1 Qbsuran Paru 8
8
Psaun Sapah Thmkuwan ka kulu pnsdhegan
(2 No 5:2-6:2)
1Ciida, psseli ddrudan Israel, qbsuran mdudul knkingal pnswayan rdrudan, pusu rdrudan pnswayan rudan meyah Yerusalem hiya ka Selomoh. Saun daha mangal baro, peeyah alang Dawid, kiya ka Sion ka kulu pnsdhegan Utux Tmninun. 2Pkelu idas Itaning, kiya de 7 idas pkelu smseman Pkobu ciida, mosa msseli Selomoh qbsuran paru hiya ka kana seediq Israel. 3Dehuk kana ka ddrudan Israel de, mheal kulu pnsdhegan ka dmsapuh. 4Dmsapuh ma seediq Lewiy we spheal daha betaq sapah thmkuwan ka kulu pnsdhegan Utux Tmninun. Dungal we desun daha ka sapah pnsdhegan ma, kana qyqeya ddooyun sapah thmkuwan uri. 5Selomoh qbsuran paru ma kana seediq Israel we msseli berah kulu pnsdhegan ma smapuh dapa ma miric, ado sgcuqi egu de ini snqlingi smepu. 6Kiya de dmsapuh Utux Tmninun we psaun daha sapah thmkuwan, kiya ka pusu mrtaso truma ka kulu pnsdhegan, meniq cenga 2 palic kirubing toma hiya. 7Rmaguh palic kirubing we gaga bobo kulu pnsdhegan kiya. Gaga mubung kulu pnsdhegan ma qhuni phelan. 8Bbaro ka phelan nii ma mheyu berah ba pusu mrtaso truma ka seediq we qtaan daha ka puting ma puting phelan. Kiya de speeyah daha nganguc qmita we ini qtai. Phelan nii we ida gaga hiya saya. 9Truma kulu pnsdhegan we wano 2 qrtinuh btunux. 2 qrtinuh btunux nii we pnosa Moseh mneniq dgiyaq Xoreb hiya, ciida we mnlatac pneeyah Micrayim ka seediq Israel ma, Utux Tmninun we smdehu dheya. 10Mlatac peeyah sapah thmkuwan ciida ka dmsapuh we asi eyah stenge truma sapah thmkuwan Utux Tmninun ka plabu. 11Ado tqwilaq nii betaq ini tduwa mheyu qmeepah ka dmsapuh, ado stenge truma sapah thmkuwan ka ledax Utux Tmninun. 12Ciida, rmengo ka Selomoh:
“Rmnengo meeniq ku mnkuung mesa ka Utux Tmninun.
13Kiya de bale ba smnalu ku 1 knparu ba sapah thmkuwan,
nniqun su ani betaq knuwan.”
Rmengo Seediq ka Selomoh
(2 No 6:3-11)
14Mquri kana seediq Israel ka dqeras qbsuran paru ma, smbleyaq dheya. Mheyu hiya kana ka seediq Israel. 15Rmengo ka Selomoh: “Utux Tmninun, Utux Baro nuIsrael we tndhuun! Ado pnoda ba quwaq na mege sntangan Dawid tama mu ma, ida daun ba baga na nanak. Rmnengo ka heya: 16‘Bobo ka pnlatac ku Israel seediq mu peeyah Micrayim we ini ku gao ani inu alang pnswayan rudan duIsrael, ririh ngayan mu phyegan sapah thmkuwan. Kiya de gmao ku Dawid mpqlahang Israel seediq mu.’ 17Lnglungan Dawid tama mu we, ririh ngayan Utux Tmninun, Utux Baro nuIsrael, kmsalu sapah thmkuwan ka heya. 18Kiya de Utux Tmninun we rmengo Dawid tama mu: ‘Ririh ngayan mu kmsmalu su sapah thmkuwan ka lnglungan su we, malu ka kiya. 19Kiya de iya salu ka isu. Wano laqi mntuting ba sunan ka mtduwa smalu sapah thmkuwan ngayan mu.’ 20Saya ka Utux Tmninun we tena na wada daan ka sntangan na kari nii. Wada ku lmutuc Dawid tama mu maangal tluungan qbsranan paru Israel. Mntena so rnengo Utux Tmninun spoda mu ngayan Utux Tmninun, Utux Baro nuIsrael smnalu ku sapah thmkuwan nii. 21Wada ku psramal psaan kulu pnsdhegan truma hiya uri. Ckceka kulu pnsdhegan hiya we niqan pnsdhegan Utux Tmninun. Kiya ka pnsdhegan dnudul na rudan ta pneyah Micrayim ciida.”
Dnurun Selomoh
(2 No 6:12-42)
22Mheyu berah spuhan nuUtux Tmninun berah kana seediq Israel ka Selomoh ma, pheyu 2 baga na mquri baro, 23dmurun: “Utux Tmninun, Utux Baro nuIsrael! Karac baro ma bobo dxeral we uka ka utux mptena so isu! Isu we psdehu su ba pnsdhegan su ma mege su gnaalu dtnqliyan bale ba qmeepah meniq berah su. 24Sndhegan nii we pnsdehu su quri Dawid tnqliyan su ka nii ma, pnstangan su heya ka nii. Pneeyah ba quwaq su ka sntangan, spooda su baga su qmhedu mntena so ali saya. 25Utux Tmninun, Utux Baro nuIsrael! Isu we sntangan su tnqliyan su Dawid tama mu: ‘Nasi qmlahang noda daha, mntena so noda su meeniq berah mu ka lqlaqi laqi su we, uxe mpsetuq mptleung tluungan qbsuran paru Israel ka dheya.’ Saya, braho su ba psdhegi ba ka kari nii. 26Utux Baro nuIsrael! Saya pdai bale ka kari pnstangan su tnqliyan su Dawid tama mu.
27Ya bale ba gaga meniq bobo dxeral ka Utux Baro ho? Qtai! Karac baro ma dkarac gaga karac baro we ini pttuku nniqan su, so ka pnheyu mu sapah thmkuwan nii we mntena hiya duri? 28Braho su ba Utux Tmninun, Utux Baro mu glaani ka dnurun tnqliyan su, bhangi ka dnurun mu saya meeniq berah su. 29Tai so ani diyan ma ani keeman we, mqita sapah thmkuwan nii ka doriq su. Kiya ka rnengo su sapah pnheyu pnooda ngayan su. Braho su bhangi ka dnurun, dnurun tnqliyan su meniq hini. 30Dmurun mquri hini ka tnqliyan su ma seediq su Israel ciida we, braho su bhangi peeyah nniqan su karac baro ma, bhangi ma srwai bale.
31Nasi niqan ka qnquwan su seediq ssiyo ma, pkyexun su daha mosa smdehu. Kiya de meyah sapah thmkuwan nii ma, smdehu berah spuhan su nii ka heya de, 32braho su, bhangi ma dai meniq karac baro, pooda psgao ma biqi niqan qnquwan noda ka seediq naqah. Puyu so ndaan daha cmiyuk tunux daha. Biqi msderux ka seediq msderux, puyu so knsderux na smbleyaq su cmiyuk heya.
33Nasi niqan qnquwan noda daha isu ka seediq Israel su, betaq ini baka berah pais, kiya we meyah mbrinah quri sunan, ptuura ngayan su, mlawa dmurun quri sunan meeniq sapah thmkuwan nii we, 34braho su bhangi peeyah karac baro, srwai ka qnquwan noda Israel seediq su. So maha mbrinah dxeral bnege su ma dpusu rdrudan daha ka dheya.
35Nasi niqan qnquwan noda daha sunan ka seediq su, betaq su wada gmemuk karac ini su pqyexi ka quyux. Nasi meyah dmurun hini, ptuura ngayan su ma, ptuura qnquwan noda daha peeyah pnkdira su, 36braho su bhangi peeyah karac baro, srwai ka qnquwan noda tnqliyan su Israel seediq su. Tgsai dheya ka elu malu kari su ma, pqyexi ka dxeral su, kiya ka dxeral bnege su seediq su.
37Nasi niqan krayan, mnarux punu, sbgihur bgihur mtilux, skwiyan, trilan utun ma mduku, uxe uri we meyah tmlibu mccebu rhengun alang nii ka pais, ani yaa smterung ani manu mqraqil ma mnarux naqah, 38ani hbaro ma knkingal betaq mkela niqan qnquwan mesa ka lhebun daha ka Israel seediq su ma, mquri sapah thmkuwan nii pheyu baga. Ani maanu ka pnesa daha ma, ani maanu ka dnurun daha we, 39braho su bhangi ma srwai meniq nniqan su karac baro. Ado mkela su lhebun seediq ka isu. Wano isu ka mkela lhebun seediq. Braho su puyu so ndaan daha cmiyuk dheya. 40So maha betaq ani knuwan miicu sunan ma muyu kari su meeniq dxeral bnege su pusu rdrudan daha ka dheya.
41Quri so seediq icil qlhangan uxe seediq Israel we, nasi ngayan su peeyah theya meyah ka dheya we, 42Ado mnbahang paru ngayan su, paru beyax baga su ma, hiqur baga hnkero su de, meyah dmurun sapah thmkuwan nii ka dheya, 43braho su bhangi meniq nniqan su karac baro, puyu so dnurun daha dai ka dnurun daha sunan. So maha mkela sunan, miicu sunan mntena so Israel seediq su ka kana seediq bobo dxeral. Dungal we so daha klaun sapah thmkuwan snmalu mu ririh ngayan su nii ka dheya uri.
44Nasi muyu snkgulan su mosa nganguc ka seediq su, ani mosa mccebu ani inu, nasi dmurun mquri alang gnao Utux Tmninun ma, dmurun mquri sapah thmkuwan ririh ngayan su nii ka dheya we, 45braho su bhangi meniq karac baro ka pnlawa dnurun daha ma, ptuura msderux noda dheya.
46Nasi niqan qnquwan noda daha sunan ka seediq su, ado uka ba ka uka qnquwan noda, kiya de mseang su dheya ma, sbege su pais daha ma qrapun daha madis betaq dxeral pais ani theya ma ani daling ciida ka dheya we, 47Nasi psbrinah lmngelung ma, priyux lnglungan meniq dxeral qmnerac hiya ka dheya ma, mquri sunan dmurun: ‘Wada miyan niqan qnquwan noda di, tbrinah miyan ma, mnoda miyan qnnaqah da.’ 48Nasi peeyah kana lhebun ma lnglungan daha kmpriyux quri sunan dxeral pais qmnerac hiya ma, mqquri dxeral daha nanak, kiya ka alang bnege su rdrudan daha ma gneegan su ma, sapah thmkuwan pnheyu mu ngayan su we, 49tgleus mbahang nniqan su baro hiya ka dnurun daha ma dyagi ptuura ka mksderux su ka dheya. 50Srwai qnnaqah daha sunan ka seediq su, srwai kana tnbrnahan daha quri sunan, so maha sgaalu berah seediq qmnerac dheya. 51Ado seediq su ma, pusu dnoi su ka dheya, dnudul su pneeyah mlatac Micrayim tbbau srana rqeda. 52Tai so mpqlahang dnurun tnqliyan su ma Israel seediq su ka doriq su. Ani knuwan mlawa dmurun sunan ka dheya we, braho misu bhangi bale. 53Utux Tmninun Bukung! Pnsaanak su ma pusu dnoi su peeyah kana seediq bobo dxeral ka dheya. Kiya ka pnuyu su dnudul dheya mlatac Micrayim ciida ma, spooda su Moseh tnqliyan su sntangan su dheya.”
Kari Psbleyaq Seediq
54Selomoh we tnbqelic berah spuhan Utux Tmninun ma, hmnkero baga na mquri baro. Mnhedu dmurun berah Utux Tmninun ka heya de, mtutuy ka heya. 55Mtutuy ma paru bale ka hrenang na psbleyaq kana seediq Israel, rmengo: 56“Tndhuun ka Utux Tmninun! Ado pnuyu kana sntangan na mege mtbale lhebun Israel seediq na ka heya. Kana kari psbleyaq sntangan na Moseh tnqliyan na we, ini pgqeya ani 1. 57Tai so Utux Tmninun, Utux Baro ta we msuupu ita, mntena so mnsuupu pusu rdrudan ta. Ini alix ita ma, ini qada ita. 58Tai so mpquri heya ka lhebun ta, muyu ta kana elu na ma, pyugun ta ka gaya pndakar, kari pndakar ma, gaya bneku tnugesa na rdrudan ta. 59Tai so mpdurun ku kari nii meniq berah Utux Tmninun, ani bbiyan ma keeman smdaling Utux Tmninun, Utux Baro mu. So maha dmayo tnqliyan na ma seediq na Israel ka Utux Tmninun, mdayo ptuura msderux ka heya. 60So maha klaun kana seediq bobo dxeral, wano ba Utux Tmninun ka Utux Baro, duma na hiya we uka di. 61Maanu so kiya de pskingal lhebun namu, muyu kari pndakar na, pyugi ka gaya pndakar na mntena saya mquri Utux Tmninun, Utux Baro ta.”
Mqaras Mege Sapah Thmkuwan
(2 No 7:4-10)
62Qbsuran paru we msuupu kana seediq Israel mege snapuh berah Utux Tmninun. 63Ssapuh na mege snapuh ptbale ka Selomoh we 2 mang 20'00 ka dapa ma 12 mang ka miric. So nii, msuupu kana seediq Israel ka Selomoh smapuh mege sapah thmkuwan Utux Tmninun. 64Ali ciida, ado knparu spuhan xiluy limuk berah Utux Tmninun nii, ini ba pttuku ppsaun snapuh psqama, snapuh mege pnhgalang ma daruk snapuh ptbale de, prtaso na psaanak ka nganguc berah sapah thmkuwan ma, smapuh snapuh psqama, snapuh mege pnhgalang, daruk snapuh psbleyaq meeniq hiya ka dheya.
65Ciida mosa smseman ka Selomoh we, msuupu kana knhbaro pnsliyan seediq Israel peeyah tmayan Xamat betaq yayung Micrayim ka heya. Paru bale pnssliyan smseman ka nii, nii we mk7 ali ma malan mk7 ali dungal betaq 14 ali nniqan daha berah Utux Tmninun ta. 66Tg8 ali de, qbsuran paru we psaun na kana ka seediq. Kiya we smbleyaq qbsuran paru ka dheya. Tqqaras bale lhebun daha ado Utux Tmninun we mege kana huwe Dawid tnqliyan na ma Israel seediq na. Mqqaras mbrinah kobu daha nanak ka dheya.
Currently Selected:
1 Qbsuran Paru 8: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
