1 Qbsuran Paru 21
21
Qnpahan Lipas Nabot
1Bobo noda nii, niqan 1 oda dungal. Nabot seediq Yijreel, niqan 1 qnpahan na lipas smdaling Samareia gaga ssiyo sapah Axab qbsuran paru hiya. 2Rmengo Nabot ka Axab: “Biqi kenan, ngalun mu phmaun sama ka qnpahan lipas su. Ado nii smdaling sapah mu. Kiya de pryuxun ta knmalu qnpahan lipas. Nasi su mkmaangal ging de, mpuyu ku bbrigun bege mu isu ka pila.” 3Rmengo Axab ka Nabot: “Utux Tmninun we, ini sruwa mege pusu dnoi rudan sunan ka heya.” 4Ado rmnengo kari: “Uxe mu bege sunan ka pusu dnoi rdrudan mu” ka Nabot seediq Yijreel de, mseang ma naqah kuxul na mbrinah sapah qbsuran paru ka Axab. Mksaro qlapo mqquri qnabil ka dqeras na ma, ini pkmekan.
5Meyah rmengo heya ka Ijebel mqedil na: “Hmuwa su so nii mseang riyung ma ini ekan uqun ho?” 6Rmengo ka heya: “Rmnengo ku Nabot seediq Yijreel: ‘Pdai bbrigun brigi kenan ka qnpahan lipas su, uxe uri we, nasi su smruwa, tduwa ta ryuxun qnpahan lipas icil mege sunan.’ So nii sniyuk na: ‘Uxe mu bege sunan ka qnpahan lipas mu.’” 7Rmengo qbsuran paru ka Ijebel: “Uxe isu ka gaga qmlahang qlhangan Israel peni? Tutuy! Tqqaras mekan hnpure. Ida mu bege sunan ka qnpahan lipas Nabot seediq Yijreel.”
8Kiya de Ijebel we spooda na ngayan Axab matis patis ma, bobo na nii, btaqan na ngayan pnskraya qbsuran paru de, spaadis na dqbsuran niqan ngayan ma ddrudan mpqlahang gaga Yijreel msuupu Nabot. 9Pnatis na patis hiya ka heya we so nii: “Oda psanak ini ekan ka yamu ma, plaani ka Nabot, ptlengi tluungan berah ba dseediq. 10Plaani ka 2 uka ba dungus seediq, ptlungi sipo Nabot, mpskraya migin qnnaqah heya ma mprengo: ‘Wada su cmiyus Uutx Baro ma qbsuran paru ka isu.’ Kiya de Tlusi daha nganguc alang, pphuqil cmebu btunux ka heya.” 11Dqbsuran niqan ngayan ma ddrudan mpqlahang we muyu so pnosa kari Ijebel mooda qmeepah. 12Dheya we pooda pnskraya ini ekan ka dheya ma, mlawa Nabot ma, ptlungun daha berah ba seediq. 13Meyah ka 2 heyi uka ba dungus, tleung sipo Nabot. Kiya de tgberah ba seediq kana seediq pskraya migin qnnaqah heya ma rmengo: “Smniyus Utux Baro ma qbsuran paru ka Nabot!” Kiya de tlusun daha bukuy alang ka Nabot ma, buun daha btunux phuqil. 14Kiya de smkagul seediq mosa rmengo Ijebel: “Wada phqilun btunux ka Nabot da.”
15Ijebel we, mnbahang wada phqilun btunux ka Nabot de, mosa rmengo Axab: “Tutui! Sai mangal ka qnpahan lipas ini srwai pbaruy sunan ka Nabot seediq Yijreel! Ado uka ka Nabot da, wada mhuqil da.” 16Axab we, mnbahang wada mhuqil ka Nabot de, mtutuy ma mosa mangal qnpahan lipas Nabot seediq Yijreel.
17Dehuk Eliyah mpgeela kari seediq Tisbiy ka kari Utux Tmninun, rmengo: 18“Tutui! Osa qmita Axab qbsuran paru Israel gaga Samareia. Qtai! Mosa mangal qnpahan lipas Nabot ka heya ma, gaga meniq hiya ka heya. 19Rngagi ka heya: ‘Rmnengo so nii ka Utux Tmninun: Pnhuqil su seediq ka isu ma, ngalun su dungal ka pusu dnoi na ho?’ Dungal we rmengo heya: ‘So nii rmengo ka Utux Tmninun: Cnhepan na inu dara na Nabot ka huling we, mpcehaq nak dara su hiya ka huling duri.’”
20Rmengo Eliyah ka Axab: “Pais mu! Gisu su slayun ka yaku di ho?” Rmengo ka heya: “Gisu misu slayun da. Ado wada su maruy isu nanak ma, mnoda su qnnaqah noda ckceka doriq Utux Tmninun. 21Rmengo ka Utux Tmninun: ‘Qtai! Ida mu pyahun isu ka pnqraqil ma, mpkuuka sunan. Kana drseno Axab meniq Israel, ani gaga ngalun tnqliyan, mtraguh we, ida mu phqilun kana. 22Sapah su we maha so sapah Yarabeam qbsuran paru laqi Nebat ma, maha mntena so sapah Basa laqi Axiyah uri. Ado wada su pstutui seang mu, dungal we wada su mege qnquwan noda Israel.’ 23Quri so Ijebel we, rmnengo ka Utux Tmninun: ‘Meekan heyi na mnhuqil alang Yijreel hiya ka huling. 24Kana dseediq Axab mnhuqil ckceka alang we uqun huling ma, mnhuqil qnpahan we uqun qbheni karac.’”
25Uka ka seediq so Axab, wada psdrilun Ijebel mqedil qbsuran paru ma maruy isu nanak ma, qmeepah su qnnaqah oda ckceka doriq Utux Tmninun. 26Mnoda oda qnnaqah ka heya ma, smnegul tikung, mntena kana noda Utux Tmninun wada lmiwaq seediq Amori berah seediq Israel.
27Mnbahang kari nii ka Axab de, asi na sgliqi ka lukus na, lhlahun na ma mlukus lukus mbasi. Ida mtaqi bobo lukus mbasi, mstkemu tunux nnaqah kuxul na mkkesa. 28Dehuk Eliyah seediq Tisbiy ka kari Utux Tmninun, rmengo: 29“Ya su ga qtaan? Axab ka wada so nii psbiciq berah mu, muudus ciida ka heya han we uxe mu pyahun heya ka mqraqil nii. Betaq laqi na ciida de, pyahun mu sapah na ka mqraqil.”
Currently Selected:
1 Qbsuran Paru 21: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
