1 Qbsuran Paru 12
12
Tnbrinah na Pnswayan Rudan Tgdaya
(2 No 10:1-19)
1Mosa Sekem ka Rexabam. Ado kana dseediq Israel we gaga msseli Sekem ngngalun daha mqbsuran paru ka heya. 2Qnduriq peeyah Selomoh qbsuran paru ma mnosa Micrayim ka Yarabeam laqi Nebat we mbahang kari nii. 3Smkagul seediq mosa mlawa heya ka seediq Israel. Kiya de Yarabeam we msuupu seediq Israel mosa mpprengo Rexabam rmengo heya ka dheya: 4“Tama su we wada knchedil ba kudo pnaapa na menan. Saya braho su pkslokah ka mqraqil qpahan ma knchdilan kudo pnaapa bnege tama su, kiya ka mqeepah miyan sunan.” 5Rmengo dheya ka Rexabam: “Osa han! Bobo mk3 ali de eyah qmita kenan.” Kiya de mosa ka dheya da.
6Muudus ciida ka Selomoh tama Rexabam han ge, niqan ka rdrudan mheyu berah na, Rexabam qbsuran paru we smiling dheya ma rmengo: “Yamu ge, peeyah ka lnglungan namu, klaun mu cmiyuk ka dseediq nii.” 7Rmengo heya ka dheya: “Saya, nasi su pntnaun so tnqliyan dmayo seediq nii ma, cyukun su malu kari ka dheya de, ida mptnqliyan qbsuran paru betaq ani knuwan ka dheya.”
8Kiya de qbsuran paru we ini na ngali ka kari ddrudan mpqlahang nii ma, krinah mosa migin dmbbeyax mnsuupu mdakil heya ma, mnheyu berah na ka ngalan na pusu slingan. 9Smiling dheya ka Rexabam: “So nii kari daha ka dseediq nii: ‘Pchedil bale kudo napa menan ka tama su, braho su kslokah hari.’ Peyah ka lnglungan namu, klaun mu madis cmiyuk dheya.” 10Dmbbeyax mnsuupu mdakil heya we rmengo heya: “Rmengo qbsuran paru ka seediq nii: ‘Tama su we wada mchedil ba kudo pnaapa na menan. Braho su pslokah hari.’ Qbsuran paru keso nii cmiyuk ka Dheya: ‘Wawa tluding mu we mgkala qnthuran hwinuk tama mu! 11Wada mchedil kudo pnaapa na yamu ka tama mu. Yaku saya de mpgkala kudo knchedil ka ppaapa mu yamu! Tama mu we saangal namu na ssebuc wada smebuc yamu. Yaku we mdoi ku dosan!’”
12Yarabeam ma seediq we muyu kari rnengo qbsuran paru “Mk3 ali de eyah dungal”, kiya de mk3 ali de meyah Rexabam hiya ka dheya. 13Qbsuran paru ge, mseang ba kari na cmiyuk seediq ma, ini qbahang nkari ddrudan mpqlahang. 14Kari pneeyah mbbeyax ka ngalun na ma, rmengo dheya: “Tama mu we wada mchedil ba kudo ka pnaapa na yamu, yaku de krinah kudo mchedil ka ppaapa mu yamu! Heya we saangal namu na ssebuc smnebuc yamu, yaku we mdoi ku dosan!” 15Qbsuran paru ge, ini aangal pnesa seediq nii, ado pnoda lnglungan Utux Tmninun ka nii. Kiya ka mpbale pblayun na pooda ka nkari Axiyah mpgeela kari seediq Siylon quri Yarabeam laqi Nebat.
16Dseediq Israel ge, qmita ini angal pnesa daha ka qbsuran paru de, cmiyuk qbsuran paru ka dseediq:
“Manu pnugluban miyan meniq ckceka Dawid ho?
Uka pusu dxeral miyan meniq ckceka laqi Yisay!
Ddseediq Israel! Osa mbrinah kobu namu nanak!
Dawid! Saya, qlhangi nanak isu ka sapah su!”
Kiya de dseediq Israel we mbrinah mosa kobu daha nanak ka dheya. 17Quri so dseediq Israel gaga meeniq lualang Yehudah we, ida Rexabam ka qbsuran paru daha. 18Rexabam qbsuran paru we smkagul Adoram mpqlahang mqeepah. Kiya de kana seediq Israel we wada daha buun btunux phuqil ka heya. Kiya de asi nugaaguh paapa rulu mccebu qduriq Yerusalem ka Rexabam qbsuran paru. 19So kiya de, tbrinah sapah Dawid betaq saya ka Israel. 20Seediq Israel we mbahang Yarabeam mbrinah ka dheya. Kiya de saun daha mlawa ka heya ma, ngalan daha qbsuran paru kana Israel. Wano ba pnswayan rudan Yehudah we uka ka smnegul dtnsapah Dawid.
Kari Pgeela Semayah
(2 No 11:1-4)
21Dehuk Yerusalem ka Rexabam de, psseli 18 mang heyi kana sapah Yehudah ma pnswayan rudan Binyamin. Dheya nii we supi gneegan kana ma, mosa mccebu Israel mpbrinah mangal qnhlangan bbege daha Rexabam laqi Selomoh. 22Kiya de meyah Semayah seediq utux ka kari Utux Baro: 23“Rngagi ka Rexabam laqi Selomoh qbsuran paru Yehudah, kana spsapah Yehudah, Binyamin ma, duma na seediq hiya: 24‘Rmengo so nii ka Utux Tmninun: Iya osa mccebu seediq Israel mtswai namu ka yamu. Osa sapah namu kana! Ado noda nii we pneeyah kenan.’” Kiya de mbahang kari Utux Tmninun ka dheya ma, mbrinah sapah thei kari Utux Tmninun.
Qmada Utux Baro ka Yarabeam
25Yarabeam we smmalu Sekem dgiyaq Eprayim ma meeniq hiya. Bobo na nii, mlatac peeyah hiya mosa smmalu Penuel dungal. 26Lmngelung ka Yarabeam: “Saya ka qlhangan nii we, ida ba maha so mpquri tnsapah Dawid. 27Nasi ida mosa Yerusalem, mosa smapuh sapah thmkuwan Utux Tmninun ka seediq nii we, Lhebun daha we ida maha mquri Rexabam qbsuran paru tnpusu sapah daha. Kiya de mphuqil kenan ma maha mquri Rexabam qbsuran Yehudah ka dheya.” 28Kiya de tnugleus ba lmngelung ka Yerubuwan heya de smalu 2 wawa dapa king ma rmengo seediq: “Bsiyaq bale ka nsaan namu Yerusalem da. Seediq Israel! Qtai! Nii ka utux namu dmnudul yamu peeyah Micrayim.” 29Kiya de pniqun na Beytel ka 1 ma pniqun na Dan ka 1. 30Oda nii ka bege qnquwan noda seediq, ado betaq mosa Dan thmuku wawa dapa king ka dheya. 31Yerubuwan we smalu sapah thmkuwan bungu dgiyaq biciq ka heya ma, ngalan na msapuh ka mmhemuc seediq uxe seediq Lewiy.
Smrutiq Thmuku Beytel Hiya
32Yarabeam we muyu ali ooda smseman Yehudah ma, 15 ali 8 idas ngalan daha ali smseman. Heya nanak ka mosa mege snapuh. So nii ka noda na Beytel hiya, mege snapuh wawa dapa king ka heya ma, psaun na pqeepah sapah thmkuwan gaga dgiyaq biciq snmalu na hiya ka dmpsapuh pnheyu na. 33Heya we sneung na nanak ka 15 ali 8 idas, maha spuhan snmalu na Beytel hiya. Quri seediq Israel ka speeniq na smseman nii. Kiya de heya nanak ka psqama skenux spuhan hiya.
Currently Selected:
1 Qbsuran Paru 12: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
