1 Qbsuran Paru 19
19
Meeniq Dgiyaq Xoreb ka Eliyah
1Axab ge, wada phuqil kana mpgeela kari Baal ma kana noda Eliyah we ssneeru na Ijebel. 2Smkagul seediq mosa Eliyah hiya ka Ijebel ma rngagan na: “Betaq ali so nii kusun, ini mu pntnaani so knuudus dmpgeela kari ka isu we mpktetu pkdira kenan ka utuutux.” 3Miicu ka Eliyah, kiya de qduriq ka heya. Dehuk Beerseba Yehudah hiya de htiyan na hiya ka tnqliyan na.
41 ali knksaan na tadus brenux ka heya ma, dehuk tleung toma 1 hnyegan snuura ma, dmurun tmara hhuqil, rmengo: “Utux Tmninun! Kiya baka saya da! Braho su ngali ku hiya ka knuudus mu! Ado nuuqu malu ka pusu rdrudan mu.” 5Kiya de msbaang mtaqi toma snuura hiya ka Eliyah. Qtai! Niqan ka 1 snkgulan baro meyah tmapaq heyi na ma, rmengo heya: “Tutui ma uqi!” 6Qmita ka heya, qtai! Btunux ssiyo tunux na hiya we, niqan pang nuduh btunux ma rusuq nii psaan qsiya. Kiya de mekan pang mimah qsiya ka Eliyah ma, msbaang mtaqi dungal. 7Utux Tmninun we meyah texal dungal Eliyah ka snkgulan baro ma, texal tmapaq heyi na, rmengo: “Tutui ma uqi! Ado theya ka elu ksaun su na.” 8Kiya de mtutuy ma mimah ka heya. Pnsbyaxan pnuqan na nii ka heya we, 40 ali 40 rabi ksaun na dehuk Xoreb dgiyaq nuUtux Baro.
9Mosa lhengo mkrabi hiya ka Eliyah. Qtai! Dehuk heya ka kari Utux Tmninun: “Eliyah, nii su hmuwa hini?” 10Cmiyuk ka Eliyah: “Kiya ba kana ka beyax mu wada ku qmeepah Utux Tmninun, Utux Baro Mdoi Kana Supi ka yaku. Ado qmada sndhegan su ka dseediq Israel ma, hmurah spuhan ma wada phuqil dmpgeela kari su. Wano yaku ka msrangi ma, nii migin phqilan kenan ka dheya!” 11Rmengo ka Utux Tmninun: “Eyah nganguc, osa mheyu bobo dgiyaq meeniq berah Utux Tmninun.” Qtai! Wada mooda hiya ka Utux Tmninun. Sbgihur paru ma mcenga ka bbtunux we, uka ckceka bgihur hiya ka Utux Tmninun. Bobo bgihur de mrunu da. Uka ckceka hiya uri ka Utux Tmninun. 12Bobo runu de meyah ka puniq. Uka ckceka puniq hiya uri ka Utux Tmninun. Bobo puniq de niqan ka tgbiciq ba hrenang. 13Mbahang ka Eliyah de, qruyan na lukus mgbaro ka dqeras na ma, mosa nganguc ma mheyu berah lhengo. Qbhangi! Niqan ka hrenang mquri heya rmengo: “Eliyah, nii su hmuwa hini?” 14Cmiyuk ka Eliyah: “Kiya ba kana ka beyax mu wada ku qmeepah Utux Tmninun, Utux Baro Mdoi Kana Supi ka yaku. Ado qmada sndhegan su ka dseediq Israel ma, hmurah spuhan ma wada phuqil dmpgeela kari su. Wano yaku ka msrangi ma, nii migin phqilan kenan ka dheya!” 15Rmengo Eliyah ka Utux Tmninun: “Osa! Brinah ndaan su ma, psquri tadus brenux Darmeseq. Dehuk su hiya de hrigi abura ka Xajael ma, ngali qbsuran paru Aram. 16Dungal we Hrigi abura ka Yehu laqi laqi Nimsiy uri ma ngali qbsuran paru Israel. Dungal we hrigi abura ka Elisa laqi Sapat pneyah Abel Mexolah. Heya ka mpririh sunan ngali mpgeela kari. 17Qnduriq hlmadac Xajael ka seediq we phqilun Yehu. Qnduriq hlmadac Yehu ka seediq we phqilun Elisa. 18Kiya de rngiun mu 70'00 heyi ka seediq Israel. Dheya we uxe tnhmuku ma tmnunguh quwaq Baal.”
Gmao Elisa
19Kiya de, mlatac peeyah hiya ka Eliyah ma, sterung Elisa laqi Sapat gisu tmabul qnpahan, nii pgeela berah na ka 12 mbbais dapa ma, gisu dmudul 12 mbbais dapa ka heya nanak. Mooda ssiyo na ka Eliyah de shilo na heyi Elisa ka lukus na mgbaro. 20Kiya de hmiti malix dapa na ka Elisa ma, tmalang mosa Eliyah hiya ma, rmengo: “Braho su phtii ku ptunguh quwaq smwaye tama ma bubu mu han. Kiya de mpsnegul ku sunan ka yaku.” Cmiyuk ka Eliyah: “Osa, ado wada ku hmuwa sunan, mhedu de brinah hini.” 21Kiya de mlatac brinah sapah ka heya ma, smipaq 2 dapa. Sptahu na kudo qyqeya dapa pure ka heyi ma speekan na ka seediq. Bobo na de mtutuy ma smnegul Eliyah ma dmayo qmeepah heya ka Elisa.
Currently Selected:
1 Qbsuran Paru 19: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
