1 Qbsuran Paru 15
15
Abiyam Qbsuran Paru Yehudah
(2 No 13:1-14:1)
1Tg18 knkawas qnlhangan na Israel ka Yarabeam qbsuran paru laqi Nebat we, mqbsuran paru Yehudah ka Abiyam, 23 knkawas qbsranun na Yerusalem hiya. Maakah weewa Absalom ka ngayan bubu na. 3Abiyam we mooda ida so qnquwan noda kana tama na ma, ini so lnglungan Dawid rudan na smkingal lhebun na thei Utux Tmninun, Utux Baro na. 4Kiya de Utux Tmninun, Utux Baro na we, ririh Dawid ida na pniqan camo ka Yerusalem, pltudun na pqbsuran paru ka laqi na ma, pgdhegun na ka Yerusalem. 5Ado Dawid ge, wano ba oda quri Uriyah seediq Xet, mndungus Utux Tmninun ka noda na, kana kndesan na we ini bale tbrinah pnosa kari Utux Tmninun. 6Ini psetuq mccebu ka kndesan Rexabam ma Yarabeam. 7Duma noda Abiyam, kana ndaan na we, uxe gaga spatis ‘Patis ndaan Dqbsuran Paru Yehudah’ hiya peni? Ini psetuq mccebu ka Abiyam ma daha Yarabeam. 8Msuupu mtaqi pusu rdrudan na ka Abiyam ma, saan daha smeku alang Dawid. Asa laqi na ka lmutuc Abiyam mpqbsuran paru.
Asa Mqbsuran Paru Yehudah
(2 No 15:16-16:6)
9Tg20 knkawas qnlhangan na Israel ka Yarabeam qbsuran paru we, mqbsuran paru Yehudah ka Asa, 1041 knkawas qbsranun na Yerusalem hiya. Maakah ka ngayan payi na ma weewa Absalom. 11Asa we muyu Dawid rudan na, mndungus Utux Tmninun ka noda na. 12Lwaqun na peeyah sapah thmkuwan ka rseno kkbrexun, dungal we hrahun na kana ka tikung snmalu rdrudan na. 13Betaq na wada na ngalun kana ka tluungan Maakah mqbsranan ma payi qbsuran paru, ado smnalu Aserah tikung pqnqihun ka Maakah. Asa we ptkuri na ka tikung na ma, psqmai na ssiyo ayu Qidron. 14Kiya de ini na sliqi ka spuhan sapah thmkuwan hiya. Lhebun Asa we ida mskingal ba mquri Utux Tmninun ka kana kndesan na. 15Asa we psaun na sapah thmkuwan Utux Tmninun kana ka king ma ging pnrtaso pntgaanak tama na ma heya nanak.
16Ini psetuq mccebu ka kndesan Asa ma Basa qbsuran paru Israel. 17Basa qbsuran paru Israel we mosa mccebu Yehudah ma, slmeun na ka Ramah. Ini na srwai poda Asa qbsuran paru Yehudah hiya ka seediq. 18Kiya de Asa we, sbege na baga dqbsuran mdayo ka kana king ma ging mnsngari peeyah sapah thmkuwan Utux Tmninun ma repun sapah qbsuran. Skgulan na mosa Ben Hadad laqi Tabrimon, lqlaqi laqi Xejyon qbsuran paru Aram dxeral Darmeseq hiya, mosa rmengo: 19“Mnoda psdehu ka tama su ma tama mu, mooda ku so nii mpsdehu ku sunan ka yaku uri. Qtai! Bege mu lnabu isu ka king ma ging. Braho su laxi ka pnsdhegan namu Basa qbsuran paru Israel, tai so mpbrinah peeyah hini ka dheya.” 20Mbahang dnurun Asa qbsuran paru ka Ben Hadad de, skgulan na mosa mccebu lualang Israel ka dqbsuran supi na, betaq ngalun daha ka Iyon, Dan, Abel Beyt Maakah ma kana dxeral Kineret ma Naptaliy. 21Mbahang nii ka Basa de, malix smalu Ramah ma ida mosa meeniq Tircah. 22Kiya de Asa qbsuran paru we, smneru kari quri seediq Yehudah, ini na srwai phetur ka seediq, smkagul dheya hhaqul bbtunux ma qqhuni dnoi Basa smalu Ramah. Ngalun na ssmalu qbrangan Geba ma Micpah dxeral Binyamin hiya. 23Duma noda Asa, malu qnepah na ma, kana noda na ma snmalu na lualang we, uxe gaga spatis ‘Patis ndaan Dqbsuran Paru Yehudah’ hiya kana peni? Rudan ka Asa we mnarux papak ka heya. 24Msuupu mtaqi pusu rdrudan na ka Asa ma, saan daha smeku alang Dawid pusu rdrudan na. Yehosapat laqi na ka lmutuc Asa mqbsuran paru.
Nadab Qbsuran Paru Israel
25Tg2 knkawas qnlhangan na Yehudah ka Asa qbsuran paru we mqbsuran paru Israel ka Nadab laqi Yarabeam ma 2 knkawas qlhangan na. 26Nadab we ini pndungus Utux Tmninun ka noda na. Mooda elu ndaan tama na ma, kiya ka mooda qnquwan noda tama na wada mege qnquwan noda Israel.
Basa Qbsuran Paru Israel
27Tbrinah Nadab ka Basa laqi Axiyah seediq Yisaskar we, phqilun na Gibton dxeral seediq Peliset ka heya. Ciida gisu kmremux Gibton ka Nadab ma seediq Israel. 28Tg3 knkawas qlhangan na Yehudah ka Asa, Basa we wada na phqilun ka Nadab ma, heya ka wada mangal qbsuran paru na. 29Mqbsuran paru ka Basa de, wada na phqilun kana ka tnsapah Yarabeam. Kana niqan knuudus tnsapah Yarabeam we, ini bale srangi wada phqilun kana. Ida so nkari Utux Tmninun pnooda na Axiyah mpgeela kari seediq Siylon tnqliyan na. 30Wada so nii we ririh qnquwan noda Yarabeam ma, heya ka wada mege qnquwan noda seediq Israel ma, ptutui seang Utux Tmninun, Utux Baro nuIsrael.
31Duma noda Nadab, kana ndaan na we, uxe gaga spatis ‘Patis ndaan Dqbsuran Paru Israel’ hiya kana peni? 32Ini psetuq mccebu ka kndesan Asa ma Basa qbsuran paru Israel.
33Tg3 knkawas qnlhangan na Yehudah ka Asa qbsuran paru we mqbsuran paru kana Israel meniq Tircah hiya ka Basa laqi Axiyah ma, 24 knkawas ka qnlhangan na. 34Ini pndungus Utux Tmninun ka noda na. Moda ida so elu ndaan Yarabeam pqnnaqah su seediq Israel.
Currently Selected:
1 Qbsuran Paru 15: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
