1 Qbsuran Paru 13
13
1Qtai! Muyu kari Utux Tmninun pneeyah Yehudah meyah Beytel ka seediq Utux. Gisu smapuh skenux ssiyo spuhan ciida ka Yarabeam. 2Muyu kari Utux Tmninun ka seediq Utux, mquri spuhan mdiras mlawa: “Spuhan! Spuhan! Rmengo so nii ka Utux Tmninun: ‘Tai! Mptuting 1 laqi rseno ka sapah Dawid, Yosiyahu kesun tmngayan. Heya ge, ngalun na snapuh bobo su hiya ka dmsapuh gaga psqama skenux dgiyaq biciq hiya ma, duhun na bobo su hiya ka buuc seediq.’” 3Dungal mege 1 pnskraya ka seediq Utux: “Nii ka pnskraya rnengo Utux Tmninun: ‘Tai, mphurah ka spuhan nii ma, mpqcuwaq ka qbulic bobo spuhan.’” 4Mbahang kari seediq Utux mlawa quri spuhan Beytel ka Yarabeam qbsuran paru de, hmkero baga na peeyah spuhan, rmengo: “Qerak ka seediq gaga!” Kiya de mqquri heya hmnkero ka baga na we mtkere ini tduwa skerun da. 5Mhurah ka spuhan uri ma, mcuwaq nganguc ka qbulic. Pbale ba kari Utux Tmninun pnooda na seediq Utux pnskraya na. 6Rmengo seediq Utux ka qbsuran paru: “Braho misu, druni ku hiya, psai ku huwe Utux Tmninun, Utux Baro su, so na klmeun ka baga mu!” Kiya de dmurun bukung ka seediq Utux de ida so baga na dungal ka baga qbsuran paru. 7Rmengo seediq Utux ka qbsuran paru: “Tqene kenan nita msange sapah mu ho? Pyahe ta ka beyax su lhebun dungal, ma Biqun su mu qnaras.” 8Cmiyuk qbsuran paru ka seediq Utux: “Ani saku biqan dmeka sapah qbsuran paru we, uxe ku mpsuupu mosa sunan. Uxe ku meekan uqun ma mimah qsiya hini uri. 9Ado pndakar ku na rmengo ka Utux Tmninun: ‘Iya ekan uqun, iya imah qsiya, iya ooda elu ndaan su ka meyah sapah.’” 10Kiya de mbrinah moda elu icil mosa sapah na ka seediq Utux ma, ini ooda elu ndaan na mosa Beytel ciida.
Rudan ba Mpgeela Kari Beytel
11Ga meniq Beytel hiya ka 1 rudan ba mpgeela kari. Meyah ka laqi na ma, srengo na heya ka kana ndaan seediq Utux mneeniq Beytel hiya ma, nkari seediq nii rnengo na quri qbsuran paru. 12Kiya de rmengo heya ka tama na: “Wada moda inu ka seediq Utux kiya di?” Qmnita elu wada daan seediq Utux pneeyah Yehudah ka lqlaqi na. 13Posa kari laqi na ka rudan mpgeela kari: “Psmali ku hiya dapa roba.” Kiya de mhedu psramal dapa roba ka dheya de, paapa dapa roba ka tama daha. 14Mosa smdurak seediq Utux ka heya. Qtaan na nii tleung toma raus ka seediq Utux de, rmengo heya: “Isu ka seediq Utux pneyah Yehudah ho?” Rmengo ka heya: “Un, yaku.” 15Rmengo heya ka rudan mpgeela kari: “Nita mekan hnpure sapah mu.” 16Rmengo ka seediq Utux: “Uxe ku mpbrinah theyaq mosa sunan. Ini ku tduwa msuupu sunan mekan uqun ma mimah qsiya hini uri. 17Ado mdakar rmengo kenan ka Utux Tmninun: ‘Iya ekan uqun ma iya imah qsiya ma, iya oda ndaan su ka meyah su sapah.’” 18Rmengo heya ka rudan mpgeela kari: “Mntena ku sunan, mpgeela kari ka yaku uri. Muyu nkari Utux Tmninun ka snkgulan baro ma rmengo kenan: ‘Pbrinah madis sapah su ka seediq gaga ma qdali uqun ma pmahi qsiya.’” So nii qbriqun na ka seediq nii. 19Kiya de msuupu rudan mpgeela kari mbrinah ka seediq Utux ma mekan uqun, mimah qsiya sapah na.
20Msuupu mekan ka dheya ciida, dhekan kari Utux Tmninun ka mpgeela kari pnbrinah seediq Utux. 21Pmbaro rmengo quri seediq Utux pneyah Yehudah ka heya: “Rmengo so nii ka Utux Tmninun: ‘Ini su qbahang pnosa kari Utux Tmninun ma, ini su puyu pnugaya Utux Tmninun, Utux Baro su. 22Betaq su mbrinah, mekan uqun ma mimah qsiya dxeral pndakar misu. So kiya de, bqerus su we, uxe reesun mpsuupu rdrudan su.’” 23Bobo mnhedu mekan uqun ma mimah qsiya ka seediq Utux de, psramal dapa roba mpgeela kari nadis na ka rudan mpgeela kari. 24Wada ka seediq Utux, sterung 1 rkelic rudu tudu elu ma, wada qmeyuc phuqil heya. Bqerus na we spaux elu hiya ka bqerus na ma nii mheyu ssiyo na hiya ka dapa roba. Gisu mheyu ssiyo bqerus na ka rkelic rudu uri. 25Qtai! Seediq mnoda hiya ka qmita bqerus seediq nii spaux elu ma, nii mheyu ssiyo na hiya ka rkelic rudu de, mosa alang gaga niqan rudan mpgeela kari ma rmengo hiya.
26Mbahang nii ka rudan mpgeela kari pnbrinah seediq Utux de, rmengo: “Seediq Utux ini qbahang pnosa kari Utux Tmninun ka nii, kiya ka Utux Tmninun we wada na sbege rkelic rudu. Sgliqun phuqil rkelic rudu mntena kari Utux Tmninun rnengo na quri heya.” 27Mdakar rmengo laqi na ka rudan mpgeela kari: “Psmali ku dapa roba.” Kiya de mhedu psramal dapa roba ka dheya. 28Mosa ka heya de qtaan na nii elu hiya ka bqerus seediq Utux, gaga mheyu ssiyo na ka dapa roba ma rkelic rudu. Ini ekan bqerus ka rkelic rudu ma, ini na sgliqi ka dapa roba uri. 29Dilun rudan mpgeela kari ka bqerus seediq Utux ma, spaapa na bukuy dapa roba. Desun na alang na ma csdmatun na bale smeku. 30Rudan mpgeela kari we skuun na habung na ka bqerus ma tsdamac lmingis heya: “Pgaalu su bale! Mtswai mu!” 31Bobo smneku de rmengo laqi na ka rudan mpgeela kari: “Mhuqil ku de yahi ku smeku habung seediq Utux hini ma, pniqi ssiyo buuc seediq na ka buuc mu. 32Ado pnuyu na kari Utux Tmninun, kiya ka mpbale kari rnengo na quri spuhan Beytel ma spuhan gaga dgiyaq biciq Samareia we, maha mpuso kiya.”
Paru Qnquwan Noda Yarabeam
33Bobo na nii, ida ini alix qnnaqah oda na ka Yarabeam. Ida pheyu msapuh sapah thmkuwan seediq ka heya. Kana kmqeepah we, prtaso na psaanak ma, phyegun na msapuh spuhan gaga dgiyaq biciq. 34Oda nii ka wada paru ba qnquwan noda tnsapah Yarabeam ma, betaq wada sqada peeyah bobo dxeral ka sapah na.
Currently Selected:
1 Qbsuran Paru 13: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
