1 Qbsuran Paru 5

Psramal Mpsalu Mrtaso Sapah Thmkuwan ka Selomoh

(2 No 2:1-18)

1Xiram qbsuran paru Cor we dangi ba Dawid. Xiram we mnbahang gisu lmutuc tama na mqbsuran paru hnrigan abura seediq Israel ka Selomoh de, smkagul qbsuran mdayo na mosa Selomoh hiya. 2Smkagul snkgulan na mosa seediq Xiram uri ka Selomoh ma rmengo: 3“Ida su klaun. Dawid tama mu ge, ado mccebu ssiyo na ma, wada ini tduwa pheyu mrtaso sapah thmkuwan nuUtux Tmninun, Utux Baro na ka heya. Asi ka Utux Tmninun we betaq na qqahun toma papak na ka dpais. 4Saya ka Utux Tmninun, Utux Baro mu de nii ku na sblequn qmlahang kana mtqiri mu ma, uka ka pais ma, uka ka pqraqil kenan. 5Qtai! Posa ku kari mpsmalu ku sapah thmkuwan Utux Tmninun, Utux Baro mu, nii we pnuyu mu kari Utux tmninun rnengo na Dawid tama mu: ‘Asi ka rmirih sunan mptleung tluungan qbsuran paru su ka laqi su. Heya ka mpheyu sapah thmkuwan ngayan mu.’ 6Saya, Skguli seediq mosa smeqic qulic bale peeyah Lebanon kenan. Dtnqliyan mu we ida mosa dmayo tnqliyan su. Quri so sntkean tnqliyan su we ida ku mbege dheya pntena so pnrngagan ta. Ida su klaun, ckceka ta we uka ka seediq mosa mntena seediq Cidon mkela ba smeqic qhuni.”

7Mbahang kari Selomoh ka Xiram de paru bale qaras na ma rmengo: “Saya, tndhuun ba ka Utux Tmninun! Ado spdungus na Dawid ka laqi mgleexan knkela na mpqlahang so nii hbaro ba seediq.” 8Mege patis Selomoh rmengo ka Xiram: “Wada mu klaun ka dnurun su. Quri so qulic bale ma tqilung uri we, ida ku mpuyu lnglungan su moda. 9Rngagun mu ka tnqliyan mu hqulun daha peeyah Lebanon betaq rcilung. Psrkagun mu pbekuy pqluli qsiya ma hadun mu betaq ida so nkari su. Plhlahun mu hiya ka bnekuy qhuni ma angal hiya di. Kiya de ani su ba rabang, biqi ku hiya ka uqun sapah mu.” 10Kiya de muyu so lnglungan Selomoh, mege qulic bale ma tqilung Selomoh ka Xiram. 11Selomoh we biqan na 2 mang koru seengan mugi biciq ma, 2 koru seengan bale ba abura curung ka uqun tnsapah Xiram. Ida na biqan so nii knkingal knkawas ka Xiram. 12Utux Tmninun we ida so sntangan na biqan na knkela ka Selomoh. Xiram ma Selomoh we msdehu kari ma mmtbale mtheyaq ka dheya.

13Selomoh qbsuran paru we psseli kana seediq Israel mqeepah. Pnsseli ka rseno we 3 mang heyi. 14Selomoh we knkingal idas skgulan na Lebanon ka kng1 mang heyi. Kiya de 1 idas ka mosa Lebanon ma 2 idas ka nniqun daha sapah. Qmlahang qpahun nii we Adoniram. 15Selomoh we niqan mhaqul na we 7 mang heyi ma mkacuy btunux dgiyaq we 8 mang heyi. 16Duma na nii Selomoh we ngalan na mpqlahang ka 33'00 heyi ma pqlhangun na dmqeepah. 17Posa kari ka qbsuran paru skacuy daha btunux paru mkere ka ngngalun pusu sapah thmkuwan. 18Kiya de psramal btunux ka dmpsmalu sapah Selomoh ma Xiram, Ahing ma, seediq Gebal. So nii, qhdeun daha psramal ka qyqeya qhuni ma btunux smlean daha sapah thmkuwan.

Currently Selected:

1 Qbsuran Paru 5: Stgdaya

Highlight

Copy