1 Qbsuran Paru 10
10
Meyah Qmita Selomoh ka Mqedil Mqbsuran Paru Qlhangan Seba
(2 No 9:1-12)
1Qbsuran paru mqedil qlhangan Seba ge, mbahang ado ngayan Utux Tmninun, mrana niqan ba ngayan na ka Selomoh qbsuran paru de, asi osa smiling Selomoh quri mqriqu kklaan. 2Madis hbaro ba seediq betaq Yerusalem ma qpuruh dapa bukung mapa ricuh malu skenux ma, egu riyung king ma btunux qrari. Mosa Selomoh hiya ka heya ma, smiling kana gaga na lnglungun lhebun na. 3Wada cyukan Selomoh kana ka sniling na ma uka ani 1 sniling ka wada na ini klai cmiyuk. 4Qbsuran paru mqedil qlhangan Seba we, wada na qtaan ka kana knkela ma sapah qbsuran paru snmalu Selomoh, 5uqun bobo uqan, dqbsuran mdayo gaga tleung, tnqliyan gisu mheyu, lukus daha, dseediq tnsino ma, snapuh na psqama meeniq ckceka sapah thmkuwan Utux Tmninun de, msklui bale ka heya.
6Rmengo qbsuran paru ka heya: “Bale ba ka bnhangan mu kari, quri noda su ma, knkela su meniq ku qlhangan mu hiya! 7Ida ku ini snhii kari kiya ka yaku ma, betaq mu wada qtaan bale doriq mu da. Qtai! Ini hrinas dmeka ka tnugesa seediq. Knkela su ma qnbleqan su we mrana bnhangan mu. 8Seediq su we mbleyaq ba! Ddtnqliyan su gaga mheyu berah su klaali, mbahang kari knkela su we mbleyaq! 9Tndhuun ka Utux Tmninun, Utux Baro su! Gmaalu sunan ka heya ma, ptlungun su na tluungan qbsuran paru Israel ka heya. Ado smkuxul Israel ani betaq knuwan ka heya, kiya ka pheyu qbsuran paru sunan ma, pqeepah msderux noda sunan.” 10Kiya de qbsuran paru mqedil qlhangan Seba we, sbege na Selomoh ka 1'20 tarantu king, egu bale ka ricuh malu skenux ma btunux qrari. Uka so nii kneegu bnege daha heya ka malu sknexan.
11Dungal we mnapa king peeyah Opir dmpteasu Xiram we mapa egu bale qhuni banar ma btunux qrari. 12Selomoh qbsuran paru we smlean na sapah thmkuwan nuUtux Tmninun ma qniding sapah qbsuran paru ma tubu heyu, tubu 7 urac mpuuyas. Betaq ali saya, uka ka so nii qhuni banar knmalu ka pneeyah daha ma, uka ka mnita so nii bobo na hiya uri.
13Selomoh qbsuran paru ge, spuyu na so qnbleyaq qbsranan na paru biqan na qyqeya na ka qbsuran paru mqedil qlhangan Seba ma, duma na we so kuxul qbsuran paru mqedil nii we sbege na heya kana. Kiya de qbsuran paru mqedil nii we msuupu tnqnayan na wada qlhangan daha nanak.
Qnbleyaq Selomoh
(2 No 9:13-28)
14Knkingal knkawas nangal Selomoh ka king we hmrinas 6'66 tarantu chndilan. 15Duma na nii, qyqeya peeyah seediq mpsbaruy ma qyqeya mbbaruy, duma na we qyqeya pneeyah dqbsuran paru Arab ma dqbsuran mpdudul nyusan dxeral. 16Selomoh qbsuran paru nii we stuting na smalu 2'00 qqeerung heyi paru ka king. Knkingal qqeerung we stuting na 6'00 skere king. 17Dungal we stuting na smalu 3'00 qqeerung heyi biciq. Knkingal qqeerung biciq we stuting na 3'00 mina king. Qbsuran paru we psaun na toma Sapah Nrao Lebanon. 18Dungal ka Selomoh we smmalu tluungan qbsuran paru waqic dapa bukung ma plbuwan na bale ba king. 19Tluungan qbsuran paru nii we 6 tnugkadan qahan ma bukuy tlengun we gnqeran so tunux dapa. Bbaang tlengun we pniqan na sdharan hiqur ma mheyu ssiyo na ka 2 rkelic rudu. 206 tnugkadan qahan we gaga phyegan 12 rkelic rudu, gaga mheyu narac ma iril. Uka so nii snlmean ka ani inu qlhangan. 21Pngerah mahan Selomoh qbsuran paru we snmalu king kana ma, qyqeya dooyun Sapah nrao Lebanon uri we snmalu bale ba king kana. Knxalan Selomoh ciida ka ging we ini daha sprui. 22Quri rcilung ka Selomoh we duma mptuasu Xiram, dmoi mptuasu Tarsis ma 3 knkawas texal, meyah hmaduc king, ging, waqic dapa bukung, runge ma glaqan tputap.
23Qnbleyaq ma knkela Selomoh qbsuran paru we mgkala dqbsuran paru ani inu qlhangan. 24Kana seediq bobo dxeral we mkmeyah qmita dqeras Selomoh ma, mbahang knkela Utux Baro pnosa ckceka lhebun na. 25Txtaxa daha meyah we madis qyqeya, kiya ka snmalu ging, king, lukus, qyqeya mccebu, ricuh malu sknexan, dapa dmay ma dapa roba. Knkingal knkawas we ida niqan so nii bnege daha kana.
Supi ma Qnbleyaq Selomoh
(2 No 1:13-17)
26Selomoh ge, psseli rulu mccebu ma supi paapa dmay. Niqan 14'00 rulu mccebu ma 1 mang 20'00 supi paapa dapa dmay ka heya ma, pniqun na Yerusalem qbsuran paru hiya. 27Meeniq Yerusalem hiya ka qbsuran paru we, mntena btunux kneegu ka ging ma, mgkala tdiyuc Sipira kneegu ka qulic bale. 28Dapa dmay Selomoh we hnqulan pneyah Micrayim ma Krikiya kiya, bnaruy dmpsbaruy qbsuran paru pneeyah Krikiya kiya. 29Knkingal rulu mccebu pneyah Micrayim we bnaruy 600 skere ging. Knkingal dapa dmay we bnaruy daha 1'50 skere ging. Rulu mccebu ma dapa dmay dqbsuran paru seediq Xet ma Aram we, ida pnoda baga daha posa kana.
Currently Selected:
1 Qbsuran Paru 10: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
