1 Qbsuran Paru 20
20
Mccebu Daha Aram
1Psseli kana supi ka Ben Hadad qbsuran paru Aram ma, dmudul 32 qbsuran paru ma maadis dapa dmay ma rulu mccebu mosa tmlibu mccebu Samareia. 2Smkagul snkgulan mpremux alang mosa Axab qbsuran paru Israel hiya, mosa rmengo heya: 3“So nii ka kari Ben Hadad: ‘Maha naku ka king ma ging su. Maha naku ka mbtunux ba mqedil ma weewa su.’” 4Rmengo qbsuran paru Israel ka dheya: “Pusu tnsapah mu ma, qbsuran paru mu! Ida so kari su. Yaku ma kana dnoi mu we nnisu kana.” 5Mnpusal meyah rmengo dungal ka dsnkgulan: “Rmengo so nii ka Ben Hadad: ‘Smnkagul ku snkgulan mu mosa isu hiya, so bbege su kenan ka ging, king, mqedil ma weewa su.’ 6So nii saya ka kusun we mpskagul ku dqbsuran mdayo kenan. Mooda migin truma sapah su ma sapah tnqliyan su. Kana qyqeya kuxul su we, ida mu desun peeyah baga daha.”
7Kiya de psseli kana drudan qlhangan ka qbsuran paru Israel ma rmengo: “Klai bale, qtai! Gisu meyah migin qnrqilan ta ka seediq nii! Smkagul snkgulan na ma nii meyah mesa mqedil, laqi, ging ma king mu. Uka mu klaan gmhetur ka heya.” 8Rmengo qbsuran paru ka kana rdrudan ma seediq: “Iya bhangi ka heya ma, iya cyuki uri.” 9Kiya de rmengo snkgulan Ben Hadad ka qbsuran paru Israel: “Rngage ku tnpusu sapah mu ma qbsuran paru mu: ‘Tgplaale pnesa tnqliyan snkgulan qbsuran paru we, ida mu srwaun kiya. Kiya de, quri so oda nii de, uxe ku mpsruwa.’” Kiya de mosa cmiyuk rmengo Ben Hadad ka snkgulan nii. 10Smkagul snkgulan na mosa Axab hiya dungal ka Ben Hadad: “Nasi mptuku 1 karuk baga kana seediq nii msuupu kenan ka bengux dxeral Samareia we, tai so mpknteetu pkdira kenan ka utuutux!” 11Cmiyuk ka qbsuran paru Israel: “Rngagi yamu ka heya: ‘Hani smekur hwinuk ge, iya pntena seediq tmdahu wada lmhelah qyqeya mccebu.’” 12Gisu mtheyaq dqbsuran paru mimah sino kobu ka Ben Hadad, mbahang kari nii ka heya de, rmengo dqbsuran mdayo na: “Psramal ta mccebu!” Kiya de mosa psramal mccebu alang ka dheya.
13Qtai! Meyah smdaling Axab qbsuran paru Israel ka 1 mpgeela kari ma rmengo: “Rmengo so nii ka Utux Tmninun: ‘Ya su ga qtaan ka kana kneegu seediq nii ho? Qtai! Ali saya, bbege mu baga su ka dheya. Kiya de mpkela su yaku we Utux Tmninun.’” 14Rmengo ka Axab: “Mpstama ku ima ho?” Rmengo ka heya: “Rmengo so nii ka Utux Tmninun: ‘Mpstama su mbbeyax gaga smnegul dqbsuran qqlhangan’” Rmengo ka Axab: “Ima ka mdudul na mccebu?” Rmengo ka heya: “Isu!” 15Kiya de psseli driso pneyah dqbsuran qqlhangan ka Axab de 2'32 heyi. Dungal we mosa psseli dsupi Israel ma, kana de 70'00 heyi.
16Pkelu ceka naali, mlatac nganguc alang ka dheya. Gisu mqqaras mimah kobu hiya ka Ben Hadad ma 32 heyi dqbsuran paru. 17Plaale ba mosa ka driso pneyah dqbsuran paru qqlhangan. Ben Hadad ge, smkagul seediq ma, meyah cmiyuk rmengo: “Niqan seediq mlatac peeyah Samareia.” 18Rmengo ka heya: “Nasi meyah mpprengo quri mtbale ka dheya we, asi qrapi iya phqili. Nasi meyah mccebu ka seeyah daha we, asi qrapi ma iya phqili uri.”
19Mlatac peeyah alang ka riso pneyah dqbsuran paru qqlhangan ma, smnegul bukuy ka dsupi. 20Smterung pais ka txtaxa daha we, asi daha phqili. Qduriq ka seediq Aram, smdurak dheya ka seediq Israel. Kiya de Ben Hadad qbsuran paru Aram we, paapa dapa dmay ma, mtheyaq supi paapa dmay qduriq. 21Mlatac peeyah alang ka qbsuran paru Israel ma, mosa mccebu dapa dmay ma rulu mccebu, egu riyung pnhqilan daha seediq Aram.
22Smdaling qbsuran paru Israel ka mpgeela kari kiya. Rmengo heya: “Osa! Knbeyax nanak, qtai bale ma, klai bale mmaanu ka ddaun su qmeepah. Ado bobo 1 knkawas ida meyah mccebu sunan ka qbsuran paru Aram.”
Ptpusal Meyah Mccebu ka Seediq Aram
23Rmengo qbsuran paru Aram ka dqbsuran mdayo heya: “Utux dgiyaq ka utux daha, kiya ka wada mbeyax mccebu ka dheya. Nasi ta mccebu breenux we ida ita ka mpkbeyax na. 24Qbsuran paru we, ado so nii ka noda de, plaxi na kana ka dqbsuran paru ma, pryuxi na qbsuran supi rmirih dheya. 25Pntnaani mumal so nii dungal wada uka ka supi, dapa dmay ma rulu mccebu. Kiya de mpccebu ta breenux dheya. Ida ita ka maha mbeyax na.” Mbahang kari daha ka qbsuran paru de, wada mooda so nii.
26Wada ka 1 knkawas, bale ba psseli supi Aram ka Ben Hadad ma mosa Apeq mccebu Israel. 27Mosa psseli supi uri ka Israel ma psramal uqun ma, mosa mccebu seediq Aram. Pkobu sipo dheya ka seediq Israel, mntena so 2 biciq qpuruh miric. Seediq Aram we pqhedu breenux ka supi daha. 28Smdaling ka seediq Utux ma, rmengo qbsuran paru Israel: “Rmengo so nii ka Utux Tmninun: ‘Ado rmnengo yaku ka seediq Aram, Utux Tmninun we, Utux dgiyaq ma, uxe Utux mbrenux. Kiya de bege mu baga su ka kana hbaro seediq nii. Kiya de mpkela namu yaku we Utux Tmninun.’” 29Dheya nii we mk7 ali mbbege berah mqqburang. Tg7 ali de mggimax mccebu ka dheya. Ali ciida phuqil supi mkkesa Aram ka seediq Israel we 10 mang heyi. 30Duma daha we qduriq mquri Apeq. Dehuk alang kiya de, mhurah ka qnalang alang ma, 2 mang 70'00 heyi ka wada mhuqil nriqan.
Qduriq mremux alang nii ka Ben Hadad uri ma, mosa tgleing tgderiq ba truma sapah. 31Rmengo heya ka dqbsuran mdayo na: “Qtai! Mnbahang miyan ka dqbsuran paru tnsapah Israel we ida mnugaalu bale. Pqrii miyan lukus mbasi ka hwinuk miyan ma, psrugi miyan snuyuk ka nduyung nami, mlatac ta mosa qbsuran paru Israel hiya. Nhuwa pkdusun na ka knuudus qbsuran paru ta.” 32Kiya de qmiri lukus mbasi hwinuk ma smiru snuyuk nduyung ka dheya. Mosa berah qbsuran paru Israel hiya ma rmengo: “Rmengo ka Ben Hadad tnqliyan qbsuran paru: ‘Braho su, pkdusi ku.’” Rmengo ka Axab: “Gaga muudus ka heya na peni? Mtswai mu ka heya.” 33Gisu tmraki ya malu ya naqah ka dheya, qmerac kari na nii de rmengo heya: “Mtswai qbsuran paru ka Ben Hadad!” Rmengo ka qbsuran paru: “Sai maangal ka heya.” Kiya de meyah qbsuran paru hiya ka Ben Hadad ma, saapa na rulu na. 34Rmengo Axab ka Ben Hadad: “Lualang nangal tama mu peeyah tama su we bege mu sunan. Tduwa su smalu lualang su nanak meniq Darmeseq, mntena so tama mu pnheyu meniq Samareia hiya.” Rmengo ka Axab: “Mpuyu ku so pnsdhegan nii, plaxun misu mbrinah.” Kiya de psdehu heya ka qbsuran paru ma, plaxun na pbrinah ka heya.
Mseang Axab Paha Pais ka Mpgeela Kari
35Niqan 1 tnugesa mpgeela kari, heya we pnuyu na kari Utux Tmninun rmengo quri mnsuupu heya: “Beebu kenan ka isu!” Kiya we ini sruwa beebu heya ka seediq kiya. 36Kiya de rngagan na seediq kiya: “Ado ini su qbahang kari Utux Tmninun, qtai! Mlatac su peeyah hini de, meyah qmiyuc phuqil isu ka rkelic rudu.” Mlatac ka seediq kiya de, bale ba smterung rkelic rudu, wada na qyutun phuqil ka heya. 37Smterung 1 dungal seediq ka tnugsaan mpgeela kari ma, rmengo heya: “Beebu kenan ka isu!” Kiya de beebu heya ka seediq nii ma pluqah heya. 38Mosa ka mpgeela kari nii ma, lbuwan na galiq ka doriq ma, priyux lukus tmara qbsuran paru ssiyo elu hiya. 39Moda hiya ka qbsuran paru, mlawa qbsuran paru ka heya: “Mccebu ciida ka tnqliyan, qtai! Brinah madis 1 seediq meyah yaku hiya ka seediq ma, rmengo: ‘Qtai bale ka seediq nii, nasi wada qduriq mgedang ka heya de, knuudus su ka mpririh knuudus na. Uxe uri we, asi su ka mpririh 1 tarantu ging.’ 40Gisu ini ggdema ciida ka tnqliyan de, wada asi kuuka hiya ka seediq kiya.” Cmiyuk heya ka qbsuran paru Israel: “Pdai lnglungan su nanak, muyu psgeegun su.” 41Kiya de asi na ngali ka galiq nbungan na dqeras ka mpgeela kari de, kela su hiya 1 mpgeela kari ka heya we klaun qbsuran paru Israel. 42Rmengo qbsuran paru ka mpgeela kari: “Rmengo so nii ka Utux Tmninun: ‘Ado wada su psaun peeyah baga su ka seediq phqilun mu, kiya de mpririh knuudus na ka knuudus su. Seediq su we mpririh seediq na.’” 43Kiya de mseang riyung ka qbsuran paru Israel ma, naqah ba kuxul na mbrinah Samareia, betaq sapah qbsuran paru na.
Currently Selected:
1 Qbsuran Paru 20: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
