1 Qbsuran Paru 11
11
Malix Utux Baro ka Selomoh
1Selomoh ge, smkuxul laqi mqedil Paroh ma, hbaro bale mqedil icil qlhangan. Kiya ka weewa Xet, Moab, Amon, Edom ma Cidon. 2Quri so dseediq dqlhangan nii we, rmengo dseediq Israel ka Utux Tmninun: “Iya ppsterung dheya ma, iya theyaq dheya uri. Ado dheya we psridil lhebun namu mosa smnegul utux daha ka mqedil nii.” Selomoh we, ririh smkuxul, kiya ka smnegul dheya. 37'00 ka ngalan na mqedil na ma 3'00 ka liwang na. Dheya nii ka meyah lmgelu lhebun Selomoh. 4Rudan ka Selomoh ciida, meyah psridil heya ka dmqedil nii ma pthmkuun daha utux icil qlhangan. Heya we ini so tama na Dawid pskingal ba lhebun na smnegul Utux Tmninun, Utux Baro na. 5Selomoh we thmuku Astoret utux mqedil seediq Cidon ma, Milkom utux seediq Amon qnrquun bale. 6Selomoh we ini pndungus Utux Tmninun ka noda na, ini so tama na Dawid pskingal ba lhebun na muyu Utux Tmninun. 7Ciida, Selomoh we, smalu spuhan Kemos qnrqihun ba seediq Moab ma, spuhan Molek qnqihun ba seediq Amon meeniq sipo dgiyaq Yerusalem. 8Dungal ka heya we ssmalu na egu bale thmkuwan tikung ka kana dmqedil na ma, liwang na pneyah qlhangan icil ma srwaun na psqama pskenux smapuh utux daha nanak ka dheya.
9Mseang mquri Selomoh ka Utux Tmninun, ado lhebun na we wada msridil Utux Tmninun, Utux Baro nuIsrael mn2 tnqita heya. 10Pndakar bale heya ka Utux Tmninun, iya bale snegul utux icil. Kiya de we ini puyu pndakar Utux Tmninun ka heya. 11Manu so kiya de rmengo Selomoh ka Utux Tmninun: “Ado, so su nii ka isu, ini su puyu pnsdhegan ma kari pndakar rnengo mu sunan. Ida mu hgliqun ka qlhangan su ma mplatac ku sunan ma, bege mu dpdudul mdayo sunan. 12Kiya de, ado Dawid tama su, uxe ku mooda oda so nii meeniq kndesan su. Spoda mu baga lqlaqi su ka hgliqun mu ka qlhangan nii. 13Kiya de, uxe mu sgliqun ka kana qlhangan, ririh Dawid tnqliyan mu ma, Yerusalem gneegan mu mpsngari ku 1 pnswayan pusu rudan bbege mu laqi su.”
Pais Selomoh
14Kiya de Utux Tmninun we ptuyun na ka Hadad seediq Edom ma pkpais na Selomoh. Heya we lqlaqi mslutuc sapah qbsuran paru Edom. 15Meniq Edom ka Dawid ciida we, mnosa smeku seediq pnhuqil mccebu ka Yoab qbsuran supi na ma, wada daha phqilun kana ka lqlaqi rseno seediq Edom. 166 idas nniqan daha Edom hiya ka Yoab ma seediq Israel. 17Hani prading riso ciida ka Hadad we, msuupu duma seediq Edom ka dqbsuran mdayo tama na ma mosa qduriq quri Micrayim. 18Kndalax Midyan ka dheya we mosa Paran ma, peeyah Paran mumal duma ka seediq ma mosa Micrayim, betaq qbsuran paru Micrayim hiya. Paroh we biqan na sapah, uqun ma dxeral ka dheya. 19Kuxul ba Paroh ka Hadad ma, sbege na heya ma mqedil na ka mtswai Taxpenem mqedil qbsuran paru. 20Dmoi 1 laqi rseno Hadad ka mtswai Taxpenem, Ginubat ngayan na. Taxpenem we pniqun na sapah qbsuran paru Paroh hiya ka laqi nii. Ginubat we msuupu lqlaqi qbsuran paru sapah qbsuran hiya. 21Hadad meniq Micrayim cida we mnbahang wada mtheyaq pusu rudan na ka Dawid ma, wada mhuqil uri ka Yoab qbsuran supi de, rmengo Paroh ka heya: “Posa ku qlhangan mu nanak ho?” 22Rmengo heya ka Paroh: “Nniqan su yaku hini we, niqan ka ini knttuku peni? Qtai! Betaq su kmbrinah qlhangan su nanak ho!” Rmengo ka heya: “Uka ani manu ini knttuku na, wano posa ku nanak.”
23Dungal Utux Baro we ptuyun na ka Rejon laqi Elyada ma pkpais na Selomoh. Hiya nii we hmniti qmada Hadadejer qbsuran paru Cobah ma qduriq. 24Phuqil dseediq Cobah ka Dawid ciida, Rejon we psseli dheya ma heya ka ma mpdudul na. Mosa meniq Darmeseq ka heya ma qmlahang Darmeseq hiya. 25Muudus ciida ka Selomoh han we, uxe wano Hadad ka kmpais Israel, Rejon nii uri. Tmraqil ba Israel ka heya ma, heya ka qbsuran paru Aram.
Mege Sntangan Yarabeam ka Utux Baro
26Yarabeam laqi Nebat we, pheyu baga na meyah mccebu qbsuran paru uri. Tnqliyan Selomoh ka heya ma, seediq Ceredah pneyah pnswayan rudan Eprayim. Bubu na we Ceruah kesun ma mqrinuc ka heya. 27Tnbrinah na qbsuran paru we, ririh smnalu alang Miru ma cmapang beling alang Dawid tama na ka Selomoh. 28Yarabeam nii we seediq tgkeela ba. Selomoh we qtaan na mdrumuc ba meepah ka riso nii de, ngalan na mpqlahang qpahun kana tnsapah Yosehu. 29Ciida, mlatac Yerusalem ka Yarabeam we sterung Axiyah mpgeela kari seediq Siylon elu ka heya. Mlukus bgurah bale lukus pbragun ka Axiyah mpgeela kari. Wano ba 2 ba heyi mneeniq breenux hiya, uka ani 1 seediq da. 30Maangal bgurah bale lukus pbragun pnlukus na ka Axiyah ma mn12 smgaliq. 31Rngagan na ka Yarabeam: “Ngali 10 snegliqan ka isu. So nii kari na ka Utux Tmninun, Utux Baro nuIsrael: ‘Qtai! Sgliqun mu peeyah baga Selomoh ka qlhangan nii ma, bege mu sunan ka 10 pnswayan rudan. 32Yaa kesun Dawid tnqliyan mu ma alang Yerusalem gneegan mu peeyah kana pnswayan rudan Israel, wano 1 ba pnswayan rudan ka rngiun mu Selomoh. 33Ado qmada kenan ka dheya ma, mosa tgtemaq thmuku Astoret utux mqedil seediq Cidon, Kemos utux seediq Moab, Milkom utux seediq Amon. Ini pntena Dawid tama na muyu kari mu ma, msderux qneepah na ma, thei kari pndakar ma gaya bneku mu. 34Kiya de uxe mu ngalun peeyah heya ka kana qlhangan. Ida mpqbsuran paru muudus ka heya han. Ado wada muyu bale gaya pndakar ma kari pndakar mu ka Dawid tnqliyan mu. 35Ngalun mu peeyah baga laqi na ka qnlahang ma, bege mu sunan ka 10 pnswayan rudan. 36Rngiun mu 1 pnswayan rudan ka laqi na, so maha niqan ledax klaali meniq berah mu ka Dawid tnqliyan mu meniq Yerusalem gneegan pnheyu ngayan mu. 37Mpgao ku sunan ka yaku. Mpuyu ku so kana lhebun su pthlangun misu paru Israel. 38Nasi su mnduwa thei kana pndakar mu ma muyu ba kari mu ma, mndungus lnglungan meepah malu oda meniq doriq mu, mntena so ndaan Dawid tnqliyan mu de, mpsuupu ku sunan. Pntnaun misu so Dawid plekuh ku sapah pnheyu su ma, bege mu sunan ka Israel. 39Ririh noda nii, mpsterung mqraqil ka lqlaqi mslutuc Dawid. Nii we uxe mpbetaq ani knuwan.’” 40Migin phqilan Yarabeam ka Selomoh, kiya de asi osa qduriq Micrayim ka heya. Mosa Siysaq qbsuran paru Micrayim ka heya ma, betaq wada mhuqil ka Selomoh we ida meniq Micrayim hiya ka heya.
Hnqilan Selomoh
(2 No 9:29-31)
41Duma na nii qneepah Selomoh ka kana ndaan na ma knkela na we, uxe gaga spatis patis ndaan Selomoh kana peni? 42Selomoh we 40 knkawas qnlhangan na kana Israel meniq Yerusalem. 43Msuupu mtaqi pusu rudan na ka Selomoh. Skuun daha alang Dawid tama na, Rexabam ka lmutuc heya mqbsuran paru.
Currently Selected:
1 Qbsuran Paru 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
