1 Qbsuran Paru 16
16
1Dehuk Yehu laqi Xananiy ka kari Utux Tmninun, mseang quri Basa: 2“Nangal misu peeyah ckceka qbulic ka isu ma, pnhyegan misu mqbsuran paru Israel seediq mu. Ma su betaq qmeepah elu ndaan Yarabeam ma, pqnnaqah su seediq mu Israel. Qnquwan noda daha ka gisu ptutuy seang mu. 3Qtai! Qhdeun mu phuqil ka Basa ma tnsapah na, pntenaun mu so sapah Yarabeam laqi Nebat. 4Kana dseediq Basa mnhuqil alang we uqun huling ma, mnhuqil breenux we uqun qbheni ga karac baro.”
5Duma noda Basa, kana ndaan ma malu noda na we, uxe gaga spatis ‘Patis ndaan Dqbsuran Paru Israel’ hiya peni? 6Msuupu mtaqi pusu rdrudan na ka Basa ma, saan daha smeku alang Tircah. Elah laqi na ka lmutuc heya mqbsuran paru. 7Meeyah Yehu mpgeela kari laqi Xananiy ka kari Utux Tmninun quri mseang Basa ni tnsapah na. Ado kana naqah noda na ini pndungus ckceka doriq Utux Tmninun ka Basa, mntena ppeyah seang Utux Tmninun. Muyu ida so qnnaqah sapah Yarabeam ma dungal we wada phuqil kana sapah Yarabeam.
Elah Qbsuran Paru Israel
8Tg26 knkawas qnlhangan na Yehudah ka Asa qbsuran paru we mqbsuran paru Israel Tircah hiya ka Elah laqi Basa ma 2 knkawas qbsranun na. 9Jimriy qbsuran mpqlahang dmeka supi rulu mpcceebu we tbrinah heya. Ciida ka Ila we bsukan nmahan na sino sapah Arca qbsuran mpqlahang sapah Tircah qbsuran paru. 10Kiya de mosa kmremux phuqil Ila ka Jimriy ma, gmeeluk mangal qbsuran paru na. Ciida we tg27 knkawas qlhangan na Yehudah ka Asa qbsuran paru.
11Mqbsuran paru ka heya de, phqili na kana ka sapah Basa, ani 1 ini na rngii ka drseno lutuc ma dadal na. 12Ida so kari rnengo na Basa pnooda na Yehu mpgeela kari ka Utux Tmninun, wada phqilun Jimriy ka kana sapah Basa. 13So nii we pneyah kana qnquwan noda Basa ma Elah laqi na. Kiya ka mege qnquwan noda Israel pnoda na tikung uka rrihan pstutui seang Utux Tmninun, Utux Baro nuIsrael kiya. 14Duma noda Elah, kana ndaan na we, uxe gaga spatis ‘Patis ndaan Dqbsuran Paru Israel’ hiya peni?
Jimriy Qbsuran Paru Israel
15Tg27 knkawas qlhangan na Yehudah ka Asa qbsuran paru we mqbsuran paru Tircah hiya ka Jimriy ma mk7 ali qbsranun na. Ciida, mqquri Gibton alang seediq Peliset qmburang ka seediq Israel. 16Mbahang kari, wada tbrinah ka Jimriy, mesa ka dsupi de, phqilun daha ka qbsuran paru. Ali ciida kana seediq Israel we ngali daha qbsuran paru ka Amriy qbsuran supi. 17Msuupu kana seediq Israel ka Amriy ma steetu peeyah Gibton mosa tmlibu Tircah. 18Qtaan Jimriy ini baka ka alang na de, mosa psqama sapah qbsuran paru ka heya ma psqama phuqil heya nanak hiya. 19Ado qnquwan noda na ma, ini mndungus Utux Tmninun ka noda na, muyu ida so elu ndaan Yarabeam mege qnquwan noda Israel kiya. 20Duma noda Jimriy, kana ndaan na we, uxe gaga spatis ‘Patis ndaan Dqbsuran Paru Israel’ hiya peni?
Amriy Qbsuran Paru Israel
21Ciida, mtg2 ka seediq Israel. Kingal dnkean we msuupu Tibniy laqi Ginat ma satang daha ngalun qbsuran paru. Meniq ka kingal dnkean we msuupu Amriy. 22Kiya de dseediq msuupu Amriy we mgkala mbeyax dseediq msuupu Tibniy laqi Ginat. Mhuqil ka Tibniy de, Amriy ka mqbsuran paru. 23Tg31 knkawas qnlhangan na Yehudah ka Asa qbsuran paru we mqbsuran paru Israel ka Amriy ma 12 knkawas qbsranun na. 6 knkawas ka nniqan na Tircah qmlahang qlhangan. 24Bobo na nii, brigi na 2 tarantu ging ka dgiyaq Samareia peeyah Semer ma, smalu alang dgiyaq hiya. Spuyu na ngayan alang, Samareia kesun na tmngayan ka alang snmalu na.
25Amriy we ini mndungus Utux Tmninun ka noda na. Qnnaqah noda na we mgkala ani ima qbsuran paru tgberah na. 26Ado moda ida so kana elu Yarabeam laqi Nebat, mege qnquwan noda seediq Israel, spooda daha tikung uka rrihan pstutui seang Utux Tmninun, Utux Baro nuIsrael kiya. 27Duma noda Amriy, kana ndaan na ma, malu ndaan na we, uxe gaga spatis ‘Patis ndaan Dqbsuran Paru Israel’ hiya peni? 28Msuupu mtaqi pusu rdrudan na ka Amriy, skuun daha Samareia hiya. Axab laqi na ka lmutuc Amriy mqbsuran paru.
Axab Qbsuran Paru Israel
29Tg38 knkawas qlhangan na Yehudah ka Asa qbsuran paru we mqbsuran paru Israel ka Axab laqi Amriy. 22 knkawas qmlahang Israel Samareia hiya ka Axab. 30Axab laqi Amriy we ini pndungus Utux Tmninun ka noda na, mgkala kana qbsuran paru tgberah na. 31Mnoda qnquwan noda Yarabeam laqi Nebat. Ngalun na uxe mnmanu ka kiya ma, nangal na mqedil na ka Ijebel weewa Etbaal qbsuran paru Cidon ma, meepah ma thmuku Baal. 32Dungal we smalu sapah thmkuwan Baal meeniq Samareia hiya ma, pheyu spuhan Baal toma na hiya. 33Dungal ka Axab we smalu tikung Aserah ma, ndaan na we pstutui seang Utux Tmninun, Utux Baro nuIsrael, mgkala kana qbsuran paru tgberah na. 34Qnlhangan Axab ciida, tmgeru smalu alang Yerixo ka Xiyel seediq Beytel. Ida so nkari Utux Tmninun pnooda na Yehosua laqi Nun, smpusu smalu alang nii ciida, wada uka ka Abiram qbsranan laqi na ma, smalu rhengun ciida, wada uka ka Segub tgswai laqi na.
Currently Selected:
1 Qbsuran Paru 16: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
