1 Qbsuran Paru 17
17
Eliyah ma Mdngdengu Karac
1Eliyah seediq Tisbiy meniq alang Gilad we rmengo Axab: “Mpooda ku tnhmkuwan mu Utux Tmninun, Utux Baro nuIsrael smdehu. Nasi ku ini durun ka knkawas nii de, uxe mpsrdemus ma uxe mpquyux uri.” 2Dehuk Eliyah ka kari Utux Tmninun, rmengo: 3“Latac peeyah hini osa mquri nklaan hido. Osa tgleing ssiyo ayu Kerit quri nklaan hido yayung Yarden hiya. 4Isu ge, mahi qsiya ayu. Tena ku wada posa kari tyaqung mdanga sunan ka heya.” 5Kiya de muyu kari Utux Tmninun ma mosa meniq ssiyo ayu Kerit nklaan hido yayung Yarden ka heya. 6Mgrebu we hmaduc pang ma heyi heya ka tyaqung, keeman we niqan pang ma heyi uri. Mimah qsiya ayu ka heya. 7Yaa wada knpiya ali, mdengu ka ayu qsiya, ado ini qyuxi quyux ka bobo dxeral.
Eliyah ma Mqedil Mqrinuc Carpat
8Dehuk heya ka kari Utux Tmninun, rmengo: 9“Isu we osa meniq Carpat dxeral Cidon hiya. Qtai! Tena mu wada rngagan ka 1 mqedil mqrinuc dmnanga sunan.” 10Kiya de mosa Carpat ka Eliyah. Dehuk rhengun alang ciida, qmita! Niqan ka 1 mqedil mqrinuc nii lmamu qhuni ka heya. Asi plawa heya ka Eliyah: “Braho misu, ngali ppsaun su pmahi ku tikuh qsiya su ho?” 11Mosa mangal qsiya ciida ka heya we, mlawa heya dungal ka Eliyah: “Braho su desi ku tikuh pang uri ka baga su.” 12Rmengo ka heya: “Mpsdehu ku Utux Tmninun, Utux Baro su muudus ani knuwan, uka ku pang. Wano 1 ba wamo nemu mugi ka gaga ckceka rusuq ma, biciq ba ka abura curung gaga rusuq. Qtai! Maha ku migin 2 qhuni, adis mu sapah ppsramal pure pang uqun miyan yami laqi mu. Mhedu miyan mekan de, asi miyan tara mhuqil da!” 13Rmengo heya ka Eliyah: “Iya slhebun! Osa moda rnengo su! Kiya de plaale pure ani su 1 biciq ba pang ma bqani kenan. Bobo na hiya de smlei pang sunan ma laqi su. 14Ado rmnengo so nii ka Utux Tmninun, Utux Baro nuIsrael: ‘Uxe mpkuuka ka nemu mugi rusuq ma, uxe mpsetuq ka abura gaga rusuq uri, asi ka betaq ku pquyux bobo dxeral ali ciida.’” 15Kiya de muyu kari Eliyah mosa pure ka mqedil nii. Heya, Eliyah ma, dseediq sapah na we, bsiyaq hari ali nekan daha. 16Bale ba ini kuuka ka nemu mugi meniq rusuq ma, ini ksetuq ka abura meniq rusuq uri. Mntena so kari Utux Tmninun rnengo na Eliyah.
17Bobo na nii, tnpusu mqedil sapah, kiya ka mqedil nii we, mnarux baka laqi na ma, betaq so uka ka hengak na ka laqi na. 18Rmengo Eliyah ka mqedil mqrinuc: “Seediq Utux! Manu ba pnugluban ta betaq su meyah yaku hini, kiya ka lmngelung qnquwan noda mu ka Utux Baro, betaq phuqil laqi mu ka heya ho?” 19Rmengo heya ka Eliyah: “Peeyah kenan ka laqi su.” Kiya de dilun na peeyah berah mqedil ka laqi. Desun na truma gaga na niqan mgbaro ma, psaun na qlapo na nanak. 20Dmurun Utux Tmninun rmengo ka heya: “Utux Tmninun, Utux Baro mu! Tnooda ku sapah mqedil mqrinuc nii, hmuwa su peeyah pqraqil heya ma, pphuqil su laqi na ho?” 21Eliyah ge, mn3 taapa bobo laqi ma rmengo dmurun Utux Tmninun: “Utux Tmninun, Utux Baro mu! Braho misu bale. Pbrnahi Peeyah dungal ka knuudus laqi nii!” 22Mbahang dnurun Eliyah ka Utux Tmninun de, pbrnahun na heya ka knuudus laqi de, muudus ka laqi nii. 23Eliyah ge, desun na truma ka laqi ma, mremux truma sbege na bubu na ma rmengo: “Tai! Gisu muudus ka laqi su da!” 24Rmengo Eliyah ka mqedil: “Saya, klaun misu bale. Isu we seediq Utux. Bale ba ka kari Utux Tmninun Pnooda na quwaq su.”
Currently Selected:
1 Qbsuran Paru 17: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
