1 Qbsuran Paru 18
18
Eliyah ma Dmpgeela Kari Baal
1Bobo wada bsiyaq hari ali, betaq tg3 knkawas. Dehuk Eliyah ka kari Utux Tmninun, rmengo: “Osa, sai mtqita Axab ka isu. Mpquyux ku bobo dxeral ka yaku.” 2Kiya de mosa ka Eliyah. So maha qtaan Axab ka heya. Ciida ka krayan Samareia hiya we sgcuqi bale. 3Axab we, mlawa Obadyahu pusu mpqlahang sapah qbsuran. Obadyahu we miicu ba Utux Tmninun ka heya. 4Phuqil dmpgeela kari nuUtux Tmninun ciida ka Ijebel ge, wada lmeing 1'00 heyi mpgeela kari ka Obadyahu. Tgdahaun na s50 heyi ka dheya we, liingun na ckceka beling dgiyaq ma, biqan na uqun ma qsiya ka dheya. 5Rmengo Obadyahu ka Axab: “Nita qmita kana dxeral nii, mosa ta qmita kana pusu qsiya ma ssiyo yayung, nhuwa slayan ta ka speriq, kiya ka pkuudus dapa dmay ma dapa roba, so uxe mphuqil kana ka tnbugan.” 6Kiya de mt2 msaasu mswaye migin ka dheya, wano ba Axab ka murux mosa 1 elu ma, murux mkkesa 1 elu ka Obadyahu uri.
7Mkkesa elu ciida ka Obadyah, qtai! Msterung heya ka Eliyah. Asi kela heya ka Obadyahu de, asi tgtemaq dxeral ma smiling: “Isu we bale ba tnpusu sapah mu Eliyah ho?” 8Rmengo heya ka Eliyah: “Un. Osa, sai rmengo ka pusu tnsapah su: ‘Qtai! Gaga hini ka Eliyah.’” 9Rmengo ka Obadyah: “Manu qnquwan noda mu ka yaku, betaq su so nii sbege su baga Axab ka yaku ma mphuqil kenan ka heya di? 10Mpquri ku Utux Tmninun, Utux Baro su muudus ani knuwan smdehu, ani su mosa dxeral ma qlhangan inu we, ida mpskagul seediq mosa migin sunan ka tnpusu sapah mu. Nasi rmengo: ‘Uka hini’ mesa ka dheya de, mpsdehu dseediq qnlhangan kiya ka heya ma, bale ba ini daha slai ka isu. 11Saya ka isu ge rmengo su: ‘Sai rmengo ka pusu tnsapah su: Qtai! Gaga hini ka Eliyah.’ 12Nhuwa so wada ku ka yaku de, Bgihur Utux Tmninun we, ddesun sunan mosa dxeral uxe mu nklaan. So kiya de, mnosa ku rmengo Axab. Nasi ini na slai ka isu de, mphuqil kenan ka heya. Tnqliyan su we miicu ku Utux Tmninun peeyah slaqi. 13Phuqil dmpgeela kari Utux Tmninun ciida ka Ijebel we, wada mu liingun ka 1'00 mpgeela kari ma, tgdahaun mu s50 heyi lmeing beling dgiyaq ma, dngaun mu qsiya ma uqun ka dheya. 14Saya rmengo su: ‘Sai rmengo ka pusu tnsapah su. Qtai! Gaga hini ka Eliyah.’ Kiya de ida mphuqil kenan ka heya.” 15Rmengo ka Eliyah: “Mpooda ku Utux Tmninun Mdoi Kana Supi muudus ani knuwan smdehu. Ali saya we ida ku maha mtqita Axab.” 16Kiya de Obadyahu we mosa qmita Axab ma, rmengo oda nii. Kiya de mosa qmita Eliyah ka Axab.
17Qmita Eliyah ka Axab de asi rengo: “Bale ba isu peni? Seediq gisu pqraqil ba Israel!” 18Rmengo ka Eliyah: “Uxe yaku ka pqraqil Israel. Isu ma tama su. Ado malix namu gaya pndakar Utux Tmninun, mosa namu smnegul Baal. 19Saya, sai psseli dgiyaq Karmel yaku hini ka kana seediq Israel ma, 4'50 mpgeela kari Baal dnanga Ijebel ma, 4'00 mpgeela kari Aserah.”
20Kiya de Axab ge, smkagul seediq mosa dseediq Israel hiya ma, psseli dmpgeela kari mosa dgiyaq Karmel. 21Meyah berah ma rmengo kana seediq ka Eliyah: “Maha betaq knuwan ka mtg2 lhebun namu ho? Nasi Utux Baro ka Utux Tmninun de, thei Utux Tmninun. Nasi Baal de, thei Baal.” Ini rengo ka kana seediq. 22Rmengo seediq ka Eliyah: “Wano ba yaku taxa ba heyi ka msngari mpgeela kari Utux Tmninun. Kiya de mpgeela kari Baal we 4'50 heyi. 23Braho su biqi miyan 2 wawa dapa. Dmpgeela kari Baal we tduwan gmao 1 wawa dapa ma, teetu ma posa spuhan bobo qhuni ma, iya ba psrdingi puniq. Mpsramal ku 1 wawa dapa psaun mu bobo qhuni ma, uxe mu psrdingun uri. 24Yamu we druni ka ngayan utux su, yaku we mpdurun ku ngayan Utux Tmninun uri. Cmiyuk ma peeyah puniq psqama we, kiya ka Utux Baro.” Cmiyuk kana ka seediq: “Malu ka lnglungan nii.” 25Rmengo dmpgeela kari Baal ka Eliyah: “Ado hbaro namu ka yamu han. Plaale maangal 1 wawa dapa, mhedu namu psramal de, druni ka ngayan utux namu. Kiya we iya bale psrdingi puniq.” 26Kiya de mhedu psramal wawa dapa ka dheya de, peeyah mgrebu betaq ceka naali, ida mlawa ngayan Baal ka dheya: “Baal! Braho su cyuki miyan wa!” Kiya de we, uka ba ka hrenang ma, uka bale ka cniyuk. Kiya de mtlibu kmeeki siyo spuhan ka dheya. 27Betaq ceka naali ciida, mhulis dheya ma rmengo dheya ka Eliyah: “Pmbaro hrenang namu mlawa! Ado utux ka heya, nhuwa gaga lmngelung ka heya, uxe uri we gaga mtbeyax ka heya, uxe uri we gaga mkkesa elu, uxe uri we gaga mtaqi. Ttui ka heya da!” 28Paru bale hrenang daha mlawa ka dheya ma, spooda daha gaya daha, dmoi hlmadac pluqah heyi daha nanak ma, betaq msdara kana ka heyi daha. 29Wada hmrinas ceka naali, ida mnhemuc mdiras mlawa ka dheya. Betaq spuhan keeman ciida, ida uka ka hrenang, uka ka cniyuk ma, uka ka mqita dheya.
30Kiya de rmengo kana seediq ka Eliyah: “Eyah kenan hini ka yamu.” Kiya de meyah heya ka kana seediq. Eliyah we, slmeun na ka spuhan Utux Tmninun mnhurah. 31Eliyah we, muyu pnswayan pusu rdrudan Yakobu, mangal 12 btunux ka heya. Ado rmnengo Yakobu ka Utux Tmninun: “Israel kesun ka ngayan su.” 32Eliyah ge, ngali na ka btunux nii ma sbgrahi na mharac spuhan thmkuwan Utux Tmninun. Kriyan na ka mtqiri so maha mtduwa sheruy 2 sea demux mugi. 33Dungal we psaan na qhuni ka bobo spuhan ma steetu na tgbiciq ka wawa dapa psaun na bobo qhuni de, rmengo: “Sai pstenge tmquri qsiya ka 4 kulu qsiya ma, hrgaani snapuh psqmaun ma bobo qhuni.” 34Rmengo dungal ka heya: “Sxali dungal!” Kiya de moda hmeruy mn2 dungal ka dheya. Dungal we rmengo: “Sxali dungal!” Kiya de mosa hmeruy mn3 dungal ka dheya. 35Kiya de msqluli mtqiri spuhan ka qsiya ma stenge toma ayu.
36Dehuk ka spuhan gbiyan ciida, Eliyah mpgeela kari ge, mosa berah spuhan ma dmurun: “Utux Tmninun, Utux Baro nuAbraham, Yijxaq ma, Yakobu! Braho su pgklai isu ka Utux Tmninun nuIsrael ali saya ka dseediq ma, yaku we tnqliyan su muyu pnosa su kari qmeepah kana oda. 37Braho misu bale, cyuki ku! Utux Tmninun! Cyuki ku! Kiya de mpkela isu, Utux Tmninun we Utux Baro. Isu ka pmbrinah lhebun daha.” 38Kiya de, ptuting puniq ka Utux Tmninun ma, psqmai na kana ka snapuh psqama, qhuni, btunux, dxeral ma wada na kdngeun psqama ka qsiya gaga ayu uri. 39Qmita so nii ka rahul seediq de tgtemaq dxeral kana ma rmengo: “Utux Tmninun ka Utux Baro! Utux Tmninun ka Utux Baro!” 40Rmengo dheya ka Eliyah: “Qerak kana ka mpgeela kari Baal ma, iya pqdriqi ani 1!” Kiya de qrapun daha ka dheya. Desun Eliyah ssiyo ayu Qison hiya ka dheya ma wada na saan phuqil hiya.
Qnhdean Mnddengu Karac
41Rmengo Axab ka Eliyah: “Osa mekan ma mimah. Ado niqan ka hrenang nuhur paru.” 42Kiya de mosa mekan ma mimah ka Axab. Mosa bungu dgiyaq Karmel ka Eliyah ma, shukuc na dxeral psaun na cenga pungo papak na ka tunux na. 43Rmengo tnqliyan na: “Osa qmita rcilung” Kiya de mosa qmita ka tnqliyan na. Rmengo: “Uka ani maanu.” Rmengo ka Eliyah: “Osa texal dungal.” Mn7 wada so nii. 44Tgmn7 de rmengo ka tnqliyan na: “Tai! Niqan ka mntena qapal baga plabu we gisu mnkala peeyah rcilung.” Rmengo ka Eliyah: “‘So su uxe sklaan quyux we posa rulu ka dapa dmay ma osa nhari’ kesa rmengo ka Axab.” 45So nii, bale ba sbgihur ma mnkuung bungan plabu ka karac, nuhur paru da. Paapa rulu ka Axab ma mosa quri Yijreel. 46Dmoi heyi Eliyah ka baga Utux Tmninun, kiya de smekur hwinuk palic lukus na ma, mgeela Axab tmalang betaq alang Yijreel.
Currently Selected:
1 Qbsuran Paru 18: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
