1 Qbsuran Paru 14
14
Hnqilan Laqi Yarabeam
1Ciida, mnarux ka Abiyah laqi Yarabeam. 2Rmengo mqedil na ka Yarabeam: “Pryuxi ka lukus su, so su daha uxe klaun mqedil su Yarabeam ka isu. Osa Siylo, qtai, gaga hiya ka Axiyah mpgeela kari. Rmnengo kenan mpqbsuran paru ku dseediq nii ka heya. 3Desi 10 pang ma duma mepux pang ma 1 rusuq beyuq walu osa hiya. Ida mptgesa ka heya mphuwa mesa ka laqi nii.”
4Kiya de moda ida so rmnengo ka mqedil Yarabeam. Mosa Siylo ka heya ma dehuk sapah Axiyah. Csrumo doriq knrudan ini kleexan qnita na ka Axiyahu. 5Rmengo Axiyahu ka Utux Tmninun: “Qtai! Gisu ka mqedil Yarabeam ma meeyah smiling quri laqi na. Ado gaga mnarux ka laqi na. So ka rrengo su we rngagi ka heya. Mpnnangi so mqedil seediq meyah ka heya.”
6Hani mremux rhengun ka heya, mbahang hrenang papak na ka Axiyahu de rmengo: “Mqedil Yarabeam, teme! Ma su mnnangi so ma mqedil seediq ho? Rrengo mu sunan ka pnosa kari we so smtali! 7Sai rmengo ka Yarabeam: ‘So nii kari Utux Tmninun, Utux Baro nuIsrael: Gneegan misu peeyah dseediq mu ka isu ma, phyegan misu mpqbsuran paru Israel seediq mu. 8Snliqan mu ka qlhangan sapah Dawid ma, sbege mu sunan. Kiya de we, ini su snegul Dawid tnqliyan mu, muyu gaya pndakar mu peeyah lhebun thei kenan ma, qmeepah quri malu oda meeniq doriq mu. 9Krinah su qmeepah qnnaqah, hmrinas noda ani ima tgberah su. Qmada su kenan, pheyu su tikung icil ma, muuduh su smalu tikung xiluy pstutui seang mu, betaq su qmada bukuy yaku. 10Kiya de, qtai! Pqrqilun mu ka sapah Yarabeam. Ani gaga ngalan tnqliyan, gaga mtraguh ka rseno we, ida asi ka phqilun peeyah ckceka Israel kana. Mpkuuka ku sapah Yarabeam, mntena ku seediq nii smkesik quti betaq mu pkngalun. 11Kana tnsapah Yarabeam we, mnhuqil alang we uqun huling ma, mhuqil breenux we uqun qbheni karac. Rnengo Utux Tmninun ka nii.’ 12Kiya de osa sapah su da! Mremux papak su alang ciida, mphuqil ka laqi su. 13Mptsdamac lmingis heya ma mseku heya ka kana seediq Israel. Kana dseediq sapah Yarabeam we, wano laqi nii ka skuun habung. Ado sapah Yarabeam we wano laqi nii ka mndungus malu noda na quri Utux Tmninun, Utux Baro nuIsrael. 14Mpheyu 1 qbsuran paru mpqlahang Israel ka Utux Tmninun. Ali ciida, mphuqil tnsapah Yarabeam ka heya. Knuwan ka mooda so nii ho? Mooda saya di. 15Mpcebu Israel ka Utux Tmninun, llgelu na mntena so lmgelu brhibuh gaga ckceka qsiya. Dungal we gbilun na peeyah dxeral bnege na rdrudan daha ma, pswayan na yayung Paru hiya. Ado snmalu tikung Aserah ma pbrebur seang Utux Tmninun ka dheya. 16Ririh ba qnquwan noda Yarabeam ma, ririh heya ka wada mege qnquwan noda Israel, kiya ka sqada Utux Tmninun ka Israel.”
17Mtutuy mosa Tircah ka mqedil Yarabeam, hani qmango rhengun ciida, mhuqil ka laqi na. 18Smeku heya ma, tsdamac lmingis heya ka seediq Israel. Ida so kari rnengo Axiyahu mpgeela kari tnqliyan Utux Tmninun.
Hnqilan Yarabeam
19Duma ndaan Yarabeam, quri so hmuwa mesa mccebu ma, qmlahang we, qtai, gaga spatis patis ‘Patis ndaan Dqbsuran Paru Israel’ hiya kana. 2022 knkawas qbsranun na paru ka Yarabeam, kiya de msuupu taqi pusu rdrudan na. Nadab laqi na ka lmutuc heya mqbsuran paru.
Rexabam Qbsuran Paru Yehudah
(2 No 11:5-12:15)
21Quri Rexabam laqi Selomoh qbsuran paru Yehudah. Ngalan qbsuran paru we 41 knkawas na. Mneeniq alang Yerusalem, kiya ka alang gneegan peeyah kana pnswayan rudan Israel pnheyu ngayan Utux Tmninun we 17 knkawas. Naamah ka ngayan bubu Rexabam ma seediq Amon. 22Ini pndungus Utux Tmninun ka noda dseediq Yehudah. Hmrinas rdrudan daha ka qnquwan noda daha ka ptutui seang Utux Tmninun. 23Ado smmalu sapah thmkuwan bobo dgiyaq biciq ma toma qhuni ma, pheyu eruc hnyegan ma tikung Aserah ka dheya. 24Betaq niqan drseno kkbrexun ka sapah thmkuwan daha uri. Dheya we muyu seediq icil lnwaqan Utux Tmninun peeyah berah Israel ma, moda kana oda pqnqihun ka dheya.
25Tg5 knkawas ngalan qbsuran paru ka Rexabam, mosa mccebu Yerusalem ka Siysaq qbsuran paru Micrayim. 26Wada na glekun mangal ma madis ka pusu dnoi sapah thmkuwan Utux Tmninun ma sapah qbsuran paru. Dungal we kana qeerung heyi nSelomoh snmalu king uri. 27Rexabam we prihan na dqqeerung heyi snmalu limuk ka snmalu king nii ma, sbege na mpqlahang rhengun paru sapah qbsuran paru. 28Mosa sapah thmkuwan Utux Tmninun klaali ka qbsuran paru we, dmoi qqeerung heyi nii ka mpqlahang rhengun. Bobo na de, psaun daha truma sapah qlhangan dungal.
29Duma noda na, kana ndaan Rexabam we, uxe gaga spatis ‘Patis Ndaan Dqbsuran Paru Yehudah’ hiya peni? 30Ini psetuq mccebu ka Rexabam ma Yarabeam. 31Msuupu mtaqi pusu rdrudan na ka Rexabam ma, spuun daha smeku habung pusu rudan daha alang Dawid hiya. Naamah seediq Amon ka bubu na. Abiyam laqi na ka lmutuc Rexabam mqbsuran paru.
Currently Selected:
1 Qbsuran Paru 14: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
