptuasu Selomoh paapa asu. 28Paapa asu mosa Opir ka dheya ma, mangal 4'20 tarantu king hadun daha Selomoh qbsuran paru hiya.
Currently Selected:
1 Qbsuran Paru 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
